Lajmet ditore

BDI: "Dosja 'Ibri', shpifje partiake"

Dosja me nofkën ‘Ibri’ është bërë për të diskredituar kryetarin e BDI-së Ali Ahmeti, deklaroi sot sekretari i përgjithshëm i BDI-së Abdilaqim Ademi. Ai tha se bëhet fjalë për një luftë të drejtpërdrejtë kundër personalitetit dhe veprës së themeluesit të dy Ushtrive Çlirimtare, asaj në Kosovë dhe Maqedoni. “Nuk mund të vlerësojmë si asgjë tjetër vetëm se një gjendje mentale të një grupi të njerëzve në udhëheqësin e një partie politike edhe mentorëve të tyre. Të akuzosh njërin nga themeluesit e UÇK-së së Kosovës dhe njeriun e parë të Ushtrisë Çlirimtare Kombëtare e tani kryetar të partisë më të madhe shqiptare në Maqedoni BDI-së, duhet të jesh në gjendje të rëndë mentale ose të kesh borxh të madh ndaj shërbimeve në rajon, të cilët i humbën të gjitha luftërat kundër këtij personi dhe shokëve të tij të ngushtë” tha Abdylaqim Ademi – sekretar i përgjithshëm i BDI-së. Ish drejtuesi i Lëvizjes Popullore të Kosovës, bashkëpunëtor i kreut të BDI-së Ahmeti, Xhavit Haliti në një intervistë për ALSAT M tha se shumë çështje të përmendura në dosje nuk përputhen me realitetin e atyre viteve.“Unë kam qenë drejtues i LPK-së, kam qenë në udhëheqjen më të ngushtë do të thosha të pararojës e cila ka drejtuar edhe LPK-në edhe lëvizjen guerile në Kosovë dhe për asnjë çast, për asnjë moment nuk kam dyshuar kurrë në Ali Ahmetin, nuk kam dyshuar atëherë, e nuk dyshoj as sot. Në bazë të asaj që kam dëgjuar, shumë çështje të cilat janë në dosje nuk kanë të bëjnë me të” tha Xhavit Haliti, ish drejtues i Lëvizjes Popullore të Kosovës. E përditshmja në gjuhën maqedonase “Dnevnik” në numrin e djeshëm publikoi dosjen për një bashkëpunëtor me pseudonimin “Ibri” për të cilin përmendej vendlindja e tij, fshati Zajaz i Kërçovës, si dhe aktivitetet e tij në diasporë. “Dnevnik” shkruante se “Ibri” dhe “Daja” në fillimin e viteve ’80 kishin bashkëpunuar me shërbimet sekrete jugosllave si dhe në kohën e Sllobodan Millosheviqit. Në dosjen e publikuar, përmenden të dhëna që përputhen me dokumentet e dosjes “Daja”, lidhur me vrasjen e vëllezërve Jusuf e Bardhosh Gërvalla dhe shokut të tyre Kadri Zekës. Shkëlzen Aqifi

Komisioni Anti korrupsion akuzon ish presidentin Branko Cërvenkovskin për shpenzimin e afro 500 mijë eurove vetëm për fushata për marrëdhënie me publikun. Presidenca aktuale e Ivanovit ka publikuar të dhënat e arkivit që tregojnë firmosjen e kontratave të bashkëpunimit me 3 këshilltarë nga Sllovenia, të cilët kanë kryer studimet gjatë kohës kur Cërvenkovski ishte president. Për këtë angazhim, nga buxheti i shtetit janë nxjerrë 20.764.057 denarë ose 340.394 euro.
Këshilltarit të parë i janë paguar 8.305.626 denarë ose 136.157 euro.
Këshilltarit të dyta i janë paguar 5.149.482 denarë ose 84.417 euro.
Këshilltarit të tretë i janë paguar 7.308.949 denarë ose 119.818 euro.
“Lidhur me informatat e publikuara ditëve të fundit për zotin Branko Cërvenkovski i cili në veti të ish kryetarit të Maqedonisë ka harxhuar mjetet në sasi prej 500 mijë eurosh për marrëdhëniet me opinion. Ne shpallëm interes kërkuan nga kabinetit kryetarit të tanishëm Gjorge Ivanov informatë të thuktë, kërkuam informatë edhe vetë nga Branko Cërvenkovski të tregojë se çfarë mendoi ai lidhur me këtë” tha Ilmi Selami, kryetar i komisionit shtetëror për anti-korrupsion. Kabineti i ish presidentit Cërvenkosvki i hodhi poshtë akuzat një ditë më parë, ndërsa sot edhe LSDM-ja, partia që ai drejton aktualisht i cilësoi ato manipulime të Gruevskit dhe VMRO-DPMNE-së. “Edhe sot vazhdojnë manipulimet e rënda dhe pengesat e pushtetit, të cilat shihet se realizohen nën marionetën e Gruevskit dhe VMRO DPMNE-së dhe Ivanovit. Sot, dalin në publik me të dhëna për shumën e përgjithshme të angazhimeve për këshilltarë gjatë gjithë mandatit të kryetarit Cërvenkovski, kurse dje u publikuan informata se vetëm në 2009-ën janë shpenzuar 500 mijë euro dhe sot vetë e vërtetuan se ka qenë gënjeshtër” tha zëdhënësi i LSDM-së Emiljan Stankoviq. Komisioni Anti korrupsion pret informata edhe nga vetë ish presidenti Cërvenkovski për të vërtetuar gjendjen faktike dhe të dalë me konkluzionet rreth rastit. Semra Jakupi

