Lajmet Ditore

Sulmet amerikane vrasin 9 militantë në Pakistan



9 persona, që dyshohen se kanë qenë militantë, janë vrarë gjatë dy sulmeve të aeroplanëve amerikanë pa pilot në Pakistan.
Zyrtarët e sigurisë së Pakistanit thonë se aeroplanët e tillë kanë sulmuar dy fshatra në afërsi të Mir Ali në Vaziristanin verior, një rajon i dominuar nga fiset përgjatë kufirit me Afganistanin.
Gjatë dy muajve të fundit, SHBA-të e kanë rritur jashtëzakonisht shumë përdorimin e raketave që lëshohen nga aeroplanët pa pilot duke pasur në shënjestër militantët në rajonin kufitar të Pakistanit.
Islamabadi zyrtar, ndonëse para opinionit të vet thotë se nuk pajtohet me sulmet, në takime sekrete me amerikanët besohet se i përkrahë ato. /REL/

Musa Xhaferi, Ministër - Fazli Veliu, deputeti i BDI-së
Dosjet e tre funksionarëve të lartë të BDI-së, që u dorëzuan dje në komisionin për lustrim, kanë ngjallur reagime të shumta në partinë e Ahmetit. Dy, prej tre funksionarëve të BDI-së që dje u apostrofuan si bashkëpunëtor të mundshëm të shërbimeve serbe, sot reaguan ashpër duke i vlerësuar dosjet e tillë si shantazh dhe shpifje nga ana e PDSH-së për diskreditimin e personaliteteve të tyre. Ministri që u përmend si bashkëpunëtor me nofkën “Mama” është Musa Xhaferi. Ndërsa deputeti me pseudonimin “Daja” dhe “Drim” është Fazli Veliu. “Ajo është një dosje nga shërbimet e PDSH-së, nuk di me ndihmën e kujt, të cilët janë të trilluara gjana, faktikisht unë jam i fundit që kam marrë atë përmes gazetarëve. Keqpërdorimi i personave publik nëpërmjet kësaj forme të rrallë të jashtëzakonshme, që për fat të keq profesori ynë i nderuar që ska turp para nxënësve edhe publikut, të luajë të aktrojë një përrallë të atillë se rastësisht atij dikush i ka dhënë dosje të atilla, dhe do të kishte një kuptim logjik nëse ai dosjet do ti dorëzonte tek komisioni. Unë do të angazhojë avokatë të cilët do të kërkojnë të mbrojnë veten në kuptimin e komprometimit personal në një formë shumë të paskrupullte të skenarit që ata e kanë përgatitur” tha Musa Xhaferi, Ministër i BDI-së. Ndërsa Fazli Veliu ka reaguar përmes një letre drejtuar opinionit. “Në asnjë kohë e situatë, në burgje, mërgim, luftë e paqe, përballë armiqve e mashave të zgjatura të tyre, nuk e kam humbur vetëdijen dhe forcën e dhënë nga Zoti, që të bëj ndonjë veprim të pamatur në dëm të popullit e Atdheut tim, përkundrazi, kam qëndruar në këmbë dhe kam vepruar me logjikë të shëndoshë e me përkushtim për çështjen e shenjtë mbarëkombëtare e mbarënjerëzore“ thotë në reagimin e tij, deputeti Veliu. Ai thotë se drejtësinë për këtë rast do të kërkojë në Institucionet kombëtare dhe Ndërkombëtare. Deputetja e BDI-së Ermira Mehmeti Devaja tha se bëhet fjalë për fushatë që ka për qëllim të diskreditojë personalitete, të shantazhojë dhe të shkatërrojë familje dhe në fund të shkatërrojë jetë njerëzish.“Si ka mundësi vallë që dosje kaq të rëndësishme, kaq dosje kaq të besueshme, dosje me informacione kaq diskredituese për zyrtar të një shteti, deputet, ministra funksionar e kështu me rradhë të kenë fluturuar në oborrin e një individi dhe që ai pastaj me këto dosje të kryej obligimin e tij qytetar siç e quajti dje” tha zëdhënësja e BDI-së Ermira Mehmeti Devaja. Nga BDI-ja thonë se do të presin fillimisht prononcimin e Komisionit për Lustrim dhe më pas do të ndërmarrin të gjitha masat ndaj siç thonë “qytetarit të ndershëm që kryente obligimin e tij qytetar” dhe ndaj atyre për të cilët kanë indikacione se janë të përfshirë në skenarët me dosjet e tre funksionarëve BDI-së. Shkëlzen Aqifi

Sot në orët e pasdites, ministri i Shëndetësisë Bujar Osmani, ka pësuar një aksident në trafik në superstradën Gostivar – Tetovë, në afërsi të fshatit Zherovjan. Nga Klinika e Qytetit, njoftojnë se gjendja e ministrit Osmani është e qëndrueshme pa pasoja të rënda dhe se asnjëri nga shoqëruesit e tij apo pasagjerët që janë gjetur në makinën tjetër, nuk janë lënduar. Ndërkohë nga Ministria e Brendshme thanë për Alsat M, se ekipet e tyre kanë dalë në terren dhe se po kryhen hetimet. Informacionet e para flasin se aksidenti ka ndodhur pasi që makina zyrtare e ministrit Osmani, është përplasur me një makinë tjetër të tipit ‘Reno 18’. Osmani po kthehej nga Tirana, ku kishte marrë pjesë në konferencën ndërkombëtare shkencore për mënyrën e menaxhimit të sistemit shëndetësor.

