Si kokrra e kafesë
Një vajzë shkoi tek e ëma dhe i tregoi për jetën e saj dhe sa të
vështira ishin gjërat për të. Ajo nuk dinte si t’i kapërcente
vështirësitë që po i ndodhnin, dhe kishte vendosur të dorëzohej. Ajo
ishte lodhur së luftuari dhe përpjekuri. Sapo zgjidhej njëri problem,
lindte një tjetër.
E ëma e mori në kuzhinë. Mbushi tre
tenxhere me ujë. Në të parën futi karota, në të dytën futi vezë dhe në
të tretën kokrra të bluara kafeje.
...
Ajo i vuri të zienin pa thënë asnjë fjalë. Pas 20 minutash e fiku
sobën. I nxori karotat dhe i futi në një tas, kështu bëri dhe me vezët,
pastaj nxori kafenë me lugë dhe e futi në një tas tjetër. Pastaj iu
kthye vajzës:
Çfarë sheh?
Karota, vezë dhe kafe, - u përgjigj ajo.
Ajo i tha të prekte karotat. Vajza i preku dhe vuri re se ishin të
buta. Pastaj e ëma i tha të merrte një vezë dhe ta thyente. Pasi hoqi
lëvozhgën, vajza vuri re vezën e zier. Në fund i tha të pinte pak kafe.
Vajza buzëqeshi, ndërsa shijoi aromën e kafesë. Pastaj ajo e pyeti: “Ku
do të dalësh, mama?”
E ëma i shpjegoi se secili prej sendeve
kishte kaluar të njëjtën gjë, ishin zier në ujë, por secili kishte
reaguar në mënyra të ndryshme. Karota nga e fortë, pasi u zie, u bë e
butë. Veza, para se të zihej, ishte e thyeshme dhe lëvozhga e saj e
hollë e mbronte lëngun që gjendej brenda. Por pasi u zie, pjesa e
brendshme u forcua. Megjithatë kokrrat e bluara të kafesë ishin unike.
Pasi u zien në ujë të nxehtë, ato ndryshuan ujin.
Si cila je ti? – e pyeti e ëma. - Kur të ndodh një fatkeqësi si reagon? Si karota, si veza apo si kokrra e kafesë?
Mendo: Po unë si jam? Jam si karota që duket e fortë, por nga dhimbja
dhe fatkeqësitë dobësohem dhe e humbas fuqinë? Jam si veza që e ka
zemrën e butë, por ndryshon nga nxehtësia? A e kisha shpirtin të
paqëndrueshëm, por pas një vdekjeje, një ndarjeje, një vështirësie
financiare apo një sprove tjetër, ai u forcua dhe u bë i ashpër? A
dukem njëlloj nga jashtë, por nga brenda jam i ashpër dhe zemra më
është ngurtësuar? Apo jam si kokrra e kafesë? Ajo e ndryshon ujin e
nxehtë, rrethanën që sjell dhimbjen. Kur uji nxehet, ajo lëshon aromë
të mirë. Nëse jeni si kokrra e kafesë, kur gjërat shkojnë shumë keq, ju
përmirësoheni dhe e ndryshoni situatën rreth jush. Kur kushtet janë
shumë të vështira, a ngriheni ju në një nivel tjetër? Si e përjetoni
fatkeqësinë? Si jeni ju: si karota, si veza, apo si kokrra e kafesë?