Ndërprerjen e energjisë elektrike në Tetovë, mbrëmë e kanë shfrytëzuar katër të burgosur, por ikja nuk i ka ecur njërit prej tyre, i cili menjëherë pas arratisjes është kapur nga policia. Bëhet fjalë për 28 vjeçarin me inicialet V.I. nga fshati Forinë. Pak më vonë, policia e Tetovës njoftoi se nga Burgu i Tetovës, janë arratisur edhe tre persona të tjerë, përkatësisht personi me iniciale S.S. i lindur në vitin 1988 në një fshat të Gostivarit, SH.I. i lindur në vitin 1992 në Tetovë, dhe S.I. nga fshati Dobrosht i lindur në vitin 1989. Burime nga hetuesia kanë bërë të ditur se, në momentin e arratisjes në burgun e Tetovës, nuk ka pasur rrymë, dhe ata kanë shfrytëzuar këtë moment duke u larguar në drejtim të panjohur. Sipas hetuesisë një person deri më tani i panjohur, ka asistuar në arratisjen. Përndryshe gjatë dy viteve të kaluara nga burgu i Tetovës janë shënuar disa arratisje dhe vetëvrasje.

Regjistrimi i popullsisë në muajin prill të vitit të ardhshëm do të realizohet në bazë të rekomandimeve të Kombeve të Bashkuara dhe standardeve evropiane. Megjithatë për realizimin e suksesshëm të këtij operacioni statistikor, duhet të sigurohet një klimë e besimit maksimal në institucionet që do ta realizojnë atë. Kështu deklaroi evro-ambasadori Ervan Fuere gjatë konferencës të organizuar nga zyra e BE-së në Shkup dhe përfaqësuesit e Eurostat.”Është absolutisht qenësore për ta siguruar klimën më të mirë për realizimin e këtij procesi të rëndësishëm të regjistrimit, nevojitet besim maksimal në funksionimin e institucioneve përkatëse por edhe besimi i të gjitha partive politike në vetë operacionin. Mbi të gjitha na nevojitet besimi nga opinion publik, nga qytetarët, veçanërisht kur kihet parasysh shoqëria multi-etnike” tha ambasadori i BE-sw Ervan Fuere. Drejtori i EuroStatit, përkujtoi se muaji prill është koha më e përshtatshme për realizimin e procesit të regjistrimit, duke hedhur poshtë kritikat e opozitës shqiptare se muaji prill nuk është i përshtatshëm për regjistrim. “Të gjitha vendet anëtare të BE-së dhe vendet e Ballkanit perëndimore regjistrimin do ta bëjnë në pill. Gjithashtu mendojmë se kjo është periudha më e mirë, për shkak se këtë e dimë nga eksperienca se gjatë muajit prill shumica e njerëzve janë në shtëpi apo mund të kemi qasje shumë më të lehtë tek ata” tha Pieter Everaers, drejtor i EuroStat. Zv/ kryeministri Abdylaqim Ademi theksoi se politizimi i procesit të regjistrimit vjen si rezultat i asaj se nga regjistrimi varen edhe një sërë të drejtash të bashkësive etnike. “Maqedonia ka përbërje multietnike, është vend me demokraci të re dhe të dhënat e regjistrimit përveç se për planifikim demografik dhe qëllime shkencore përdoren e dhe për realizimin e të drejtave etnike, atëherë informimi i drejtë i qytetarëve ka rëndësi të veçantë” tha zv.kryeministri Abdylaqim Ademi. Drejtoresha e entit për statistikë Bllagica Novkovska deklaroi se me regjistrimin do të përfshihet e gjithë popullata rezidente, derisa personat që jetojnë jashtë vendit më tepër se 12 muaj, nuk do të përshihen në regjistrim. Bedri Rexhallari

