Ramazani muaj i rahmetit, e jo i gafletit

Ramazani muaj i rahmetit, e jo i gafletit


Si ta organizojmë kohën tone gjatë muajit të ramazanit

Është shumë me rëndësi që secila amvise të mësoj të ketë prioritete në jetën e saj dhe të bëjë organizimin sa më të mirë dhe më efikas në të gjitha situatat, e në veçanti në kohën e muajit të ramazanit, kur prej saj pritet iftari, syfyri i shijshëm dhe shtëpia e rregulluar, krahas këtyre t'i shfrytëzoj edhe begatitë e muajit më të zgjedhur të vitit dhe t'i shtoj ibadetet. Gabimi më i madh i disa motrave është prioriteti i përgatitjes së iftareve të mëdha, për të cilët shpenzohen mjete të mëdha financiare dhe humbje të kohës, e kjo është larg këshillave të Muhammedi s.a.v.s., paraardhësve të zgjedhur dhe dijetarëve të dalluar. Ramazanet tona janë shndërruar në muaj të gafletit (pakujdesisë) dhe shtimit të shpenzimeve, kurse reduktim të veprimeve, humbje të kohës për shkuarje në treg dhe përgatitja e tryezës së pasur, prandaj nuk është çudi që nga zemrat e muslimanëve është zhdukur rahmeti, ndërsa as që e kanë hetuar mesazhin të cilin duhej t'ju sjell muaji i ramazanit, me të cilin duhej t’ju përkujtonte sprovimet e atyre gjatë tërë vitit, të cilët jetojnë në varfëri të skajshme, pak hanë dhe pak pinë.....
Ata që iftarët e tyre i kanë shndërruar në zbavitje e ahengje, nuk do ta shijojnë bukurinë e modestisë dhe përulësisë. Ata të cilët kanë ngrënë së tepërmi, nuk mund të ndihen si të uriturit, dhe nuk thuhet kot: “ I ngopuri nuk ia di hallin të uriturit”.
Për këtë arsye motër e nderuar mos harro se rroli yt në muajin e ramazanit është shumë i madh dhe se ti ke një emanet të madh për shfrytëzimin sa më racional të kohës. Para se gjithash, përgatitja për muajin e ramazanit fillon shumë para ardhjes së tij, prandaj është gabim i madh, e që tek ne është praktikë e zakonshme, që në natën e parë të vrapojmë në dyqane për të blerë gjëra ushqimore për syfyr dhe iftar. Gjyshet dhe nënat tona të urta janë përgatitur shumë më herët, disa muaj më herët, për pritjen sa më të mirë të këtij mysafiri të zgjedhur, duke rezervuar pjesë të mishit, perime dhe gjëra tjera në frigorifer.
Në këtë formë e kanë pritur muajin e zgjedhur dhe të bekuar, të përgatitura dhe pa vështirësi. Paraprakisht do ta përgatitnin shtëpinë për mysafirë, çarçafët dhe salvetat, e në veçanti enët për shërbimin e iftarit. Me të vërtetë ishin model dhe shembull i mrekullueshëm. Ramazani në kohën e tyre ishte pa stres dhe pa nervozë, pa shpenzime të mëdha dhe pa humbje të kohës. Ato me shembujt e tyre të mirë kanë dëshmuar se vërtetë me padurim dhe me gëzim të papërshkrueshëm e kanë pritur ramazanin. Ndërkohë që sot, shumë motra as që e hetojnë ëmbëlsinë e ramazanit, për shkak të mosorganizimit dhe paaftësisë ta bëjnë të veçantë dhe t’i shfrytëzojnë mirësitë e tij. Shumë prej tyre bile nuk arrijnë ta bëjnë asnjë hatme të Kur’anit, shumë pak bëjnë ibadet dhe dhikër, e kur të vjen nata, në vend të ibadetit, namazit të natës dhe kërkimit të natës së madhe, Lejletul Kadër, e cila është më e dobishme se një mijë muaj, lodhen dhe mezi presin të shtrihen e të zhyten në