Lajmet Ditore

Luani sulmon trajnuesin në cirk



Shfaqja e cirkut në Lviv të Ukrainës është shndërruar në horror për spektatorët. Një luan tamer është nervozuar duke sulmuar trajnuesin, ndërkohë që situata degjeneroi më keq, kur një tjetër luan u hodh në sulm gjithashtu. Videoja, e filmuar gjatë shfaqjes nga një turist amerikan, tregon luanin që hungërin fuqishëm, si dhe hedhjen e luanit të dytë në sulm. Menjëherë ndërhynë edhe persona të tjerë, ndihmës në skenë. Trajneri u rrëzua në tokë, ndërkohë që luanët ishin gati ta ndanin në copa. Pati një moment kur njëri prej luanëve u hodh mbi rrjetën që ndante spektatorët, duke dashur të sulmonte turmën. Pas largimit të luanëve, burri u dërgua në spital për t’iu nënshtruar ndërhyrjes kirurgjikale urgjente, dhe sipas mjekëve, gjendja e tij shëndetësore është e qëndrueshme. Pas incidentit, spektatorët braktisën shfaqjen, ndërkohë që fëmijët e traumatizuar thoshin se kurrë nuk do të shkelnin më në cirk. Alsat-M

Një pjesë e mediave të sotme amerikane thonë se Uashingtoni është duke u përpjekur për të gjetur mënyra t'i shpëtoj bisedimet e përtërira të paqes midis Izraelit dhe palestinezëve, ku pas moratoriumit dhjetëmujor, izraelitët vazhduan me ndërtimin e vendbanimeve në territoret e diskutueshme. Burime amerikane, izraelite dhe palestineze njoftojnë se në rrjedhë janë negociata intensive për të kapërcyer tensionet para mbajtjes së takimit të Ligës Arabe këtë javë. Presidenti palestinez Mahmud Abbas njoftoi se në takim do të marrë vendimin nëse do të qëndrojë apo do të largohet nga bisedimet.
"I dhamë një shans procesit të paqes në bashkëpunim me bashkësinë ndërkombëtare, por për fat të keq qeveria e Izraelit në vend të paqes, vendosi ndërtimin e vendbanimeve. Për këtë arsye ajo do ta mbaj përgjegjësinë për ngrirjen e procesit të paqes.", fajsoi Saeb Erekat, kryenegociator palestinez.
"Vendimin më të vështirë që ne kishim marr ishte ndalimi i ndërtimeve në Jude dhe Samari për një periudhë prej 10 muajsh. Ardhacakët në Jude dhe Samari janë nën sulme të padrejta gati gjysmë shekulli. Meritojnë të jetojnë një jetë normale si gjithë të tjerët dhe në këtë drejtim është politika jonë.", thotë Benjamin Netanjahu, kryeministër i Izraelit. Alsat-M

Presidenti i Francës, Nicola Sarkozi planifikon të paraqesë një plan për thellimin e bashkëpunimit të Bashkimit Evropian me Rusinë në fushat e ekonomisë dhe të sigurisë. Sipas gazetës ruse Gazeta Nezavisimaja, kjo duhet të ndodhë në takimin francezo-ruso-gjerman në Francë të caktuar për datën 18 dhe 19 të këtij muaji. Në Rusi e mirëpresin iniciativën e Parisit zyrtar. Ideja konsiston krijimin e një plani të përgjithshëm për bashkëpunim që është menduar ta afron Rusinë me Bashkimin Evropian, por pa përfshirë NATO-n. Ky propozim i Sarkozit, sipas gazetës moskovike ka shkaktuar pakënaqësi në Uashington. Alsat-M

Ministri i Mbrojtjes Zoran Konjanovski në takim me homologun e tij amerikan Robert Gejts në Uashington, kërkoi që vendi të anëtarësohet në NATO nën referencën e përkohshme të Kombeve të Bashkuara, përkatësisht si “Ish Republika Jugosllave e Maqedonisë". Konjanovski, sekretarit të mbrojtjes të SHBA-ve i ka thënë se pas 18 viteve bisedime për zgjidhjen e çështjes së emrit, ende nuk ka rezultate, prandaj askush nuk mund të garantojë se për një ose dy vjet do të ketë zgjidhje. Sipas ministrit Konjanovski, ky është shkaku që Maqedonia duhet të pranohet në NATO nën referencën e përkohshme, ndërsa negociatat për emrin të vazhdojnë, meqë Athina ka marr obligimin se nuk do ta pengon anëtarësimin e vendit në organizatat ndërkombëtare, në qoftë se ato rrjedhin nën emrin i cili është pranuar në Kombet e Bashkuara. Alsat-M

