Faktet sekrete janë të përfshira në më shumë se 3.000 dokumente, që sipas aktivistëve janë emaila të shkarkuar nga llogaritë personale të presidentit al-Assad dhe bashkëshortes së tij, Asma
Bashar al-Assad ka marrë këshilla nga Irani si ta trajtojë kryengritjen kundër qeverisjes së tij në Siri, sipas një grumbulli të atyre që duken të jenë disa mijëra emaila të pranuar dhe të dërguar nga udhëheqësi i kundërshtuar sirian dhe bashkëshortja e tij.
Presidenti i Sirisë gjithashtu është këshilluar në detaje lidhur me prezencën e gazetarëve perëndimorë në distriktin Baba Amr të qytetit të Homsit, dhe është nxitur të "shtrëngojë sigurinë" në qytetin e kontrolluar nga opozitarët në nëntor të vitit të kaluar. Faktet sekrete janë të përfshira në më shumë se 3.000 dokumente,që sipas aktivistëve janë emaila të shkarkuar nga llogaritë personale të presidentit al-Assad
dhe bashkëshortes së tij, Asma. Mesazhet, të cilat i ka siguruar gazeta e përditshme britanike "The Guardian", thuhet të jenë marrë nga anëtarët e Këshillit Suprem të Revolucionit, ndërmjet qershorit 2011 dhe shkurtit të këtij viti.
Dokumentet, që janë shfaqur në përvjetorin e parë të rebelimit që ka shkaktuar mbi 8.000 viktima, paraqesin një portret të një familjeje të parë të veçuar nga kriza në rritje, e cila megjithatë nuk e pengon
atë të vazhdojë të shijojë një jetesë luksoze.
Emailat tregojnë se zonja e parë siriane ka shpenzuar mijëra dollarë në internet për të blerë veshje të firmave të mirënjohura, por edhe se bashkëshorti i saj e kalon kohën duke vizituar uebsajta të ndryshëm në "iPad"-in e tij dhe se shkarkon muzikë nga "iTunes"-i.
Teksa bota po shikon e trembur represionin brutal të protestuesve në mbarë vendin, dhe shumë sirianë të përballur me mungesa ushqimore dhe vështirësi të tjera, znj. al-Assad ka harxhuar mbi 10.000 funte për të blerë qirimbajtëse, tryeza dhe llambadarë nga Parisi. "The Guardian" ka bërë përpjekje të mëdha për t'i verifikuar emailat e al-Assadëve, duke krahasuar përmbajtjen e tyre me fakte të dëshmuara, dhe duke kontaktuar nja 10 individë, korrespondenca e të cilëve përfshihet në mesin e grumbullit të emailave. Verifikimet e bëra nga gazeta e përditshme prestigjioze britanike sugjerojnë se mesazhet janë të vërteta. Ndër të tjera, emailat tregojnë se al-Assad ka marrë këshilla nga Irani apo ndërlidhësit e tij në disa raste
gjatë krizës. Ai është këshilluar të përdorë një gjuhë "të fuqishme dhe të egër", dhe të tregojë falënderimin e tij për mbështetjen nga "shtetet mike". Udhëheqësi sirian është këshilluar edhe që të paraqesë më shumë të dhëna për kapacitetet ushtarake të regjimit të tij, për të bindur publikun se ai mund t'i rezistojë ndonjë
kërcënimi ushtarak.
Emailat gjithashtu zbulojnë se "al-Shahba", një kompani me seli në Dubai, por me zyrë të regjistruar edhe në Londër, është ndërlidhësja kyçe për blerjet private të zonjës al-Assad, dhe se presidenti sirian i ka anashkaluar sanksionet amerikane ndaj tij, duke përdorur një palë të tretë me adresë amerikane për të
blerë nga dyqani digjital i kompanisë "Apple".
Thu 23 Mar 2023 - 2:31 nga 
