Falënderimet[color:76ca=rgb(23, 0, 0)] i takojnë Allahut, Fuqiplotit, Drejtuesit të kësaj gjithësie, të Parit pa fillim dhe të Mbramit pa mbarim! Atë e falënderojmë dhe prej Tij ndihmë dhe falje kërkojmë. Kërkojmë strehim tek Allahu prej te keqes të vetvetes dhe veprave tona të shëmtuara!
Dëshmojmë se nuk ka zot tjetër përveç Allahut të Madhërishëm, gjithashtu dëshmojmë se Muhammedi s.a.v.s. është rob i Allahut dhe pejgamber i Tij!
Salatet, selamet qofshin mbi Muhammedin (s.a.v.s.) për të cilin Allahu i Madhërishëm në Kur’anin Fisnik thotë: “…Ai nuk flet nga hamendja, gjithë atë që e flet Ai është inspirim nga Allahu.”;mbi Familjen e tij të pastër, shokët e tij fisnik dhe të gjithë ata të cilët ndjekin apo do ta ndjekin rrugën e tij deri në amshim!
Pasi jemi në prag të muajit të Ramazan do të themi disa fjalë në lidhje me agjërimin. Për të qenë agjërueshëm duhet ndaluar nga ngrënia, pirja dhe nga marrëdhëniet intime.
Të nderuar xhematë!
A thua vallë mjafton vetëm me këtë apo duhet edhe diçka tjetër? Me siguri se nuk është ajo që kërkohet nga agjëruesi vetëm largimi nga të ngrënit dhe të pirët, por prej agjëruesit kërkohen edhe cilësi të tjera që duhet ti ketë dhe posedoj gjithnjë një besimtar i devotshëm, siç është largimi nga gënjeshtra, përgojimi, ryshfeti, korrupsioni, shikimi dhe dëgjimi i haramit, etj.
Në të kundërtën nëse nuk i përvetësojmë këto cilësi gjatë agjërimit, atëherë nuk do ta arrinim atë që e kërkon Allahu i Madhërishëm. I Dërguari i Allahut (s.a.v.s.) në lidhje me këtë thotë: “Kush nuk e lë gënjeshtrën dhe punon me të, Allahu s’ka nevojë që ai ta lë ushqimin dhe pijen e tij.”
Kështu që agjërimi ka tre shkallë apo me fjalë tjera agjëruesit janë tri llojesh:
A). Agjërimi i njerëzve të thjeshtë, këta ndalohen vetëm nga ngrënia dhe pirja;
B). Agjërimi i të devotshmëve, këta agjërojnë me sy, vesh, gjuhë, këmbë, dorë ose thënë ndryshe: agjërojnë me të gjitha gjymtyrët e trupit të vet; dhe:
C). Agjërimi i evlijave dhe salihinëve: këta agjërojnë me zemër duke e mbrojtur veten nga çdo send që mund ta largojë zemrën e tyre nga përmendja e Allahut të Madhërishëm.
Të nderuar xhematë!
Tani çdo njëri prej nesh mund të reflektojë në vetvete dhe ta gjejë se në cilin grup nga këta tre lloje agjëruesish bën pjesë: te i pari, i dyti apo i treti. Kurse unë kisha bërë lutje apo dua që shumica prej nesh të jemi te lloji i dytë se të tretin rrallë kush mund ta arrijë…
Këshilla e kësaj hutbeje është që të mundohemi dhe përpiqemi që nga agjërimi ta fitojmë devotshmërinë dhe mëshirën e Allahut, e kur të na kaplojë mëshira e Tij, dhe të na falë Allahu, atëherë jemi të larguar dhe të mbrojtur nga zjarri i Xhehennemit, kjo duke u bazuar në fjalët e Muhammedit s..a.v.s.: “Dhjetë ditët e para të Ramazanit janë mëshirë, dhjetëditëshi i mesëm është falje, kurse dhjetëditëshi i fundit është mbrojtje nga zjarri i Xhehennemit.”
____________________
(Kjo hutbe është mbajtur nga Ibrahim Alija, imam në xhaminë e Rinisë – Tetovë)
Thu 23 Mar 2023 - 2:31 nga 
