Lajmet ditore

Takimet Gruevski-Papandreu janë të rëndësishëm dhe pozitive për vendin. Kështu u shpreh ambasadori i BE-së në Shkup, Ervan Fuere, duke komentuar takimin e fundit të dy kryeministrave në Bruksel. Sipas tij, Bashkimi Evropian ende shpreson në një zgjidhje të shpejt të kontestit rreth emrit.
“Mendoj që takimet janë të rëndësishme. Kjo thekson faktin se ka një dialog i bazuar në mirëbesim dhe sa më shumë dialog aq më shumë mirëbesim do të ketë. Sigurisht se ne shpresojmë që kjo do të rezultojë me një zgjidhje të shpejt. Të paktën ata u takuan dhe ranë dakord që të takoheshin sërish dhe kjo është ajo ku duhet fokusuar, sepse përbën një zhvillim pozitiv”, deklaroi Ervan Fuere, ambasador i BE-së në Shkup.
Ndërkaq sa i përket raportit të ardhshëm të KE-së për përparimin e Maqedonisë, Fuere ka theksuar se në të do të përfshihen përparimet dhe mangësitë për të cilat në të ardhmen qeveria duhet kushtuar më tepër vëmendje.
“Unë nuk mund të paragjykoj se çfarë do të jetë raporti. Mendoj se do të dalin në pah çështjet ku ka pasur arritje të mirëpritura, por po ashtu do të ketë edhe sfera ku ne do të piketojmë rezultatet e dobëta”, tha Ervan Fuere ambasador i BE-së në Shkup.
Administrata publike, reformat në gjyqësorë, sektori energjetik, implementimi i legjislaturës, dialogu politik, liria e mediave, si dhe implementimi i Marrëveshjes Kornizë të Ohrit, pritet të jenë vërejtjet kryesore për Maqedoninë në raportin e nëntorit. Gjyltene Rexhallari

"Në NATO dhe BE nuk mund të integrohet gjysma e Maqedonisë, apo vetëm shqiptarët. Ne nuk duam të jemi faktor që nxit qytetarët dhe që krijon hendeqe midis dy etniteteve më të mëdha, etnitetit maqedonas dhe atij shqiptar", deklaroi kryetari i BDI-së Ali Ahmeti në intervistën javore për Radion Evropa e Lirë. Sipas tij çështja e integrimit të Maqedonisë në NATO dhe BE, zgjidhja e kontestit të Maqedonisë me Greqinë për çështjen e emrit, nuk janë çështje që i takojnë ose stagnojnë vetëm një etniteti, por procese ku të gjithë duhet t`i bartin përgjegjësitë.
“Çështja e integrimit të Maqedonisë në NATO dhe BE, zgjidhja e kontestit të Maqedonisë me Greqinë për çështjen e emrit, nuk janë çështje që i takojnë ose stagnojnë vetëm një etnitet - vetëm shqiptarët apo vetëm maqedonasit. Proceset integruese paraqesin procese ku të gjithë duhet t`i bartin përgjegjësitë. Në NATO dhe BE nuk mund të integrohet gjysma e Maqedonisë, apo vetëm shqiptarët. Ne nuk duam të jemi faktor që nxit qytetarët dhe që krijon hendeqe midis dy etniteteve më të mëdha, etnitetit maqedonas dhe atij shqiptar”, deklaroi Ali Ahmeti, kryetar i BDI-së. Alsat-M

