Biznesmen apo Diktator?!
Kushëriri im Besforti para një viti braktisi punën në një ndërmarrje private për shkak të presioneve psikike dhe ekonomike të shefit, i cili gjatë muajit të shenjtë të Ramazanit kishte vendosur t’i radikalizonte masat kundër punëtorëve.
Ngjashëm si Besforti dhe një koleg i tij brakstisi punën për të njëjta arsye.
Por, një Zot e di sa të tjerë si këta të dy mund të jenë në Kosovë?!
E pse të mos jenë kështu punëdhënësit në këtë shtet xhungël, ku në mungesë të ‘Luanit të Drejtë’ , hijenat bëjnë kërdi.
Punë e madhe për të drejtat e punëtorëve, për dinjitetet e tyre, integritetin, bindjen gjendjen emocionale të tyre. Ata janë robër vullnetar vetëm se tani i quajmë punëtorë (për shkak të ndjeshmërisë së kësaj shprehjeje).
Nënvetëdije, por jo ndoshta vetëm nënvetëdije. Shumë nga patronët e bizneseve të ndryshme në Kosovë, kolegët e tyre të punës (sepse duhet të konsideroheshin kolegë, meqë punojnë në të njëjtin vend pune) i shohin si të pabarabartë me ta, si krijesa jonjerëzore, duke mos i marrë në konsideratë aspektet humane të punëtorëve si, fjala vjen, disponimin momental, gjendjen shëndetësore apo shpirtërore, ngjarjet familjare, besimin dhe ritualitet fetare, festat e të ngjashme.
Çështja e tillë në shtete normale e demokratike është rregulluar prej kohësh nëpërmjet ligjeve përkatëse, të cilat gjithsesi janë të 100 % aplikuara, madje me rigorozitet të madh .
Nëse edhe më tej do t’i krahasonim me biznesmenët perëndimor, këta biznesmen kosovar qëndrojnë larg tyre pavarësisht që, ngasin makina të njëjta, pavarësisht që në zyrat e tyre mund të kenë kolltukë të butë me lëkur kafshësh etj. Të gjitha këto nuk e ndryshojnë faktin se ato do të menaxhohen nga barinjtë që deri dje ujku ua ka ngrënë delet.
Pra, vërejta s’ka të bëjë me gjithë biznesmenët por, vetëm me atë ‘biznesmen’ që kanë mentalitet të ulët, e që në këtë periudhë të jetës i është dhënë rasti dhe shpërdorin të mirat që ia ka dhënë në shfrytëzim Krijuesi Suprem.
Të tillët që kanë harrur ndjenjat humane kanë harrur të qenit njeri, shqiptar e mysliman.
Të tillët që kur vjen dita e premte fokusohen që punëtorët, praktikues të namazit, të jenë në vendin e punës.
Të tillët që shndërrohen në ‘kuçedra’ në kohën e Ramazanit, thjeshtë nga obsesioni për pastërtinë morale të punëtorëve të tyre dhe pa aftësinë e tyre njerëzore për të dalë nga llumi dhe për tu përmirësuar.
Vetëm për të rehatuar ndërgjegjen, punëtorët e tyre, praktikues të fesë, këta punëdhënës i kanë shndërruar në armiq, ndaj të cilëve do të shfryjnë egërsinë e tyre jonjerëzore. Tamam Faraonë. Faraonë të kohës moderne. Njerëz të zbrazur nga vlerat morale, ndërkohë të pabërë rehat asnjëherë. Armiq të cilëve çdo ditë e më shumë po bëhet edhe shteti ligjor që po ndërtohet në Kosovë, organet e rendit, administrata tatimore e të tjerë.
Këta ‘diktatorë’, që energjinë e tyre e kanë drejtuar gabimisht ndaj fetarëve janë pikërisht ata që nuk ndihen rehat në asnjë moment të jetës, madje nëse ndonjëherë në errësirën e natës dëgjohet ndonjë luhatje e ndonjë dere, mendojnë se është vdekja. Atyre edhe nata u është bërë armike. Të tillëve që shumë lehtë mund të ishin ‘shefi ideal’, ‘shefi shok’, ‘shefi im’... ; duhet të ishin kështu, të paktën thotë psikologjia e suksesit.
Ndërkohë që pavarësisht asaj që Besforti ngeli disa ditë i pa panë, duke rritur numrin e të papunëve në Kosovë i cili shkon gjithmonë nga rritja, Besforti dhe kolegu i tij gjetën punë në një ndërmarrje tjetër, por fatkeqësisht punë të ngjashme.
Disa muaj punë në këtë ndërmarrje dhe Besfortit iu ofrua mundësia për një punë të njëjtë në një ndërmarrje tjetër. Tani puna e re ishte ideale për Besfortin. Orari më i shkurtër, rroga më e madhe dhe angazhimi i kërkuar tamam. Besforti nuk e ka problem faljen e xhumasë me që edhe shefi i tij falet, madje bashkë shkojnë në xhami ditën e premte. Gjatë muajit të shenjtë të Ramazanit shefi ka vendosur që puna të zhvillohet me orar të shkurtuar. Besforti tani ka shumë zell dhe përkushtim më të sinqertë në punën e tij.
Ai, pasi e përfundon punën, shkon në xhami ta falë namazin, lexon nga Kurani, meqë tani ka mësuar të lexoj edhe në origjinal, kthehet në shtëpi pushon, bënë iftar, falë teravitë ... dhe natën vonë falë edhe namaz nate. Gjersa Besforti shijon kënaqësitë më të mëdha njerëzore dhe mbledh sevape për Ditën e Fundit, shefi i tij i parë ai diktatori trishtohet kur nga dhoma e tij dëgjon ndonjë zhurmë nga jashtë. Mendon se vdekja i ka hyrë në kuzhinë apo në frigorifer. E mund të ndodh që tek frigoriferi mund të jetë dikush nga familjarët e tij duke pirë ujë në këto ditë vape që kurrsesi nuk mund të krahasohen me vapën e madhe të Ditës së Gjykimit.
Autor : Gentian Jetishi
Korrektor: Besnik Jaha
Thu 23 Mar 2023 - 2:31 nga 
