Pritja e Ramazanit

Falënderimi i qoftë Allahut të Lartësuar, Zotit të botëve, paqa mëshira dhe begatia e Allahut qoftë për të dërguarin tonë Muhamedin a.s. familjen dhe shokët e tij.
“O ju që besuat, agjërimi u është bërë obligim sikurse që ishte obligim edhe i atyre që ishin para jush, kështu që të bëheni të devotshëm” (Bekare: 183)
Cila është mënyra më e mirë për t’a pritur muajin e bekuar të Ramazanit?
Muslimani nuk duhet të pakësoj veprat në sezonën e devotshmërisë, por të jetë prej të parëve në vepra të mira dhe të garoj në to. Thotë Allahu i Lartësuar: “Dhe në këtë (vepra të mira) të bëjnë gara garuesit” El-Mutafifin 26.
Vëlla i dashur! Përkujdesu që të pritësh Ramazanin në këtë mënyrë:
1. Lutu që ta mundësoj Allahu të jetosh dhe të kesh shëndet në këtë muaj, që të jesh aktiv në ibadet ndaj Allahut, me agjërim, namaz, përkujtim të Allahut etj. transmeton Enes b. Malik r.a. se ka thënë: Muhamedi s.a.v.s. kur hynte muaji Rexhep thoshte: “O Allah! Na begato në muajin Rexheb dhe Sha’ban e na bëjë ta arrijmë Ramazanin”. transmeton Ahmedi dhe Taberaniu.
Të parët tanë gjithashtu e kanë lutur Allahun xh.sh. që ta arrijnë Ramazanin, pastaj e lusnin Atë që tua pranoj veprat. Kur hynte hëna e re e Ramazanit bënin këtë lutje: “Allahu Ekber (Allahu është më i Madhi). O Zot na bënë këtë muaj të kemi siguri, besim, paqe, Islam dhe na e prano e na e mundëso çdo vepër me të cilën Ti je i kënaqur!” Termidhiu, Darimiu.
2. Falëndero dhe lavdëro Allahun e Lartësuar, i cili na ka bërë ta arrijmë këtë muaj. Neveviu (allahu e mëshirofët) në librin “Lutjet” ka thënë: “Dije se është e preferuar për atë të cilit i përsëriten begatitë e hapta apo i largohen të ligat e hapta që të bëjë sexhde falënderimi ndaj Allahut të Lartësuar, dhe ta lavdëroj Atë ashtu si e meriton Ai”. Kështu që nga begatitë e mëdha të Allahut xh.sh. ndaj robit është mundësimi për të qenë i devotshëm dhe adhurues i Tij.
Ardhja e Ramazanit duke të gjetur me shëndet të mirë e meriton falënderim dhe madhërim Allahut xh.sh. që të ka begatuar me to. Falënderimi i takon Atij plotësisht ashtu si e meriton madhëria dhe pushteti i Tij.
3. Gëzimi dhe lumturia që ka ardhur ky muaj. Transmetohet se Muhamedi a.s. i ka përgëzuar shokët e tij me ardhjen e Ramazanit dhe thoshte: “U ka ardhur muaji Ramazan, muaj i begatshëm, ku në të Allahu obligoi agjërimin, në të hapen dyert e Xhenetit dhe mbyllen dyert e Xhehnemit”. Ahmedi
Gjeneratat e para janë gëzuar me ardhjen e Ramazanit, sezonës së bamirësisë.
4. Vendosja dhe planifikimi i më hershëm se si të përfitojmë në këtë muaj. Fatkeqësisht shumica e njerëzve, madje edhe të devotshmit, planifikojnë seriozisht për këtë botë, mirëpo pak prej tyre janë ata të cilët planifikojnë për botën tjetër. Kjo si pasojë e mos kuptimit të drejtë të qëllimit të besimtarit në këtë jetë duke harruar se ky është një rast i volitshëm i dhuruar nga Zoti që ta përmirësoj vetveten duke e përforcuar në këtë mision. Prej mënyrave të planifikimit për botën tjetër është planifikimi për shfrytëzimin e Ramazanit në ibadet (adhurim). Të ketë program konkret se si ti shfrytëzoj ditët dhe netët e tij në adhurim.
Në këtë fletushkë që keni në duart tuaja do të gjeni ndihmesë për shfrytëzimin e Ramazanit për ibadet.
5. Vendosja e një bese të sinqertë se do të shfrytëzosh dhe do të ngrihesh me vepra të mira, sepse kush është i sinqertë me Allahun e Lartësuar, Ai është i sinqertë me të duke e ndihmuar dhe lehtësuar rrugën e mirë. Thotë Allahu i Lartësuar.: “Sikur të ishin të sinqertë me Allahun do të ishte më mirë për ta” Muhammed, 21
6. Dituria dhe njohuritë e rregullave të Ramazanit. Muslimani obligohet ta adhuroj Allahun e Lartësuar me dituri dhe nuk i arsyetohet mos njohja e mënyrës së kryerjes së obligimeve të Allahut, në mesin e tyre edhe agjërimi i Ramazanit. Nevojitet që besimtari ti njoh rregullat e agjërimit para ardhjes së tij, në mënyrë që të jetë ibadet i rregullt dhe i pranuar. “Pyetni dijetarët nëse ju nuk dini” El Enbija:7
7. Kërkohet që ta presim atë me vendosmëri për tu larguar prej mëkateve dhe të këqijave me pendim të sinqertë. Largimi nga to dhe braktisja e tyre përfundimisht, sepse ky është muaj i pendimit, dhe nëse në të nuk arrijmë të pendohemi, atëherë kur? Thotë Allahu xh.sh.: “Pendohuni te Allahu të gjithë o ju besimtarë, nëse doni të shpëtoni” Nur, 31.
8. Përgatitja psikike dhe shpirtërore duke lexuar libra të ndryshme dhe duke dëgjuar ligjërata e mësime, të cilat e qartësojnë vlerën dhe rregullat e këtij muaji. Kjo bënë përgatitjen psikike për ibadet në të. Muhamedi a.s. i përgatiste psiqikisht shokët e tij për të pritur Ramazanin, duke ju thënë në ditën e fundit të muajit Sha’ban: “ Ju ka ardh juve muaji Ramazan…” Ahmedi dhe Nesaiu.
9. Përgatitja e mirë për këshillim të njerëzve përmes:
a) Thirrjes në të mirë dhe largimit nga e keqja.
b) Këshillës.
c) Ligjëratës.
10. Ta presim Ramazanin duke e hapur një faqe të re dhe të ndritshme me:
a) Allahun xh.sh. duke u penduar sinqerisht
b) Pejgamberin s.a.v.s, veprimin e asaj që na ka lënë porosi dhe largimin nga ajo që na e ka tërhequr vërejtjen.
c) Prindërit dhe të afërmit, farefisin, gruan, fëmijët me sjellje të mira dhe forcim lidhjesh.
d) Shoqërinë në të cilën jetojmë, që të jemi njerëz të dobishëm dhe të drejtë, ashtu si porositi Pejgamberi ynë s.a.v.s: “Më i miri prej jush është më bamirësi ndaj njerëzve”