Gjermani - 68 emra turqish në listën e vdekjes së neonazistëve

Gjermani - 68 emra turqish në listën e vdekjes së neonazistëve

Terrori neonazist, që po trondit Gjermaninë, vazhdon të ruajë vendin e tij në rendin e ditës.
Bëhet e ditur se 68 prej gjithsej 88 emrave të renditur në listën e vdekjes, që u gjend në një shtëpi të organizatës neonaziste, janë turq.
Presidenti i Fondacionit Turko-Gjerman për Arsim dhe Kërkime Shkencore, Faruk Shen, emri i të cilit ndodhet në listën e lartpërmendur, bëri deklarata të rëndësishme lidhur me temën në fjalë.
"Nuk çuditem që emri im ndodhet në atë listë", tha Faruk Shen dhe vuri në dukje se jo vetëm që nuk u është caktuar mbrojtje trupore, por as nuk janë paralajmëruar në asnjë lloj mënyre.
Pasi tërhoqi vëmendjen se qeveria gjermane duhet ta publikojë zyrtarisht këtë listë, Faruk Shen hodhi pretendimin se lista është përgatitur nga segmentet nën hije të shtetit gjerman dhe më pas u është përcjellë neonazistëve.
Faruk Shen gjithashtu shprehu besimin se shkaku i vdekjes së 2 prej anëtarëve të grupit terrorist, që ka kryer këto krime, nuk ka qenë vetëvrasje, por vrasje e qëllimshme dhe e planifikuar mirë.
Ndërsa dëmshpërblimin prej 10.000 eurosh, që qeveria gjermane deklaroi se do t'u japë familjarëve të viktimave të terrorit, Faruk Shen e cilësoi si "lëmoshë" dhe theksoi se dëmshpërblimi duhet të jetë të paktën 500.000 euro për çdo familje./trt/