MASHTRUES DHE HAJDUT -- Lexone..

MASHTRUES DHE HAJDUT

Nga Nebih Maxhuni 19 Korrik 2012 08:01
Në përpjekje për t’u shëruar nga “magjia e zezë”, dy gra të familjes Bytyqi nga Shkoza e Malishevës, ia shtuan vetes edhe më shumë të zezat. Dyshohet se ato ia dhanë 1 kilogram stoli ari Abedin Ratkocerit nga Babushi i Lypjanit, që ai t’ua largojë “sehiret”. “Shëruesi” mori arin, u pagua 250 euro dhe më pas u zhduk. Pas lajmërimit të rastit në polici, Ratkoceri është arrestuar, por ari nuk është gjetur. Në treg, 1 kilogram metal i çmuar kushton rretsh 40 mijë euro.

Ato krejt qyl kanë mbetur.

As për ilaç nuk mund t’ua gjesh së paku një unazë.

Gishtërinjtë apo fytin e Florinda dhe Satbere Bytyqit nga fshati Shkozë i Malishevës nuk ua zbukurojnë më stolitë e shumta prej ari.

Jo, se ato nuk kanë dëshirë.

Madje kanë pasur goxha shumë, deri para pak ditësh.

Nënë e bijë numëronin gati 1 kilogram stoli prej metali të çmuar.

Por ato ua mori një “shërues” i magjive të zeza.

Më shumë se magjitë që gratë mendonin se kishin, “shëruesi” duket se hoqi fukarallëkun e vet.

Me 1 kilogram ar që shiti, Abedin Ratkoceri nga fshati Babush të Lypjanit, dyshohet se mori rreth 40 mijë euro.

Policia e rajonit të Prizrenit e konfirmon rastin.

Madje zëdhënësi Hazir Berisha tregon për Express se ky person është arrestuar.

E tregimi për këto gra fatkëqija, nis me fatkeqësinë e Florindës.

22-vjeçarja është ndarë nga burri i saj.

Pas divorcit, ajo dhe gratë e tjera dyshonin se dikush i kishte bërë “magji të zezë”.

Dikur të gjithë janë bindur se “sehiret e kishin fajin”.

Familja e Florindës ishte vënë në kërkim të një shëruesi.

Fjalë pas fjale, ata e gjetën.

Ky ishte Abedini. Fare pranë tyre, vetëm disa kilometra.

Florinda, e cila ka mbetur qyl pa asnjë gram ar, tregon për Express se “shëruesi” kishte shkuar dy herë në shtëpinë e tyre.

Këtë e kishte bërë duke e kuptuar hallin e madh, sepse vajza nuk mund as të lëvizte pas traumës së ndarjes nga bashkëshorti.

Herën e parë, “shëruesi i kishte fryrë vajzës”.

“Frynte e lexonte pjesë nga Kur’ani”, thotë Florinda për Express.

“Më tha se kam shumë sehire. I përmendte do pula të zeza, e gjithçka tjetër. Çka s’ka beteru”, thotë Florinda.

Por situata shëndetësore e saj nuk ishte përmirësuar.

Vizitën e parë, Abedin “Shëruesi” e kishte kryer në këtë familje më 6 korrik.

Nëna e Florindës, Satberja mban në mend më shumë detaje.

“Na largoi të gjithëve nga dhoma. Ka biseduar me vajzën duke u lutur, fryrë e shkruar para një libri që thoshte se ishte Kur’an”, thotë Satberja për Express.

“E ka pyetur vajzën nëse ka ar. Kjo i ka thënë po. Ai i ka kërkuar të gjithë arin, sepse i ka thënë se magjitë e zeza dhe sehiret i ka në ar”, rikujton Satbere Bytyqi.

E “magjitë e zeza” nuk hiqen lehtë.

Abedin “Shëruesi” u ka thënë familjarëve se arin duhet ta marrë me vete.

Madje krejt arin, rreth 1 kilogram.

Ndryshe nuk hiqen sehiret.

