Raportohet se ushtria turke ka goditur caqe të ushtrisë siriane në përgjigje të bombës që la të vdekur pesë civilë turqë.
Mediat citojnë një deklaratë që është lëshuar nga zyra e kryeministrit turk, Tayyip Erdogan për këtë informacion.
“Forcat tona të armatosura, janë përgjigjur menjëherë ndaj sulmit që ndodhi, duke goditur caqet brenda Sirisë”, citohet të ketë thënë Erdogan në deklaratën e tij nga Al Arabya.
Lajmin për sulmin e Turqisë ndaj Sirisë, e transmetojnë edhe mediat si BBC, NBC, etj.
Të paktën pesë persona mbetën të vrarë nga predhat që ranë në qytetin kufitar Akçkale. Sipas BBC-së, nga ky sulm u vranë edhe tre fëmijë.
Më herët, Sekretari i Përgjithshëm i Kombeve të Bashkuara, Ban Ki-moon ka kërkuar nga Turqia që t’i mbajë të gjitha kanalet e komunikimit hapur me Sirinë, në mënyrë që të shmangen tensionet në rritje ndërmjet këtyre dy vendeve fqinje, pas shpërthimit të një predhe të lëshuar nga Siria në tokën turke, e cila la të vrarë të paktën pesë persona.
Ministri turk i Punëve të Jashtme, Ahmet Davutoglu e njoftoi Banin për incidentin nëpërmjet një thirrje telefonike./Indeksonline/
Thu 23 Mar 2023 - 2:31 nga 
