Nga burgu hetues i Shutkës vrasësi i dy shqiptarëve të Gostivarit polici Jakim Trifunovski është transferuar në burgun e Prilepit, mëson Alsat M. Nga ministria e drejtësisë nuk japin arsyen pse ai është transferuar vetëm thonë për Alsat M se transferimi është konform procedurave ligjore.
Transferi i Trifunovskit sipas burimeve nga ministria e drejtësisë është e drejtë ligjore e gjykatësit hetues, i cili në bashkë koordinim me Drejtoritë e burgut merr një vendim të tillë.
“Gjykatësi hetues në bashkë koordinim me Drejtorinë e burgut vendos se personit të cilit i shqiptohet masa e paraburgimit, në cilin burg do ta vuaj dënimin. Ky nuk është rasti i par e as i fundit, rastet e tilla janë të shpeshta, megjithatë nuk përjashtohet si shkak edhe shkalla e rrezikshmërisë së të akuzuarit, megjithatë për gjithë këtë proces fjalën e fundit e ka gjykatësi hetues”, kështu thanë sot për Alsat-M, burime nga ministria e drejtësisë, derisa përmendin edhe faktin se burgjet në Shkup si ai i Shutkës dhe Idrizovës janë të mbingarkuar.
Por sipas burimeve të Alsat M shkaku kryesor i transferimit nuk ka qenë mbingarkesa e burgut hetues të Shutkës pasiqë atje ka edhe vend edhe qeli të zbrazëta por SIGURIA , autoritetet e burgut nuk kanë mundur të garantojnë siguri për vrasësin Trifunovski. Nga frika e hakmarrjes të ndonjë të paraburgosuri shqiptarë Trifunovskin e kanë transferuar në burgun e Prilepit, ku si fakt duhet përmendur nuk ka asnjë të punësuar shqiptare, dhe numri i të paraburgosurve është rreth 15.
Pavarësisht në Shutkë apo Prilep Joakim Trifunovski do të pret fillimin e procesit gjyqësor. Atij i kërcënohet rreziku i dënimit të burgut të përjetshëm për vrasje me paramendim të dy të rinjve shqiptarë, më 28 shkurt të këtij viti. Alsat M dje gjithashtu publikoi edhe një dokument i cili konfirmon se vrasësi Trifunovski është mirë i njohur si për organet e rendit ashtu edhe ata të gjyqësisë, për prishje të rendit publik dhe kërcënimeve me armë që ka bërë në të kaluarën . Me këtë dokument bien poshtë tezat e Ministrisë së Brendshme se ndaj Trifunovskit nuk është ngritur asnjëherë procedurë disiplinore. Dokumenti që zbardhi Alsat-M, qartë flet se si ndaj Trifunovskit në dhjetor të 2008 është ngritur kallëzim penal, për rrezikim me armë zjarri. Bedri Rexhallari