Bashkë me arin, ai edhe u pagua.

Për “punën e madhe të bërë”, Abedin “Shëruesit”, familja Bytyqi thotë se ia dha edhe 250 euro.

“Më tha se pas dy javësh, arin prej 1 kilogrami na e kthen. Tha se i duhet për t`i hequr sehiret. Tha se të gjitha të këqijat që i kam, vijnë nga dikush që më ka bërë sehire në stoli”, thotë Florinda.

Pas dy javësh, familja Bytyqi ka kërkuar që ari t’i kthehet.

Por ku ta gjejnë?!

Në fillim, thonë se kishin tentuar ta kontaktojnë “shëruesin” nëpërmjet telefonit.

Por ai nuk lajmërohej.

Pastaj, babai i Florindës së bashku me të dhe nënën, Satberen, kishin shkuar në Babush të Lypjanit për ta kërkuar.

“Prej orës 6 të mëngjesit e deri në orën 22 të mbrëmjes, kemi qëndruar para dyerve të tij. Ai nuk doli kurrë. Na thoshin se nuk është në shtëpi”, tregon Satberja.

“Kur i treguam gruas së tij se si qëndron puna me arin që na e kishte marrë ai, ajo u habit”, rikujton nëna e Florindës.

Të rraskapitur nga pritja, më në fund ata lajmëruan policinë.

“E kemi lajmëruar policinë. Kanë ardhur te shpia e atij. Më pas kemi shkuar në stacionin e policisë në Lipjan për të dhënë deklaratat për rastin”, thonë ata.

Probleme me ish-burrin për arin

Familja Bytyqi jeton në gjendje të mjerueshme sociale. Aty nuk punon asnjëri nga burrat e kësaj shtëpie.

Përveç njëqind halleve me vajzën e sëmurë, ata thonë se kanë një barrë të rëndë.

Tash kanë telashe me familjen e ish-dhëndrit.

Edhe me ata kanë problem për shkak të arit.

Tash familja e ish-burrit të Florindës po kërkojnë arin që ia kishin blerë për martesë.

“Jena mbyllur në shtëpi. Ish-miqtë po e kërkojnë arin që e kanë sjellë për martesë. Na kanë thënë ose arin, ose një shumë na i kanë caktuar 8 mijë euro. Ku t`i marrim ne këto para”, thotë i trishtuar babai i Florindës.

Tash, krejt shpresat i kanë në Policinë e Kosovës.

“I kemi të shënuara të gjitha se çka ka marrë prej arit ai mashtrues. Ishalla atë po na e kthen policia”, thonë ata.

Zyrtarët e Policisë së Kosovës e kanë konfirmuar këtë rast duke treguar se kanë arrestuar personin e quajtur Abedin Ratkoceri.

“I dyshuari Abedin Ratkoceri nga Babushi i Lypjanit, është arrestuar nga policia e Malishevës, sepse i njëjti ka konsumuar elemente të veprës penale të mashtrimit”, ka sqaruar zëdhënësi Hazir Berisha për Express.

Sipas tij, shtetasi Abedin Ratkoceri, duke u paraqitur si “mjek popullor, shërues i magjisë së zezë”, ka mashtruar një femër nga fshati Shkozë e Malishevës, me ç’rast asaj i janë marrë stolitë e arit me peshë rreth 1 kilogram.

Policia ka treguar se i dyshuari i kishte premtuar viktimës se stolitë duhet të qëndrojnë tek ai, ndërsa kur viktima i ka kërkuar, është vërtetuar se tanimë ato janë shitur nga mashtruesi.

40 mijë euro

Express është interesuar të mësojë se sa është çmimi i arit. Kështu, një kilogram ar në tregun e vendit sillet përafërsisht rreth 40 mijë euro. Ky është çmimi të cilin argjendarët në Prishtinë e shesin 1 kilogram ar. Në tregun (bursën) ndërkombëtare, një kilogram ar këtë javë kushton rreth 40 mijë euro.