Agjencia e lajmeve INA ka mësuar se në pranga janë rreth tetë persona, të komunitetit maqedonas, të cilët po mbahen në pyetje në stacionet policore në Shkup

Rreth tetë huliganë maqedonas janë arrestuar sot pasdite nga ana e organeve policore, të cilët rrahën mbrëmë brutalisht nxënësit shqiptarë në Shkup.

Agjencia e lajmeve INA ka mësuar se në pranga janë rreth tetë persona, të komunitetit maqedonas, të cilët po mbahen në pyetje në stacionet policore në Shkup dhe se po vijojnë hetimet për zbardhjen e plotë të sulmit brutal ndaj nxënësve shqiptarë të fshatrave të Karshiakës që ndodhi mbrëmë në autobusin e linjës Shkup - Çiflik.

Familjarët e nxënësve të rrahur kanë theksuar se kanë marrë informatat lidhur me arrestimin e dhunuesve dhe se atyre i është konfirmuar kjo edhe nga ana e MPB, e cila ka thirrur disa nga nxënësit për ti identifikuar huliganët maqedonas.

"Ne jemi thirrur në stacionin policor në Shkup dhe janë identifikuar disa nga dhunuesit", theksoi për INA, një nga prindërit e fëmijëve të rrahur.

Ndërkohë, edhe sekretari i përgjithshëm i BDI-së, Abdilaqim Ademi ka konfirmuar arrestimet për RTK, duke shtuar se janë arrestuar disa nga personat e involvuar në incidentin brutal. "Disa nga personat janë kapur dhe kanë pranuar se ishin përfshirë në rrahjen brutale të nxënësve shqiptarë. Hetimet po vijojnë dhe ne garantojmë shqiptarët se institucionet po kryejnë detyrën për të zbardhur incidentin dhe të marin dënimin e merituar", theksoi në një intervistë për RTK, ministri i Ekologjisë i Maqedonisë, Abdilaqim Ademi.

MPB për shkak të hetimeve ka bërë të ditur se akoma nuk mund të jap detaje lidhur me arrestimet dhe se së shpejti do të zbardh tërë ngjarjen.

Në incidentin e ndodhur mbrëmë në lagjen Kisella Vodë të Shkupit, mbi 20 persona të maskuar kanë ndërhyrë në një nga autobusët urban, duke ushtruar dhunë ndaj 15 nxënësve shqiptarë, pesë prej të cilëve janë në gjendje të rëndë shëndetësore. (INA)




11: 45 - Pesë nxënës shqiptarë të rrahur mbrëmë nga persona të maskuar në lagjen Kisella Vodë të Shkupit janë në gjendje të rëndë shëndetësore.

Nxënësit e rrahur brutalisht sot në Spitalin e Qytetit në Shkup kanë rrëfyer për agjencinë e lajmeve INA tmerrin dhe dhunën që kanë përjetuar mbrëmë në autobusin e linjës Shkup - Çiflik.

Në gjendje më të rëndë kome është nxënësja Amire Sulejmani, 17 vjeç, e cila është rrahur gjithashtu brutalisht dhe ka marrë goditje të rënda në stomak dhe krahëror.

Të plagosurit e tjerë në gjendje të rëndë shëndetësore dhe me trauma janë edhe Suat Iljazi, Xhemajl Ademi, Elham Jahiu, Sheval Sulejmani nga shkolla e mesme Zef Lush Marku.

"Derisa po udhëtonim drejt fshatit tonë Çiflik të Karshiakës rreth orës 19.50 në një stacion kur ka ndalu autobusi kanë hyrë mbi 30 persona të maskuar me mjete të rënda dhe që kanë nisur të godasin dhunshëm të gjithë neve që ishim nxënës. Ne i kuptuam se bëhet fjalë për huliganë maqedonas dhe ata godisnin pamëshirshëm dhe është për çudi se si na kanë goditur vetëm neve që ishim shqiptarë. Pas dy minutave kam humbur vetëdijen dhe nuk mbaj mend më çfarë ka ndodhur ", theksoi në gjendje të traumatizuar Sheval Sulejmani.

