Beshar Esed: Nëse populli nuk më do, unë do të jap dorëheqjen

Tre muaj pasi kanë shpërthyer protestat që kërkojnë liri dhe demokraci në Siri, ku kanë mbetur të vrarë mbi një mijë qytetarë, presidenti sirian Beshar Esed, gjatë një takimi me përfaqësues të popullt tha:”Unë do të jap dorëheqjen nga posti që mbaj dhe do kthehem në shtëpinë ku jam lindur, nëse populli nuk më do.”

Përfaqësuesit nga populli, shfrytëzuan këtë takim me presidentin për ti shprehur shqetësimin e tyre lidhur me dhunën e ushtruar nga forcat e rendit ndaj protestuesve. Presidenti u tha se përdorimi i armëve të zjarrit ndaj qytetarëve protestues ishte një gabim i pafalshëm dhe se kushdo që njihte ndonjë nga forcat e rendit që ka hapur zjarr ndaj protestuesve, ta deklarojë për ta çuar për ndjekje penale. Ai tha se keqtrajtimi i të arrestuarve dhe torturimi i tyre është e papranueshme, por që ka të bëjë me mentalitetin e vjetruar të forcave të rendit.

Sipas tij, nevoja për më shumë liri dhe dinjitet, është më e madhe sesa nevoja për bukë. Përfaqësuesit e popullit kritikuan regjimin për dhunën e ushtruar ndaj popullsisë, ashtu bënë kritika lidhur me reformat e premtuara, të cilat e kanë humbur kredibilitetin në popull. Ata thanë se reformat ekonomike të ndërmarra këto dhjetë vite, kanë dështuar plotësisht./ardhmeriaonline/