SHBA dhe paragjykimet për myslimanët

Për të hedhur dritë mbi këtë grup fetar dhe për të luftuar mosbesimin reciprok, profesori i Universitetit amerikan, Akbar Ahmed, dhe ekipi i tij i studiuesve të rinj shkuan në mbi 75 qytete amerikane dhe realizuan një dokumentar të quajtur “Udhëtim në Amerikë”.

Në SHBA jetojnë rreth 7 milionë myslimanë. Por, për shumë amerikanë, islamizmi është i lidhur me ekstremistë si Osama bin Ladeni. Për të hedhur dritë mbi këtë grup fetar dhe për të luftuar mosbesimin reciprok, profesori i Universitetit amerikan, Akbar Ahmed, dhe ekipi i tij i studiuesve të rinj shkuan në mbi 75 qytete amerikane dhe realizuan një dokumentar të quajtur “Udhëtim në Amerikë”.

Deklarata të tilla e nxitën profesorin Akbar Ahmed dhe ekipin e tij të studiuesve që të realizonte një dokumentar rreth dy temave: Çdo të thotë të jesh mysliman në Amerikë, sidomos pas sulmeve të 11 shtatorit 2001?

“Nuk duhet harruar se para 11 shtatorit, ata vinin këtu dhe e konsideronin vendin më të mirë për të jetuar për një mysliman. Pas 11 shtatorit ata përballen me shumë sfida”, thotë Akbar Ahmed.

“Më pështynin. Disa njerëz më thoshin të hiqja perçen për siguri. Unë kundërshtova, sepse më dukej sikur do të dorëzohesha”, thotë Khadija Rivera, besimtare myslimane.
Profesor Ahmed mendon se “Udhëtim në Amerikë” nxori në pah se shumë amerikanë nuk kanë informacionin e duhur për islamizmin.

“Shumë mendonin se islami predikonte dhunën përmes Kuranit. Shumë mendojnë se islami shtyp gratë dhe i trajton ato shumë keq”, thotë ai.

Dokumentari prezanton gra myslimane në Amerikë për të treguar se stereotipat janë të gabuara.

Hailey Woldt është një nga kërkueset e dokumentarit. Ajo donte të shihte se si amerikanët në një qytet të vogël në jug do të reagonin ndaj një gruaje të mbuluar. Kështu ajo u vesh me një abaja dhe shkoi në një restorant.

“Kur unë hyra, të gjithë i kthyen sytë nga unë, ulën pirunjtë, mbajtën gojën hapur dhe për një minutë nuk folën, por pas pak vazhduan të hanin normalisht”, theksoi Woldt.

Ajo thotë se përveç reagimit fillestar, puna me dokumentarin e bindi se myslimanët në Amerikë po përputhen mirë.

“Ata thjesht duhet të komunikojnë idenë se islami është pjesë e Amerikës dhe se ata po sjellin diçka, po i shtojnë diçka kulturës amerikane”, shtoi ajo.

Në varrezat kombëtare në Arlington të Virginias, ku varrosen ushtarët amerikanë, ekipi mori pamje nga varret e myslimanëve amerikanë për të treguar se ata kanë sakrifikuar jetën e tyre për vendin.

Ata xhiruan myslimanë në Dearborn të Miçiganit, myslimanë në xhaminë më të vjetër të Amerikës në Cedar Rapids të Iowa-s dhe një qendër shiite në New York.

Ata intervistuan myslimanë amerikanë që po jetojnë ëndrrën amerikane, si Munir Chaudry, që shkoi në Amerikë në vitin 1971 me 100 dollarë në xhep dhe tani ka një kompani të vetën dhe punëson njerëz në fabrikën e tij në Çikago.

“Punëtorë të fabrikës si edhe departamenti i mekanikës, transportit, gjithkush që ka kualifikimet e nevojshme mund të ecë përpara dhe të marrë pozicione drejtuese”, thekson Chaundry.

Ahmed mendon se integrimi i myslimanëve në Amerikë është mishërim i idesë së baballarëve të kombit.

“Një statujë e Jeffersonit në Universitetin e Virginias ka një pllakë ku shkruhet: ‘Liria fetare 1786: Zoti, jehovai, Brahma, Allahu.’ Po ta mendosh, Jeffersoni kishte një kopje të Kuranit dhe i mirëpret besimtarët e Allahut”, tha Ahmed.

Në Statujën e Lirisë, porta simbolike e Amerikës, ekipi i dokumentarit arrin në përfundimin se SHBA-ja duhet ta rigjallërojnë parimin e pluralizmit, duke integruar myslimanët e Amerikës. (VOA)

http://albeu.com/bota/shba-dhe-paragjykimet-per-myslimanet/21627/