Sipas nxënësve dëshmitarë, më shumë se 20 persona të maskuar kanë hyrë në autobus të pajisur me shufra druri, gome dhe mjete tjera të hekurit. Ata theksuan se për çudi personat e maskuar kanë rrahur vetëm shqiptarët që ishin në autobusë, ndërsa disa udhëtarë maqedonas as që janë prekur.

Siç bëhet e ditur, vajza e sulmuar rëndë, Amire Sulejmani kohë më parë ka pasur një ndërhyrje mjekësore përmes operacionit dhe se dhuna e ushtruar i ka përkeqësuar gjendjen e saj shëndetësore.

Arif Sulejmani, prindër i fëmijëve të rrahur theksoi për agjencinë e lajmeve INA se kjo është një katastrofë dhe tmerrë që i ka ndodhur fëmijëve të tyre, duke u kthyer nga shkolla. "Kjo është një politikë e madhe, që po ndodhë me neve. Këto janë punë të kurdisura dhe procese të montuara. Shteti duhet të marrë masa urgjente", theksoi Arif Sulejmani.

Stafi mjekësor i Spitalit të Qytetit ka theksuar se nga 15 të rrahurit, vetëm dy prej tyre sot pritet të lirohen për mjekim shtëpiak. Nxënësit e rrahur janë goditur nëpër stomak, krahë, krahëror dhe pjesë tjera të trupit. Policia ka mbërritur në vendin e ngjarjes vetëm pesë minuta pasi që kishte ndodhur incidenti. (S.Saqipi/INA)

01: 24 - Mbi 15 nxënës shqiptarë të fshatrave Çiflikë dhe Seta Petkë të Karshiakës janë rrahur mbrëmë brutalisht nga persona të maskuar në lagjen Kisella Vodë të Shkupit.

Nxënësit u sulmuan pas orës 19.30 derisa po udhëtonin me autobusin me numër 58 të linjës Shkup – Seta Petkë.

Nxënësit kanë rrëfyer edhe për INA se incidenti ka ndodhur në lagjen Kisella Vodë, kur rreth 20 persona me maska dhe shufra druri dhe hekuri kanë ndaluar autobusin që po transportonte nxënësit shqiptarë dhe i kanë rrahur brutalisht.

Sipas tyre ka qenë një natë e tmerrshme kur personat e maskuar kanë nisur të godasin me shufra në mënyrë brutale dhe më pas kanë ikur në drejtim të panjohur.

Nxënësit menjëherë janë dërguar në Spitalin e Qytetit në Shkup, ku siç mësohet tre nga 15 nxënësit kanë pësuar lëndime të rënda trupore, një prej të cilëve në gjendje kritike. Nxënësit janë shprehur të shqetësuar dhe traumatizuar lidhur me incidentin dhe dhunën e ushtruar ndaj tyre.

Dhjetëra prindër në mbrëmje ishin tubuar pranë Spitalit të Qytetit për tu njohur me gjendjen e fëmijëve të tyre. “Ne jemi tejmase të shqetësuar se çfarë po ndodhë në këtë vend. Si mund të sulmohen fëmijët në mënyrë aq mizore dhe brutale. Ku janë policët që po promovohen se do të jenë tani në çdo cep të kryeqytetit. Kërkojmë urgjentisht zbardhjen e këtij incidenti dhe kapjen e autorëve”, theksuan prindërit e revoltuar të nxënësve pranë Spitalit të Qytetit.

Forca policie kanë qëndruar pranë Spitalit të Qytetit, ndërsa për sot pritet edhe deklarimi i Ministrisë Punëve të Brendshme lidhur me incidentin. Komuna Kisella Vodë është e banuar etnikisht me maqedonas në dalje të Shkupit në pjesën që kufizohet me rajonin e Karshiakës, që banohet nga popullësia shumicë shqiptare. (S.S/INA)