Kosovë Vetëvendosje pro fesë në shkolla

Lëvizja Vetëvendosje është për edukatën fetare në shkolla. Një ditë
pasi Kuvendi i Kosovës votoi kundër, kjo parti që e lëshoi seancën, ka
thënë se në shkollat publike mund të futet një lëndë ku do të mësohej
për fetë, por kjo duhet të vijë vetëm pas një debati shterues në
shoqëri, bën të ditur indeksonline.

Shefi i Grupit Parlamentar të Vetëvendosjes, Visar Ymeri ka sqaruar
në emisionin Interaktiv të KTV-së pozicionin e partisë së tij: “Shteti
duhet të jetë sekular, ashtu siç e parasheh Kushtetuta, por në shkollat
publike mund të futet një lëndë për fenë. Pastaj mund të vendoset nëse
do të mësohet për një fe apo më shumë dhe me çfarë metodolgjie apo
përmbajtje”.

Ai ka pohuar se duhet mësuar për historitë e feve, por nuk bën të
jepen instruksione për praktikim të ndonjë feje përkatëse. Ymeri
gjithashtu ka thënë se secili individ do të duhej të ishte i lirë në
zgjedhjen e vet se si do të vishet, duke iu referuar ndalesës për
mbajtjen e shamive në shkolla.

Më tej ai ka shtuar se para se të vendoset për fenë, do të duhej që
për këtë çështje të hapej një debat i madh shoqëror, të studiohen edhe
vendet e tjera e më pastaj të futet në votim. Duke i komentuar akuzat e
partive të tjera kundër Vetëvendosjes, ai ka thënë se “sulmet vijnë nga
frika që kanë këto parti për aktivitetet në rritje të Vetëvendosjes”.

(KD)