Më 28 nëntor, ditën e flamurit shqiptar lëvizja qytetare “Zgjohu” fton gjithë qytetarët në një protestë para qeverisë për të demonstruar vullnetin e popullit shqiptar në Maqedoni për integrim në NATO dhe BE. Sipas “Zgjohu” kjo vjen si rezultat i paralajmërimeve për një raport të KE-së pa datë për fillimin e negociatave si dhe Samit të NATO-s pa ftesë për anëtarësim.
“Lëvizja ‘Zgjohu’ konsideron që mungon vullneti politik i qeverisë së Maqedonisë në veçanti të VMRO-DPMNE-së për integrim të shtetit në NATO dhe BE. Shqiptarët janë lodhur nga kjo shtyrje dhe shqiptarët kërkojnë që t’ju bashkëngjiten shqiptarëve dhe Tiranës në Bruksel, sot flamuri jonë valon në Bruksel kurse ne mbesim të izoluar në këtë shtet ku jemi për shkak të mungesës së vullnetit politik të VMRO-DPMNE-s, andaj lëvizja qytetare Zgjohu fton të gjithë qytetarët që më 28 nëntor në ditën kur ky flamur i cili sot valon në Bruksel dhe ne e festojmë të demonstrojmë vullnetin e madh të shqiptarëve që të ecim në Bruksel dhe t’i bashkë-ngjitemi Shqipërisë si dhe 26 shteteve tjera që sot janë anëtare të aleancës më të fuqishme botërore të NATO-së”, deklaroi Artan Grubi, lëvizja ‘Zgjohu’.
Prej sot lëvizja qytetare “ Zgjohu” me logo të re dhe strategji veprimi. Përveç aktiviteteve të rregullta si dita e plisit, përvjetori i vdekjes së Skënderbeut, ata do të monitorojnë edhe procesin e regjistrimit të popullatës në prill të vitit të ardhshëm në përpjekje për të parandaluar keqpërdorimet eventuale. Po ashtu “Zgjohu” do të realizojë projektin “Së bashku” të financuar nga UNDP i cili ka për qëllim adresimin e problemeve mes nxënësve shqiptar dhe maqedonas në shkollat e mesme. Ndërsa nga java e ardhshme lëvizja qytetare “Zgjohu” do të veprojë edhe në Prishtinë ndërsa pritet që së shpejti të zgjerohet edhe në Tiranë. Në Prishtinë “Zgjohu” do të organizojë debate me tema që shqetësojnë shqiptarët në Prishtinë, Tiranë e Shkup, ndërsa do të bëj edhe monitorimin e zgjedhjeve në Kosovë si dhe do të realizojë anketë për besueshmërinë e partive politike dhe politikanëve kosovar. Gjyltene Rexhallari

Financat janë problemi kryesor me të cilin përballen subjektet politike jo-parlamentare. Veprimi dhe ndikimi i partive të vogla në Maqedoni është i zbehtë për shkak edhe të sistemit të tillë politik të Maqedonisë. Hysni Shaqiri, kryetar i BDK-së deklaron se termi ‘parti të vogla, parti të mëdha’ nuk duhet të ekzistojë, por mund të quhen vetëm parti fituese të zgjedhjeve, ose jo fituese.
“Ne jemi një parti që ballafaqohemi edhe me financa, pikërisht në këtë drejtim kemi edhe problemin kryesor. Tash ajo është problem që ne duhet të gjejmë formë dhe ta tejkalojmë për të qenë sa më aktiv dhe për të qenë sa më prezent dhe të pranishëm në popullatë. Ne si BDK jemi të pranishëm sepse ka nevojë popullata për një koncept të ri siç e kemi ne, ka nevojë popullata për një angazhim të mirëfilltë dhe serioz, a në këtë drejtim BDK-ja nuk mungon, nuk mungon ajo që quhet koncept i ri i rregullimit të brendshme të shtetit dhe ndryshimeve që kanë të bëjnë me statusin juridiko-kushtetuese të shqiptarëve”, deklaroi Hisni Shaqiri, kryetar i BDK-së.
Ndërkohë analistit Rizvan Sulejmani thekson se është pikërisht Ligji për zgjedhje ai i cili nuk iu mundëson partive të vogla që të përfaqësohen në institucionin ligjvënës. Një pjesë të fajit, duhet ta ndajë edhe media që nuk iu jep hapësirë të mjaftueshme subjekteve politike jo-parlamentare.
“Partitë e vogla dhe idetë që shfaqen qoftë nëpërmjet partive të vogla, qoftë nëpërmjet organizatave joqeveritare, intelektual të pavarur është shumë rëndë të depërtojnë nëse nuk ka paraprakisht ndonjë konsensus më serioz në opinion se megjithatë duhet ndonjëherë të vlerësohen edhe idetë, jo vetëm sasia e informatës dhe nga kush vjen informata. Por është shumë me rëndësi se çfarë është ideja dhe jo nga kush. Këtu tek ne zakonisht vlen një e thanun ‘Ideja mund të jetë shumë e mirë, por nëse vjen prej njeriut të vogël ajo nuk ka vlerë”, tha Rizvan Sulejmani, analist politik.
Në Maqedoni elektorati njeh vetëm subjektet politike më të mëdha. Ky fenomen është prezent si në bllokun politik maqedonas ashtu edhe atë shqiptar. Gjithnjë në zgjedhje lufta zhvillohet mes partive të mëdha, ndërsa të voglat mund ta gjejnë veten, vetëm përmes koalicioneve me subjektet e mëdha. Bedri Rexhallari