970 hektarë tokë, pronë e banorëve të Koritës së Gostivarit, kalon në territor të Makedonski Brod. Por banorët e Koritës, edhe pse posedojnë fletë-pronësitë dhe hartat për tokat e blera nga shteti, nuk lejohen nga rojtari i pyllit të punojnë tokat e tyre, me pretekstin se këto nuk janë më tokat e tyre.
“Tokën na kanë marrë, ja ku është kufiri tek rruga, 100 metër prej saj. 970 hektarë. Tani s’mundemi të shkojmë rehat si në kohën e Jugosllavisë na zinin me dru e na çonin në Samokov. Tani na kërcënohen nuk na lënë. Rojtari i pyllit thotë se kjo është e jona. Ne u japim afat 15 që ta rregullojnë këtë dhe të na çojnë dokument, nëse nuk e rregullojnë, krejt banorët do vijmë këtu”, u shpreh Mahir Bekteshi, kryetar i Bashkësisë lokale të Korritës.
Banorët e Koritës kërcënojnë fillimisht me protesta me mjetet e tyre motorike.
“Pikësëpari, ne do kërkojmë ndihmën e pushtetit qendror dhe duhet t’a zgjedh sepse s’na ka mbetur gjë tjetër. Pjesën më të pasur na kanë marrë, na kanë lënë me të varfrën siç shihet”.
“Po do dalim, i madh e vogël.... ne këtu jemi rrit... ne për atë vend kemi luftuar që ta mbajmë për gjënë tonë, për idaren tonë dhe kemi arat tona aty, do bëjmë protestë jo 1 por 10 herë”.
Kryetari Komunës së Makedonski Brodit, Milosim Vojneski shprehet për Alsat-M, se kontesti nuk është me Komunën. Kjo nuk ka të bëjë aspak me nivelin lokal shprehet Vojneski.
“Jo, ajo nuk i takon pushtetit lokal por i është ndarë ndërmarrjes publike Jasen dhe Komuna jonë nuk ju bën asnjë lloj pengese”, tha Milosim Vojneski, kryetar i Komunës Makedonski Brod
Nga Ndërmarrja Publike ‘Pyjet e Maqedonisë’ njësia e Makedonski Brod, shprehen se rojtari nuk duhet t’ju bëj asnjë problem nëse ata me vete do posedonin fletë-pronësi dhe hartat apo tapitë për tokën që posedojnë. Bashkim Sulejmani

Sot bëhen dhjetë vjet nga protestat masive të përkrahësve të Opozitës Demokratike të Serbisë, pas së cilës u rrëzua nga pushteti Presidenti i atëhershëm i Republikës Federale të Jugosllavisë, Sllobodan Millosheviç. Protesta u organizua në qendër të Beogradit pasi Komisioni i zgjedhjeve Federale e kontestoi fitoren e kandidatit të Opozitës Demokratike të Serbisë, Vojisllav Koshtunica, në zgjedhjet e mbajtura më 24 shtator të vitit 2000. Edhe pse shumë burime jozyrtare pohuan se Koshtunica në raundin e parë, mundi Millosheviqin, komisioni tha se ai fitoi 49 për qind të votave dhe njoftoi për një raund të ri votimi. Pastaj menjëherë filluan trazirat civile që çuan në rrëzimin e regjimit një dekadësh të Milosheviqit i cili sundonte me Serbinë që nga viti 1989. Në trazirat humbën jetën dy persona. Alsat-M

