Kryeministri turk, Recep Tayyip Erdogan, u ka bërë thirrje të gjitha familjeve të shteteve të Ballkanit të kenë së paku nga tre fëmijë. Këtë porosi ai e ka bërë gjatë një fjalimi që ka mbajtur para liderëve të Ballkanit në Federatën e Asociacioneve Amerikane Ballkanike në New York, transmeton gazeta turke “Zaman” në versionin e saj në gjuhën angleze.

Erdogan ka theksuar se kështu Ballkani do të shndërrohet në një “fuqi dinamike dhe të re” të Evropës.

“Kam një këshillë për ju. Po iu bëj thirrje çifteve të martuara dhe atyre që e kanë ndërmend të martohen. Po jua kujtoj po ashtu edhe kryeministrave këtu: Së paku tre fëmijë”, ka thënë Erdogan në takimin e titulluar “Një vizion për një të ardhme të përbashkët” në Qendrën Javits.

Në këtë takim ishin të pranishëm edhe kryeministri i Kosovës, ai i Shqipërisë, Malit të Zi dhe i Maqedonisë.

Popullsia ka nisur të shënojë rënie në shtetet e Ballkanit, për shkak të vështirësive ekonomike. Një arsye tjetër është edhe numri i madh i familjeve që vendosin të migrojnë në vendet perëndimore me shpresë se do të kenë një jetë më të mirë.

Erdogan ka bërë thirrje të ngjashme edhe në vendin e tij, pasi ka shprehur drojën se popullsia turke do të shënojë një rënie nataliteti. Megjithatë, shumë kritikë turq kanë thënë se është e pavend t’u kërkohet familjeve të kenë më shumë fëmijë në kohën kur kriza ekonomike po godet xhepat e tyre.

Erdogan i ka porositur liderët e Ballkanit që të jenë syçelë ndaj ndryshimeve, sepse ndryshe do të përballen me trazira dhe kaos.

“Kur shikojmë zhvillimet në Afrikën Veriore dhe në Lindje të Mesme, në këtë kontekst ka njëfarë kuptimi”, ka thënë Erdogan. Ai më tej ka thënë se “shpresojmë se vëllezërit dhe motrat tona që jetojnë në Ballkan nuk do ta konsumojnë energjinë e tyre, por të punojnë për të ndërtuar një të ardhme të përbashkët më të ndritur”.