Nis punën Komisioni për xhaminë e madhe të Tiranës

Komisioni për ndërtimin e Xhamisë së Madhe, i iniciuar nga Bashkia e Tiranës dhe miratuar nga Këshilli Bashkiak, ka zhvilluar një mbledhje ku u vendos ngritja e një grupi pune, i cili do të përgatisë propozimet për vendimmarrjen në Komision, të cilat përfshijnë propozimin për vendin ku do të ngrihet Xhamia e Re, si do të veprohet për projektin e Xhamisë, nëse do të jetë ai i hartuar tashmë, do të përcaktohet një arkitekt për të bërë një projekt të ri apo do të bëhet konkurs për projektimin e këtij institucioni dhe pas kësaj menjëherë, aprovimi i termave të referencës.

Në fillim të takimit kryebashkiaku Lulzim Basha njoftoi se Këshilli Bashkiak ka miratuar ngritjen e një komisioni pune për ndërtimin e xhamisë së madhe të Tiranës, i cili ka kohë që diskuton dhe punon për këtë çështje. “Është e rëndësishme që ne së bashku të miratojmë një grup ekspertësh me synim kryesor që në këto 5 a 6 muaj të zgjidhim gjithë problematikën nëse ka, shpronësimet, etj.”, nënvizoi Basha.

Më poshtë z. Basha theksoi se është e rëndësishme të merren parasysh të gjitha kërkesat dhe sugjerimet nga të gjithë aktorët kryesorë si: Komuniteti Mysliman, Komiteti Shtetëror për Kultet, Instituti i Monumenteve të Kulturës si dhe Bashkia e Tiranës.

“Duhet të përcaktojmë vendndodhjen e saktë të xhamisë, projektin e xhamisë dhe hapjen e një konkursi për projektimin e këtij dhe pastaj vjen aprovimi. Ky proces duhet të mbyllet brenda muajit mars. Më 31 mars duhet të kemi përfunduar fazën e konsultimeve dhe diskutimeve dhe duhet të kemi një vendimmarrje në mënyrë që në prill ose maj të diskutohet apo të zgjidhet projekti për ndërtimin e xhamisë së madhe”, tha kryetari Basha.

Ndërkohë kreu i Komunitetit Mysliman të Shqipërisë, Haxhi Selim Muça, u shpreh i kënaqur që më në fund u bë ky takim dhe theksoi se është shumë e rëndësishme që të ndërtohet një xhami e madhe, multifunksionale në shërbim të besimtarëve dhe popullatës së kryeqytetit.

“Jam shumë i kënaqur që më në fund u arrit të mblidhet një komision i tillë për të diskutuar dhe për të marrë disa vendime lidhur me ndërtimin e xhamisë së madhe në kryeqytet, gjë që ne kemi kaq vjet që e kërkojmë. Unë mendoj se duhet të merremi me hartimin e projektit për ndërtimin e xhamisë së madhe, që duhet të jetë jo vetëm një objekt i madh dhe multifunksional, por edhe i kohës i ndërtuar sipas standardeve moderne. Me dy kate nën tokë, parking, dy kate lart, sallë qendrore për faljen, salla të tjera për konferenca e organizime fetare e kulturore. Shpresojmë, me lejen e të madhit Zot, të arrijmë të bëjmë një xhami të mirë”, u shpreh z. Muça.

Ndërkohë kryetari i Këshillit Bashkiak, z. Njazi Kosovrasti, në fjalën e tij e cilësoi ndërtimin e xhamisë si nevojë të domosdoshme për myslimanët. “Është shumë e rëndësishme që jemi mbledhur sot këtu për të diskutuar për çështjen e ndërtimit të xhamisë së madhe në kryeqytet pasi myslimanët e meritojnë dhe e kanë të nevojshme ndërtimin e një xhamie të madhe. Kryeqytetit tonë i duhet një xhami, në mënyrë që besimtarët të mos falen jashtë buzë rrugëve, por gjithçka të jetë siç ata e meritojnë”, tha Kosovrasti.

Më tej ai nënvizoi faktin se duhet analizuar e gjithë situata dhe duhet parë me kujdes dhe vëmendje të veçantë projekti te Namazgjaja. Sipas tij, problemi i pronësisë duhet të jetë shumë i qartë, jo vetëm plan-vendosja ku ndodhet prona e Komunitetit Mysliman, por edhe nëse është e mjaftueshme, nëse ka mundësi të zgjerohet më shumë territori për xhaminë, pasi siç duam të gjithë, ajo duhet të jetë një gjë e bukur dhe e mjaftueshme për besimtarët.

