Qyteti në veri të Suedisë Lulea është një nga qytetet ku qgjërohet më së gjati. Muslimanët në këtë qytet agjërojnë 21 orë në ditë

Qyteti, ku dielli verës pothuajse nuk perëndon fare dhe iftari dhe syfyri kryhen gjatë ditës, është më i madh për nga popullsia në verilindje të Suedisë dhe në të jetojnë muslimanë të nacionaliteteve të ndryshme të tillë si turq, afganë, pakistanezë, iranianë, sirianë, palestinezë, tunizianë dhe të tjerë.
Iftari në Lulea fillon në orën 23.50, ndërsa syfyri përfundon në 02,37. Gjatë kësaj periudhe, dielli nuk perëndon fare, kështu që muslimanët iftarin, namazin e jacisë dhe agjërimin e kryejnë gjatë „ditës“. Për shkak të kohës shumë të shkurtë mes iftarit dhe syfyrit, muslimanët vazhdimisht nxitojnë t'i kryejnë të gjitha detyrimet fetare.
Fatma Bora dhe Tulay Imdat për dhjetë vite jetojnë në Lulea. Ata thonë se nuk e kanë të vështirë të agjërojnë, sepse në Lulea nuk është shumë nxehtë.
"Ne kemi një kohë të shkurtë mes iftarit, teravive dhe syfyrit, prandaj përpiqemi t'i arrijmë të gjitha. Kujdesemi që iftarin ta hamë bashkë me fqinjët dhe miqtë", thotë Fatma Bora.
Muslimanët në këtë qytet kanë hapur një xhami të vogël, ku ata takohen. Xhamia në fillim ishte boshe, por me kalimin e kohës numri i muslimanëve filloi të rritet, sidomos të premteve, për të falur namazin e xhumasë, i cili udhëheqet nga imami tunizian Mohammed Amri.
Ayse Duyar jetojnë më shumë se 20 vjet në Suedi. Ajo thotë se gjatë viteve të para të qëndrimit të saj në këtë vend, muslimanët nuk kishin vend ku të takohen gjatë festave fetare.
"11 vjet më parë kemi marrë me qira këtë xhami, i cili aktualisht më shumë shfrytëzohet për namazin e xhumasë. Pasi xhamia është shumë e vogël, ne, muslimanët që jetojmë këtu, kemi mbledhur të holla për një plac, ku do të ndërtojmë një xhami më të madhe. Bashkia e ka miratuar këtë projekt. Sipas llogaritjeve tona, nëse arrijmë ndërtimin e xhamisë, ajo do të jetë xhamia në pjesën më veriore të botës. Sigurisht, për realizimin e këtij projekti kemi nevojë për mbështetje financiare", tha Duyar.
"Këtu, ditët janë të gjata, por nuk janë të nxehta. Prandaj, nuk është vështirë të agjërohet. Sa për mua, unë nuk kam asnjë problem për ushqim dhe pije, por gjumi është i vetmi problem. Është vështirë për njerëzit që shkojnë në punë. Por, pas disa ditësh, njeriu mësohet", shpjegon ajo.
Në Lulea dy suedezë janë konvertuar në Islam. Nxënësi 25-vjeçar, Abdulaziz Hedermalm, thotë se konvertimi në Islam erdhi në bazë të hulumtimeve të tij. Ai tha se ka lexuar Biblën, Tevratin dhe Kur'anin, por përshtypjet më të forta i mori pasi lexoi Kur'anin.
"Pesë vjet më parë kam vendosur të bëhem musliman. Babai im vdiq kur isha i vogël, ndërsa nëna nuk u shqetësua shumë kur dëgjoi për vendimin tim. Përndryshe, ajo është krishterë. Ka pesë vite që agjëroj, dhe vij në namazin e xhumasë në xhami", thotë ai.
Suedezja Anna Waara thotë se edhe ajo gjithashtu është knvertuar në bazë të hulumteve të saja.
Ajo në vitet 2004 dhe 2005 ka banuar në Palestinë, kjo ka ndikuar shumë në vendimin e saj. Anna thotë se mënyra e jetës së muslimanëve ka lënë mbresa të forta, prandaj edhe është "dashuruar" në Islam.
"Kur kam biseduar me njerëzit në Palestinë, me të vërtetë më kanë befasuar qëndrimet dhe pikëpamjet e tyre ndaj botës dhe njerëzve të tjerë. Natyrisht, nuk jam bërë muslimane brenda ditës. Më është nevojitur kohë. Unë këtë e shoh si një udhëtim, udhëtim që vazhdon ende. E dua jetën, njeriun, njerëzit që m'i ofron Islami. Prindërit e mi në fillim ishin të shqetësuar, kur dëgjuan vendimin tim, më së shumti për shkak të paragjykimeve për Islamin dhe muslimanët. Nuk u pëlqeu ajo që jam mbuluar. Por, përfundimisht e kuptuan si Islami ka kontribuar pozitivisht në jetën time, dhe pak nga pak u janë larguar mendimet negative", tha Waara.
Ajo thotë se është përballur edhe me njerëz të cilët nuk kan dashur t'i flasin për shkak të vendimit për ndryshimin e fesë, por ajo thotë se nuk i vjen aspak keq, dhe se ndihet e lumtur.
Anna Waara (27), është nënë e një fëmije, dhe është martuar me një musliman pakistanez. Ajo punon si projekt menaxher në Lulea.