Deputetët e DR-së refuzuan të jenë pjesë e delegacionit parlamentar që vizitoi Entin Shtetëror të Statistikës. DR konsideron se ky institucion nuk ka kredibilitet, për shkak të përfaqësimit të ulët të bashkësive etnike. VMRO DPMNE-ja shprehu keqardhje, pasi gjykonte se me këtë takim do të eliminoheshin shumë dilema të parashtruara nga DR-ja. “Deputetët e DR-së nuk duan që të jenë pjesë e kësaj vizite ngaqë dyert janë të mbyllura për shqiptarët dhe e vë në dyshim edhe respektimin e procedurave në drejtim të realizmit të një procesi të regjistrimit i cili do të duhej të ishte transparent dhe real” tha Flora Kadriu, deputete e DR-sw. “Besoj se pas kësaj vizite shumë dilema të tilla do të zhdukeshin dhe shpreh keqardhje që disa koleg, që flisnin për parregullsi eventuale në përgatitjet dhe zbatimin e regjistrimit, sot nuk janë prezent” tha Zoran Petreski nga VMRO-DPMNE. Për LSDM kjo vizitë nuk do t’i zbusë shqetësimet e partive politike. Kërkesat e tyre duhen shqyrtuar seriozisht, në mënyrë që të mos vihet në të njëjtën situatë si ajo e krijuar nga procesi i lustrimit.”Edhe nëse i vëmë nën tepih, unë kam frikë se edhe ky regjistrim mund të na shndërrohet në mjet për pastrime politike, siç na ndodhi me procesin e lustrimit. Regjistrimi është operacion i rëndësishëm ndaj patjetër duhet t’i pastrojmë disa dallime kyçe të shpjegimeve të partive politike” tha Cvetanka Ivanova nga LSDM. Në pyetjen e BDI-së për përfaqësimin e shqiptarëve në sektorin që do të bëj grumbullimin dhe përpunimin e të dhënave, Novkovska nuk dha përgjigje konkrete por kërkoi që Enti që ajo drejton të mos sulmohet qëllimisht për të ulur besimin ndaj këtij institucioni.”Dëshiroj të di saktë cili sektor i dorëzon dhe përpunon të dhënat nga regjistrimi dhe cila është përqindja e përfaqësimit ne atë sektor” pyeti Tahir Hani deputet i BDI-sw. “Nga 10.2% të numrit të përgjithshëm të të punësuarve, 16% janë në pjesën udhëheqëse. Nëse enti shtetëror për statistikë sulmohet vazhdimisht nuk mundësojmë atmosferë të mirë edhe t’i besojmë këtij institucioni dhe pavarësisë së saj” tha Bllagica Novkovska drejtoresh e entit shtetëror të statistikës. Novkovska, në përgjigjet ndaj pyetjeve të tjera të deputetëve garantoi se EuroStati do të jetë i angazhuar gjatë gjithë procesit deri në shpalljen e rezultateve finale. Sa i përket punësimeve në Ent, Novkosvka tha se ato do të vazhdojnë, por pranimet do të jenë në baza profesionale dhe profilesh.
Gjyltene Rexhallari

Me faljen e dy rekateve namaz, ministri i Shëndetësisë Bujar Osmani, zyrtarisht lëshoi në përdorim faltoren myslimane në Qendrën klinike të Shkupit. Ministri Osmani theksoi se ky objekt fetar do t’i mundësojë personelit mjekësorë, pacientëve dhe familjarëve të tyre të kryejnë obligimet e tyre fetare. Sipas tij, ky objekt u lëshua në përdorim pas kërkesave të shumta të pacientëve të përkatësisë fetare islame. Faltorja e re ndodhet në afërsi të Klinikës së fëmijëve dhe është i pari i këtij lloji në rajon.“Është kjo një kërkesë e kamotshme e pacientëve, është kërkesë e organizatave për mbrojtjen e të drejtave të pacientëve, është një e drejtë themelore bazike e pacientëve për të pasur mundësinë për të kryer obligimet e tyre fetare, është një praktikë e shëndetësive moderne në Evropë, është praktikë në sektorin privat në Maqedoni. Më vjen mirë që tani edhe në shëndetësinë publike po krijojmë këto parakushte për të realizuar të drejtat themelore të pacientëve” tha ministri i Shëndetësisë Bujar Osmani. Mjekët, pacientët dhe qytetarët shprehen se ky objekt fetar, do të ndikojë në shërimin shpirtëror të njerëzve, por do të jetë edhe nxitje për autoritetet për përmirësimin e kushteve të tjera nëpër spitale.“Sigurisht që është një nevojë e kohës, nga arsyeja se është rritur numri i punonjësve në klinikën këtu në Shkup të cilët i përkasin fesë islame dhe lutja apo namazi është një obligim për çdo besimtar. Ashtu që kjo vërtet ishte nevojë e kohës”tha mjeku Rexhep Memedi.“Po është mirë të ekzistojë, për shkak të sëmurëve që gjenden këtu, dhe ka nevojë për gjithë popullatën. Kjo do të ndikojë edhe në përmirësimin e kushteve tjera, sepse çka është fetare është e respektuar nga gjithë anët” u shpreh një qytetar. “Ne e përshëndesim hapjen e këtij objekti fetar dhe mendojmë se do t’i shërbejë pacientëve dhe familjarëve të tyre për gjendjen psikike dhe shpirtërore” tha një tjetër qytetar. Përveç objektit fetar islam, në qendrën klinike të Shkupit, prej vitesh ekziston edhe kisha të cilën e shfrytëzojnë pacientët e përkatësisë fetare të krishterë. Objektet e tilla fetare në kuadër të qendrave spitalore, tanimë janë praktikë në shumë shtete të Bashkimit Evropian, varësisht nga përkatësia fetare e pacientëve. Nevzat Mamuti