ëndrra të thella dhe ashtu dita ditës ramazani ik me lodhje dhe me strese, duke mos e hetuar fare dhe pa i shijuar të mirat e tij. Motër e nderuar, ti më së miri i njeh aftësitë tuaja dhe në kuadër të tyre angazhohu. Nëse nuk je sa duhet e shpejtë dhe e shkathët në përgatitjen e iftarit dhe të syfyrit, atëherë, fillo përgatitjen më herët. Patjetër llogarit kohën, ashtu që iftari yt të jetë i gatshëm dhe i shërbyer 15 minuta para ezanit, sepse nuk është e preferuar që mysafirët ta presin ushqimin, e veçanërisht kur janë në pyetje agjëruesit. Nuk është e hijshme që mos ta shfrytëzosh kohën kur pranohet lutja. Gjersa je duke përgatitur ushqimin, shfrytëzo kohën për dhikër (përmendje të Allahut), lutje dhe dëgjim të Kur’anit, ashtu që kënaqësia të jetë e plotë, kurse koha të jetë e shfrytëzuar në maksimum.
Në të njëjtën kohë kryej dy punë, derisa je në kuzhinë duke përgatitur ushqimin, në të njëjtën kohë pastroi enët dhe përgatiti enët për iftar. Do ta shohësh se në këtë mënyrë do të jetë më lehtë të organizosh ose ta planifikosh kohën. Mundohu që ushqimi të jetë gjithnjë i shijshëm dhe mos të jetë e bollshme. Llogarit të gatuash aq sa ke nevojë, mos të ketë shumë tepër, por edhe të mos mungoj, në rast të ndonjë mysafiri të pa planifikuar. Sido që të jetë, tepricën mund ta shfrytëzosh për syfyr ose, me pak yndyrë, ta përgatisësh edhe iftarin e nesërm.
Mos lejo që iftaret të jenë shumë të shtrenjtë, sepse teprimi nuk është veti e muslimanëve të cilët pretendojnë të jetojnë jetë modeste dhe ta përjetojnë mundin e atyre që jetojnë në varfëri të skajshme.
Është me rëndësi të kujdesesh për ushqim të shëndosh dhe të pastër. Për këtë arsye gjithnjë kujdesu që flokët tua t’i mbulosh gjersa gjendesh në kuzhinë, ndërkohë që ushqimi të jetë i mbrojtur nga pluhuri dhe çdo lloj papastërtie, sepse pastërtia është karakteristikë e grave muslimane.
Mundohu që ushqimi yt të jetë gjithnjë i shërbyer dhe i dekoruar që të paraqesë pasqyrën e bukur të zonjës së shtëpisë. Nëse nuk ke imagjinatë, motivoju përmes sajteve të internetit për shkathtësitë e gatimit ose përmes broshurave të lira të cilat mund të gjesh çdo kioskë.
Mos lejo që koha e dekorimit dhe e përgatitjes të kalon pa dhikër dhe përsëritje të Kur’anit. Mos lejo që të ikë asnjë minutë e vetme. Pas rregullimit të shtëpisë ndihmohu me gjumë të pasdites sepse edhe gjumi është ibadet.
Mos lejo t’ia humbësh vetit shpërblimin e përgatitjes së iftarit, në atë mënyrë që ti ose mysafirët e tu gjatë iftarit të përbashkët, me gjuhët tuaja ta prishni agjërimin. Mos lejo që në shtëpinë tënde të përgojohet, por përpiqu t’ua tërheqësh vërejtjen edhe të tjerëve në rrezikun e gjuhës.
Përpiqu që të arrish shpërblime sa më të mëdha dhe t’i shfrytëzosh sa më tepër begatitë e muajit të ramazanit, ashtu që çdo takim me motrat apo me familjen tënde ta zbukurosh duke përmendur dhe duke madhëruar Allahun xh.sh. Mos harro se është i mallkuar ai tubim në të cilin nuk përmendet Allahu xh.sh.
Motra ime e nderuar, le të jetë ramazani yt i shfrytëzuar maksimalisht në të mirë dhe në bamirësi dhe largim nga e keqja.



Përktheu dhe përshtati:
Esat Rexha