OBAMA NDERTON NJE XHAMIJ PER MUSLIMANET AFER KULLAVE BINJAKE

Obama pro xhamisë te kullat e 11 shtatorit: Respekt lirisë fetare




VOA | 14/08/2010 | ARTI I TE JETUARIT | 41 KOMENTE | SHARE | - +
Presidenti i Shteteve të Bashkuara, Barak Obama ka mbështetur ndërtimin e një xhamie dhe qendre kulturore myslimane pranë vendit të sulmeve terroriste të 11 shtatorit 2001 në Nju Jork, megjithë debatin e nxehtë që po zhvillohet në vend për këtë çështje.


Gjatë një darke të shtruar mbrëmë në Shtëpinë e Bardhë me rastin e Ramazanit, Presidenti Obama tha se myslimanët kanë "të drejtën të ndërtojnë objektet e tyre të lutjeve dhe qedrën e kumunitetit në një pronë private në Manhatanin e Poshtëm". Ai tha se "angazhimi i Amerikës ndaj lirisë së fesë duhet të jetë i patundur".


Kjo ishte hera e parë që presidenti shprehu pikëpamjen e tij për propozim kundërthënës, të kundërshtuar nga rreth 70% e amerikanëve, sipas një sondazhi të kohëve të fundit të kanalit televiziv CNN.


Republikanët iu përgjigjën menjëherë deklaratës së presidentit. Anëtari i Dhomës së Përfaqësuesve nga Nju Jorku, Pitër King, tha se "Presidenti Obama e ka gabim". Ai tha se zbatimi i këtij plani është një veprim emocionalisht i papërshtatshëm dhe i pakujdesëshëm.


Rreth 3000 njerëz u vranë kur rrëmbys avionësh, anëtarë të grupit ekstremist al-Kaida përplasën dy avionë udhëtarësh në kullat binjake të Qendrës Botërore të Tregtisë. Ky vend i qytetit njihet tani si "zona zero"



Qendër Islamike te kullat e 11 shtatorit. Debat në SHBA
Në kapitullin e fundit të një beteje tepër të nxehur, një agjenci e qytetit të Nju Jorkut i ka hapur dritën e gjelbër ndërtimit të një qendre islamike pranë vendit ku ngrihej Qendra Botërore e Tregtisë. Kjo zonë e Nju Jorkut është njohur me termin kuota-zero që pas sulmeve terroriste të 11 shtatorit 2001, të cilat shkatërruan kullat binjake që ngriheshin atje.
Me votën e djeshme, Komisioni i Nju Jorkut për Mbrojtjen e Objekteve Historike nuk pranoi t'i jepte statusin e objektit historik një ndërtese të shekullit të 19 që ndodhet aktualisht në truallin ku është propozuar të ngrihet Qendra Islamike me 13 kate dhe me vlerë 100 milionë dollarë. Komisionerët deklaruan se ndërtesa, nga e cila nuk shihet kuota zero, nuk ka ndonjë vlerë të veçantë historike apo arkitekturale.
Disa nga të pranishmit reaguan me zemërim ndaj vendimit. Pamela Geller kryeson një grup që kundërshton ngritjen e qendrës. Në grup bëjnë pjesë familjarë të viktimave që gjetën vdekjen në sulmet terroriste të 11 shtatorit. Zonja Geller dhe aktivistët e tjerë thonë se qendra, e cila do të përfshinte edhe një xhami, do të ishte një fyerje për kujtimin e viktimave të 11 shtatorit.
"U ka shkaktuar dhimbje tepër të mëdha familjarëve të viktimave pasi këto familje ishin ata që u prekën direkt. Nëse synimi i qendrës ishte shërimi i plagës, faktikisht ka realizuar të kundërtën. Përse nuk heqin dorë nga xhamia dhe të ndërtojnë vetëm një qendër për komunitetin?"
Përkrahësit e qendrës thonë se ajo do të jetë e hapur për të gjithë nju-jorkezët. Një tjetër grup familjesh të viktimave të 11 shtatorit nxori një deklaratë në mbështetje të qendrës. Daisy Khan është një ndër kryesuesit e grupit:
"Ne jemi për paqe, pasi paqja është më e rëndësishmja. Ne besojmë në simbolikën e të qënit pranë këtij vendi, ku ndodhi një tragjedi aq e madhe, pasi besojmë se do të lindë një shërim po aq i madh plagësh."
Anëtarët e një grupi liberal hebraik, i quajtur Jay Street, janë të një mendimi.
"Komuniteti mysliman në Nju Jork ka të drejta po aq sa çdokush tjetër. Si hebrenj të Amerikës ne besojmë se historia jonë na ka lënë mësimin se ka rëndësi të ngremë zërin kur kërcënohen liritë fetare të të tjerëve."
Nga fundi i ditës, Kryetari i Bashkisë së Nju Jorkut, Michael Bloomberg, i cili e ka mbështetur me forcë qendrën, bëri një deklaratë për vendimin, duke qëndruar pranë klerikëve të besimeve të ndryshme:
"Shpresoj se kjo xhami do të ndihmojë për ta bërë qytetin tonë më të bashkuar dhe për të zhdukur idetë fallso se sulmet e 11 shtatorit kishin ndonjë gjë të përbashkët me fenë islame. Myslimanët janë po aq sa çdokush tjetër - pjesë e këtij qyteti dhe e vendit tonë."
Themeluesit e Qendrës Islamike thonë se do të ngrenë një përmendore në nderim të viktimave të 11 shtatorit dhe se bordi i qendrës do të ketë edhe anëtarë jo-myslimanë. Ndërtimi i qendrës do të fillojë pasi të grumbullohen fondet e nevojshme.