Qeveria nuk ka ndryshuar propozim/ligjin për regjistrimin e popullsisë, por, është e gatshme të shqyrtoj amendamentet e propozuara të cilat në mënyrë kualitative mund të përmirësojnë tekstin e ligjit, kështu u shpreh për Alsat, Zv/kryeministri Abdylqim Ademi. Tani për tani, sipas tij, Qeveria ka disponim të pranoj vërejtjen që Komisionin Shtetëror të Regjistrimit ta zgjedh Parlamenti nëse për këtë paraprakisht merren vesh grupet parlamentare. “Gjitha vërejtjet tjera mendoj që janë të pabazë dhe janë mirë të inkorporuar në ligj. Sa i takon dilemës rreth nënshtetësisë mendoj që ky proces nuk ka bëj aspak me nënshtetësi, të gjithë ata që janë banor rezident në Maqedoni do të regjistrohen vetëm duke dëshmuar me një dokumentacion të thjeshtë ashtu siç është e paraparë edhe në ligj dhe nënshtetësia nuk është kusht për tu regjistruar” tha zv.kryeministri Abdylaqim Ademi. Sipas Ademit diaspora është mirë e përfshirë me ligj, ndërsa zvogëlimi i numrit të regjistruesve është i pamundur për shkak të procesit masiv i cili duhet të përfundoj në afat prej 15 ditësh. Edhe kërkesa që të ketë dy kopje të fletë-regjistrimit është e pamundur konsideron Ademi pasi në të përfshihen të dhëna personale të qytetarëve të cilat janë të mbrojtura me ligj dhe të njëjtat mund të keqpërdoren. Periudha e regjistrimit në muajin prill është praktik botërore dhe rekomandim i ndërkombëtarëve, thekson Ademi. I të njëjtit mendim është edhe profesori, Fauzi Skenderi. “ Kërkesa e Demokracisë së Re, regjistrimi i popullsisë të bëhet gjatë muajve të verës, mendoj se nuk qëndron, praktika botërore shkencore thotë që bëhet në pranverë. Ndoshta ajo është nga ana praktike, se bashkatdhetarët tanë mungojnë mirëpo në rastin konkret këto janë standarde botërore që ne ndoshta edhe dalim jo serioz në disa raste sepse bëhet fjalë për një proces botërorë që ka një histori të gjatë, një proces ka mijë vjeçar” tha demografi Fauzi Skenderi. Komisioni parlamentar për sistem politik nga dita e hënë fillon me shqyrtimin e amendamenteve të partive politike rreth projekt ligjit për regjistrimin e popullsisë i cili duhet të realizohet në prill të vitit të ardhshëm. Gjyltene Rexhallari

Liban: Ahmadinexhadi mbyll vizitën pranë kufirit izraelit


E premte 15 Tetor 2010 9:50 Presidenti iranian, Mahmud Ahmadinexhad, çmoi lart atë që ai e quajti rezistenca libaneze dhe sulmoi me fjalë Izraelin duke thënë se "cionistët janë të vdekshëm".Komentet e Ahmadinexhadit u bënë të enjten, në fshatin libanez të Bint Xhbeilit, pranë kufirit me Izraelin. "Gjithë bota e di se cionistët do të zhduken" tha Ahmadinexhad përpara një turme të madhe mbështetësish.Kryeministri izraelit, Benjamin Netanjahu, i është përgjigjur deklaratave të Ahmadinexhadit. "Përgjigjen më të mirë sulmet verbale të mbushura me urrejtje, që vijnë nga ana tjetër e kufirit, e kanë marrë 62 vite më parë", tha Netanjahu duke iu referuar vitit 1948, që shënon dhe krijimin e Izraelit.Ahmadinexhadi po viziton Libanin, derisa Irani njihet si mbështetësi më i madh i lëvizjes shiite Hezbullah në Liban.

Turqia vazhdon të dërgojë ndihma në Pakistan

Turqia vazhdon të dërgojë ndihma në Pakistan, vend që u godit nga fatkeqësia natyrore e përmbytjeve.Kryeministria turke u dorëzoi autoriteteve pakistaneze ndihmën financiare me vlerë 193 milionë e 469 mijë lira turke (96 milionë euro) të grumbulluar nga Enti i Turqisë për Çështjet Fetare (Diyanet) dhe Drejtoria e Përgjithshme e Radiotelevizionit shtetëror, TRT.