Ndërsa kryetari Komitetit Shtetëror për Kultet, z. Rasim Hasanaj, nënvizoi se xhamia duhet të ketë ambiente të mjaftueshme që t’i shërbejë besimtarëve jo vetëm për kryerjen adhurimeve, por edhe për arsimin, kulturën dhe edukimin fetar. “Ky problem është shumë i rëndësishëm pasi shqiptarët dihet që janë në mazhorancë myslimanë dhe u nevojitet më së shumti një xhami e madhe. Xhamia duhet të jetë e madhe që t’i përshtatet çdo aktiviteti fetar e social. Ne ofrojmë bashkëpunimin tonë të plotë si institucion”, tha kreu i Kulteve.

Ndërkohë që edhe nga përfaqësuesi Institutit të Monumenteve ka ofruar mbështetjen e plotë të këtij institucioni. “Nga ana e Institutit të Monumenteve do të keni të gjithë mbështetjen si për plotësimin e dokumentacionit ashtu edhe asistencën teknike të hartimit të projektit”, siguroi përfaqësuesi i këtij institucioni.

Të tjerë pjesëmarrës në takim nga grupi i punës për ndërtimin e xhamisë së madhe, diskutuan dhe pranuan se të gjithë janë koshientë për situatën e pakëndshme që shohin çdo të premte ku besimtarët myslimanë falen në rrugë pasi xhamitë ekzistuese nuk kanë kapacitet për t’i mbajtur të gjithë.

Nënkryetari i Komunitetit Mysliman, z. Gazmend Aga, duke falënderuar të gjithë aktorët për dëshirën dhe vullnetin e tyre pozitiv, theksoi se është tepër nevojshme përshpejtimi i procedurave në mënyrë që xhamia të ndërtohet sa më shpejt që të jetë e mundur.

“Ju falënderoj për iniciativat e marra deri më sot. Dua t’ju përcjell ndjeshmërinë e madhe që kanë besimtarët myslimanë jo vetëm në Tiranë, por në të gjithë Shqipërinë në lidhje me ndërtimin e kësaj xhamie. Ne si komunitet jemi të gatshëm të japim ndihmën tonë për të përshpejtuar procedurat për ndërtimin e këtij objekti të shumëpritur”, u shpreh zoti Aga.

Në përfundim kryebashkiaku Basha nënvizoi faktin se nuk ka kohë për të humbur dhe se institucioni që ai drejton do të japë të gjithë mbështetjen e nevojshme. Ai kërkoi që brenda muajit mars, të përmbyllet faza e konsultimeve, diskutimeve dhe e vendimarrjes, për çështjet e shtruara për diskutim.

“Tirana është kryeqendra e vendit. Ne sapo kemi festuar 92 vjetorin dhe një çështje që u trajtua ishte modeli i bashkëjetesës fetare, model të cilin Tirana e ka rrezatuar në shekuj të ekzistencës së vet dhe e rrezaton edhe sot. Është duke përfunduar katedralja ortodokse dhe ne i kemi dhënë gjithë mbështetjen e nevojshme, ndërkohë që koha ka ardhur dhe ka kaluar që edhe xhamia e madhe të ndërtohet dhe t’i japim fund problemit të përditshëm të besimtarëve që falen në rrugë. Vullneti për ta përfunduar këtë vepër është i plotë nga Bashkia e Tiranës dhe tek unë personalisht, por nganjëherë vullneti nuk mjafton dhe në këtë rast synimi i ngritjes së këtij komisioni ka qenë gjithë përfshirja në vendimmarrje e aktorëve kryesorë, ku çdo vendimmarrje që ne do të marrim do të jetë transparente dhe do t’i përcillet në kohë reale qytetarëve të Tiranës. Ne si Bashki e Tiranës jemi të disponueshëm që këtë aset të domosdoshëm për besimtarët myslimanë ta ndërtojmë sa më parë dhe t’i përfshijmë 100 për qind të gjithë aktorët kryesorë në mënyrë që askush të mos ndihet i përjashtuar nga ky proces”, deklaroi zoti Basha.

Komisioni përbëhet nga Kryetari i Bashkisë së Tiranës, Kryetari i Komunitetit Mysliman, Nënkryetari, Sekretari i Përgjithshëm, Përfaqësuesi i Komitetit të Kulteve, Përfaqësuesi i Prefektit, i Këshillit të Qarkut, Myftiu i Tiranës, tre përfaqësues të komunitetit të besimtarëve të Tiranës, përfaqësues i Institutit të Monumenteve të Kulturës, Këshillit të Ministrave, Shoqatës “Tirana”, Administratori i Përgjithshëm i Bashkisë dhe 5 drejtorë, tre drejtorë të përgjithshëm të Planifikimit të Zhvillimit të Territorit, Planifikimit të Menaxhimit të Shërbimeve, Projekteve Strategjike e Investimeve të Huaja dhe dy drejtorë të Planifikimit të Territorit dhe i Kontrollit të Zhvillimit të Territorit. Ndërsa takimi i ardhshëm do të mbahet më 15 mars 2012. /dritaislame.al/