Marrin fund pritjet e gjata që shpeshherë i kalonin edhe 2 vjet për të nxjerr një pasaportë të re biometrike me procedurë të rregullt. Radhët e gjata dhe polemikat e qytetarëve para sporteleve, i përkasin të kaluarës, deklarojnë nga Ministria e Brendshme. Nëse telefononi tani në numrin pa pagesë 0800 192 92 dhe kërkoni që t’ju caktojnë një orar për pasaportë, atëherë do t’ju përgjigjen se mundësia e radhës, është në muajin mars të 2011-ës.
Mirdita, më falni, cili është termini më i lirë për të caktuar për pasaportë me procedurë të rregullt?
A keni caktuar deri tani?
Jo, por dëshirojmë ta caktojmë.
1 mars.
1 mars 2011 apo 2012?
1 mars 2011.
Faleminderit, gjithë të mirat.
Të njëjtën gjë, e konfirmon për ALSAT M edhe zëdhënësi i MPB-së Ivo Kotevski. Ai sqaron se afatet që ishin caktuar për në fund të vitit 2011 e madje edhe vitin 2012, do të ndryshohen dhe do të ri-caktohen për në muajt e parë të vitit 2011.
“Është krijuar hapësirë në këtë periudhë që të bëhet ndryshimi i afateve të dhëna për aplikim për dokumente udhëtimi, dhe sigurisht shumë shpejt nga “Call Center” do të fillojë procesi i lajmërimit të qytetarëve që kanë marrë termin për aplikim për dokument udhëtimi. Operatorët do t’u telefonojnë qytetarët dhe do t’u ofrojnë afate shumë më të afërta për aplikim për pasaportë. Pikërisht ato afate që janë caktuar për vitin 2012 të ndryshohen dhe të ri-caktohen për në fund të muajit shkurt ose eventualisht mars të vitit 2011” Ivo Kotevski, zëdhënës i MPB-së
Kotevski tha gjithashtu se e vlefshme ende do të jetë procedura e përshpejtuar për qytetarët që duan ta marrin pasaportën brenda disa ditëve. Sipas të dhënave të Ministrisë së Brendshme, rreth 1 milionë pasaporta biometrikë iu janë dorëzuar qytetarëve në 4 vitet e fundit, ndërkohë që fluksi më i madh i kërkesave për pasaporta, u shënua menjëherë pas liberalizimit të vizave për Maqedoninë. Melihate Rustemi