Karikaturat anti Islame: Danimarka refuzon faljen


E premte 15 Tetor 2010 22:37 Danimarka refuzoi te kerkoje falje per karikaturat e profetit Muhamed te publikuara ne vitin 2005 ne nje gazete vendase.Nepermjet Ministrit te Jashtem Lene Espersen vendi nordik hodhi poshte pretendimet per te kerkuar falje per karikaturat qe shkaktuan protesta te dhunshme ne boten islamike por shtoi se edhe liria e ka nje kufi.Mund te konfirmoj se liria e shprehjes nuk eshte aq e gjere sa te mos kete kufizime deklaroi Esperesen pas kthimit të saj nga Egjipti ku ajo vizitoi edhe Universitetin e El Azherit.

Në Universitetet gjermane fillon shkollimi i imamëve

Duke filluar nga semestri dimëror në Tübingen, Münster dhe Osnabrück do të ngrihen qendrat për studime islame për shkollimin e mësuesve të fesë islame për shkollat si dhe për imamë.

E premte 15 Tetor 2010 22:26 Gjermania fillon vitin e ardhshëm me vendosjen e bazave për shkollimin e lartë të teologëve islamë. Duke filluar nga semestri dimëror në Tübingen, Münster dhe Osnabrück do të ngrihen qendrat për studime islame për shkollimin e mësuesve të fesë islame për shkollat si dhe për imamë. Ministrja federale gjermane e Arsimit, Annette Schavan prezantoi të enjten (14.10.) në Berlin rezultatet e procesit të përzgjedhjes për ngritjen e qendrave të tilla në Universitetet gjermane.Deri tash në disa vende të Gjermanisë janë krijuar qendra, të cilat ofronin mësime për fenë islame. Ato shërbejnë për përgatitjen e mësuesve për lëndën e fesë islame dhe përcjelljen e zhvillimeve të planeve arsimore për këtë lëndë. Ngritja e themeleve për studime islame përbën një shtesë të rëndësishme dhe po ashtu bazë të mirë për zhvillimin e këtyre ofertave. Prandaj që në krye është provuar që të gjenden koncepte dhe vende të përshtatshme, që ato të lidhen me njëra-tjetrën, shkollimi i teologëve për lëndën e fesë islame në shkolla dhe studimet teologjike.Në Ministrinë Federale të Arsimit kishin arritur kërkesat e disa universiteteve. Sipas ministres Schavan, një komision i lartë i përbërë nga ekspertë të fushës kanë vendosur në bazë të kualitetit të koncepteve të ofruara: "Së pari: Tübingeni të zhvillohet dhe promovohet si vend për studimet islame. Ai posedon parakushte të mrekullueshme, me qendrat më të fuqishme për studime teologjike, si fakultetin për studime evangjeliste ashtu dhe fakultetin për studime katolike, shkencën islame dhe teologjinë si dhe rrethe të tjera të shkencave humane".Tübingeni mbi këtë bazë ka paraqitur një koncept të sofistikuar, forca e të cilit para së gjithash sipas Schavan-it qëndron në mënyrën e përshkrimit të zhvillimit të studimeve teologjike dhe lidhjen e tyre me një shkollim të mirë të shkencëtarëve të rinj.Përveç Tübingenit, si qendër për studimet e ardhshme islame janë përzgjedhur së bashku si një qendër e vetme edhe qytetet Münster dhe Osnabrück. Ministrja Schavan përmend arsyet: "Kështu Münsteri ka ofruar parakushtet e mrekullueshme për një diskurs akademik me kërkesa të larta duke pasur parasysh spektrin e lëndëve ekszistuese dhe përqëndrimin në studimet teologjike dhe shkencat që kanë të bëjnë me fenë. Osnabrück-u disponon përvojën e duhur dhe partneritete të suksesshme si dhe njohuritë për përgatitjen e mësimdhënësve dhe shkollimin e mëtejshëm të imamëve, plotësuar edhe nga një arsimim i fokusuar në fushën e kërkimeve shkencore për migracionin."Münster-i dhe Osnabrück-u do të përkrahen si një rajon i përbashkët shkencor me kusht që të dyja universitetet të zhvillojnë një koncept bashkëpunimi. Në këtë mënyrë ato mund të kenë një ndikim në krejt Gjermaninë veriore.Pozitivisht nga komisioni është vlerësuar edhe propozimi i Universitetit të Erlangenit, të cilit ministrja i ka ofruar një shans për raundin e dytë përzgjedhës në muajin mars 2011.Schavani theksoi se universitetet gjermane, për shkak të përvojës së tyre teologjike janë posaçërisht të përshtatshme të japin një kontribut qendror për zhvillimin e teologjisë islame. Federata do të finanancojë pesë vitet e ardhshme pesë profesorë studiues, poste të bashkëpuntorëve dhe po ashtu grupe kërkimore. Për një universitet ministria e Arsimit do të caktojë deri në katër milionë euro, ndërkohë që për Münsterin dhe Osnabrückin si një qendër e dyfishtë mund të caktohen më shumë. Ndërkaq landet përkatëse janë të detyruara të marrin përsipër një të tretën e shpenzimeve të nevojshme./dw/