Lideri i "Vetëvendosjes", Albin Kurti, të hënën, në Kaçanik, ka deklaruar se kjo lëvizje do jetë e gatshme për zgjedhjet e parakohshme në Kosovë. Në këtë rrafsh, ai nuk e ka përjashtuar mundësinë që pushteti aktual të bëj përpjekje për pjesëmarrjen e "Vetëvendosjes" në zgjedhjet parlamentare. "Sigurisht se regjimi në fuqi do të përpiqet të na pengojë në synimin tonë për ndryshime politike e shoqërore në Kosovë. Këta që e kanë vendosur politikën mbi institucionet..., nuk ka dyshim që mund të përdorin edhe masa arbitrare për të na vënë shumë pengesa. Ne mendojmë se nuk do ta kemi kollaj, por po ashtu mendojmë se çfarëdo pengesash të tilla nuk mund të jenë të pakapërcyeshme apo fatale për ne", ka deklaruar Kurti.
Këto komente ai i ka bërë në konferencë për shtyp, pas themelimit të Këshillit të Zhvillimit të Qendrës së "Vetëvendosjes" në Kaçanik, në përbëjen e të cilit janë emëruar 16 veta. Kurti ka nënvizuar se "Vetëvendosjea" do të jetë e hapur për të gjithë ata që duan t'i bashkohen kësaj lëvizjeje. "Ne mendojmë se lëvizja 'Vetevendosje' mund të luaj një rol të rëndësishëm në bashkimin e qytetarëve për ndryshime rrënjesore politike", ka nënvizuar Kurti.
Sipas tij, është hartuar statuti i "Vetëvendosjes", ndërsa aktualisht është duke u punuar për përpilimin e programit politik. "Ne mendojmë se është koha e fundit që në Kosovë të kemi ndryshime politike, shoqërore e ekonomike, sepse jemi të interesuar që zhgënjimi aktual t'ia lërë vendin një shprese të re dhe jo të degjenerojë në dëshpërim të përgjithshëm", ka theksuar lideri i "Vetëvendosjes", duke elaboruar arsyet e vendimit të marrë për të qenë pjesë e procesit elektoral. Kurti ka lënë kuptohet se nuk do të bëjë koalicion paraelektoral me partitë në pushtet. "Nuk kemi hapur diskutim të brendshëm për koalicione parazgjedhore.
Ai ka theksuar se "Vetëvendosje" do të angazhohet edhe për aktivizimin e mekanizmit të referendumit për çështjet që kanë të bëjnë me interesin e përgjithshëm të qytetarëve. Ai ka folur edhe për synimin e "Vetëvendosjes" për të promovuar qytetari aktive në Kosovë.
(m.a/kd/BalkanWeb)

Amerkano-pakistanezi që pranoi autorësinë për sulmin e dështuar me bombë në Tajms Skueër (Times Square) në Nju Jork del sot para gjyqit federal.
Faizal Shahzad ka pranuar përgjegjësinë për incidentin e 1 Majit të kaluar. Ai ishte stërvituar në kampet e militantëve në Dubai. Shahzad rrezikon të dënohet me burgim të përjetshëm. Evropa e Lire

Prindërit e nxënësve të shkollës fillore të fshatit Svillare nuk i besojnë premtimit të zëvendësministres së Arsimit, Lindita Qazimi se punimet për rindërtimin e objektit shkollor do të fillojë për 8 ditë. Ata së bashku me fëmijët e tyre, sot, për 2 orë bllokuan autostradën Shkup-Tetovë, afër Sarajit.
“Për 1 vit me rradhë, si nuk ju vie turp partive shqiptare politike që janë në qeveri dhe ato në opozitë, a nuk ju vie turp, ky popull i tyre të dalë në rrugë, ka 1 vitë që shkolla është djegur dhe ata nuk kanë ndërmarë asgjë".
“Është turp që fëmijët t’i lëmë këtu në këtë mot me shi, gjynah ndaj tyre. Kjo është turp për Gruevskin, Ali Ahmetin dhe për kryetarin e komunës së Sarajit Bexheti, sepse ka 1 vit që është djegur shkolla dhe nuk merr masa askush".
“Unë kisha apeluar kompetentët, sidomos komunës tonë dhe ministrin e Arsimit të marrin masa se përndryshe protesta do të vazhdojnë dhe do të bëhen më radikale.
Nga Këshilli Koordinues thonë se askush nuk i ka informaur se kur pritet nuk i të fillojë rindërltimi i shkollës së tyre. Ata thonë se informatat e vetme që kanë i dëgjojnë prej mediave.
“Ne sipas paralajmërimeve të televizionit tuaj ku thuhej se rindërtimi i shkollës fillon me datë 13 të këtij muaji, por ne si këshill morëm guximin që të dalim në protesta për arsye se besimi ka humbur dhe ne si këshill nuk kemi informata as prej Ministrit të arsimit, as zëvendësministres, e as prej kryetarit të komunës dhe neve nuk kemi se kujt t'i drejtohemi meqë informata nuk kemi prej askujt dhe ne informohemi vetëm prej mediave”, thotë Rauf Mustafa, Këshilli Koordinues, Svillare.
Dje në një deklaratë për ALSAT-M, zëvendësministrja e Arsimit Lindita Qazimi tha se ka përfunduar procesi i zgjedhjes së kompanisë që do të rindërtoj objektin shkollor kurse punimet do të fillojnë, pas një jave, pasi të kenë përfunduar afatet për ankesa.
Valmir Kuçi