Pas paralajmërimeve të kreut të Ministrisë së Transportit dhe Lidhjeve, Mile Janakievskit, se nuk do të amnistohen taksistët e palicencuar, janë kundërpërgjigjur këta të fundit. Janë gati për t'i ndërmarrë të gjitha masat për të mos u bllokuar automjetet e tyre dhe për të vazhduar punën. Një pjesë e taksistëve të Tetovës, duke njoftuar se në asnjë moment nuk e kanë ndërprerë punën me furgonat, janë shprehur të gatshëm të përdorin edhe dhunën, siç thonë, për t'u mbrojtur nga inspektorët. Pa u frikësuar të dalin para mediave me emër e mbiemër, disa prej taksistëve kanë shprehur gatishmëri për t'u ballafaquar me çdo inspektor që do të tentonte t'i bllokonte furgonat, me të cilat, siç pohojnë ato, e sigurojnë bukën e gojës.

"Cilido inspektor që do të tentoj t'i bllokoj furgonat me të cilat ne sigurojmë bukën e gojës, do të hajë dajak. Shumë nga taksistët që punojnë në relacionin Tetovë-Shkup brenda furgonave mbajnë shkopinj bejsbolli dhe janë të gatshëm të njëjtat në çdo moment t'i përdorin kundër inspektorëve që do të tentonin t'i sekuestrojnë furgonat. Jemi të gatshëm t'i përdorim të gjitha mjetet e mundshme që t'i mbajmë furgonat dhe të vazhdojmë punën, sepse nuk kemi mënyrë tjetër për ta siguruar ekzistencën. Për mendimin tonë më mirë është që njeriu të rijë në burg sesa pa bukë", thotë Jusuf Ahmeti, një nga taksistët e Tetovës që punojnë pa licencë, puna e të cilëve u rrezikua me kontrollet e Inspektoratit të transportit, që janë duke u ndërmarrë dy javë me radhë. Megjithëse deklaratat e tilla dhe gatishmërisë për t'u ballafaquar me inspektorët, një pjesë e taksistëve të Tetovës nuk hezituan të flasin hapur, duke kërkuar kushte më të mira ose lehtësime gjatë marrjes së licencave. Sipas tyre, licencat janë shumë të shtrenjta, ndërsa kushtet që janë paraparë nga ana e organeve përkatëse nuk mund t'i plotësojë secili. Sipas të dhënave zyrtare, licenca kushton treqind euro, ndërsa një nga kushtet për ta fituar të njëjtën është posedimi i tre automjeteve të reja, që nga ana e taksistëve konsiderohet si një nga kushtet më të vështira për t'u plotësuar. Ndërkaq, Ministria e Transportit dhe Lidhjeve në bashkëpunim me Inspektoratin shtetëror të transportit dhe me asistencën e policisë, gjatë tre javëve të kaluara kanë konfiskuar 30 automjete, kryesisht të taksistëve nga Tetova dhe Kumanova, përfshirë minibusë, furgonë dhe vetura. Ministri i Transportit dhe Lidhjeve, Mile Janakievski, është shprehur se inspektorati do të vazhdojë kontrollet e rrepta.

"Rezultatet nga ky aksion janë më të mira se ato që i kishim pritur. Shitja e biletave në të gjitha qytetet është rritur për disa herë. Në këtë mënyrë transportuesve me licenca u është rritur numri i udhëtarëve, që do të thotë se në buxhet janë siguruar më shumë të ardhura", tha Janakieski. Ai paralajmëroi se do të vazhdoj sanksionimi i transportuesve pa licenca, por edhe bllokimi i automjeteve të tyre. (I.I./KOHA)