Ideja që krahas grave, edhe burrat të mund të marrin pushim të lindjes, shumë shpejt pritet që të shndërrohet në ligj. Baballarët në të ardhmen janë në disponim që për dy muaj të marrin rolin i cili deri më tani me ligj ishte i rezervuar vetëm për nënat. Buxheti i Fondit për pushime sivjet ka kapur shifrën prej 2 miliardë denarë, gjegjësisht 400 milion më shumë se vitin e kaluar. Nga atje thonë se Qeveria duhet edhe më shumë të zgjidh qesen, nëse dëshiron që edhe burrave t’ua sigurojnë këtë të drejtë, e cila është normale në disa vende evropiane.
“Tani në modë është që gratë të punojnë kurse burrat janë në shtëpi kështu që mundet edhe pushim të lindjes. Kur më rijnë në shtëpi munden edhe të ruajnë fëmijë, kjo është normale”.
“Pse jo, kjo është zgjidhje nga e cila mund të fitojnë të papunësuarit dhe normalisht me këtë ti përzënë gratë të cilat janë të punësuara apo kanë probleme me punëdhënësit për shembull”.
“Pse jo, në shtetet e jashtme është kështu”.
“Kjo më pëlqen, e vetmja gjë që më pëlqen nga Qeveria. Ky propozim është super”
Këto reagime sikur e frikësuan shtetin. Ministria për punë dhe politikë sociale, nga ku edhe erdhi ideja, shpejtoi të informojë se për disa lloje të sëmundjeve këtë vit nuk ka të holla, kurse nuk dihet a do të ketë edhe në të ardhmen. Qëndrim të ngjashëm ka edhe institucioni i cili duhet ti paguajë të hollat.
“Nga viti 2006 deri më sot numri i përgjithshëm i pushimeve është rritur për dy herë e gjysmë, thonë nga Fondi i shëndetësisë. Kjo sipas tyre e bën këtë ide e cila është e pranueshme për qytetarët të jetë e pamundshme për buxhetin e Fondit”.
Dhe përderisa në Maqedoni debatohet për mundësinë që burrat për herë të parë të marrin të drejtën për pushim të paguar prej 8 javësh për të ruajtur fëmijët, deputetët e Parlamentarit Evropian nuk janë të kënaqur me 14 javët e garantuara nga ana e tyre. Para disa ditëve, ata propozuan që burrat nga BE-ja të kenë të drejtë për së paku 20 javë pushim të lindjes. Jane Dimevski

Nga një atentat vetëvrasës në Stamboll, sipas agjencive të lajmeve, janë plagosur së paku 22 vetë. Objektivi i atentatit në qendër të qytetit ka qenë një automjet i policisë, njofton stacioni turk NTV. Atentatori vetëvrasës është përpjekur të hyjë në autobusin e policisë, që kishte parkuar në sheshin Taksim. Në Turqi separatistë kurdë kanë kryer kohët e fundit një serë aktesh dhune. Por edhe ekstremistët e majtë dhe islamistët kanë vendosur bomba këtu në të kaluarën. Alsat-M

Kaos në shëndetësi. Ndërsa, paralajmërohen reforma të mëdha, objekte të shtrenjta, kujdes shëndetësor për të gjithë... nga e gjithë kjo, tani për tani, ka pak realizime. Shembulli më i mirë se si funksionon sistemi shëndetësor është ambulanca në fshatin Kopanicë. Objekt të ri ka, por pajisje dhe mjek nuk ka. Nga Ministria mbetet vetëm premtimi për zgjidhjen e problemit. Banorët e fshatit akuzojnë se politika është përfshirë në problematikë, prandaj dhe nuk ka mjek. Për këtë temë, por edhe për atë se a do të shtrenjtohen ilaçet dhe a është Fondi shëndetësor para falimentimit, më gjerësisht në emisionin e sotëm “Magazina ekonomike”, i cili emitohet menjëherë pas këtij edicioni të lajmeve.
“Atë ditë kur e mbajtëm protestën para dy jave, ministri tha se pas dy jave do të vijnë edhe pajisjet dhe mjeku dhe ambulanca do të funksionojë. Mirëpo nuk ka asgjë nga ajo. Njëherësh i apelojmë ministrit i cili është edhe bashkëfshatar i joni se duhet të kujdeset dhe ta shohë gjendjen në fshatin tonë “, tha Gamend Aliu, banorë i fshatit Kopanicë
“Thonë se numri i kartonëve duhet të jetë më i madh se sa duhet të jetë përafërsisht? Këtu ka 350 shtëpi dhe unë mendoj se mjafton, por tash varet se kush si është i lidhur me Qeverinë edhe e merr punën. Në qoftë se është i lidhur me partitë atëherë mund të fitoje diçka”, u shpreh një banorë i fshatit Kopanicë. Alsat-M