Admin
Administrator
Numri i postimeve : 8520
Data e regjistrimit : 02/07/2009
Mosha : 42
Nacionaliteti-Sheti : Tetovë-Maqedoni
 | Titulli: Zgjedhja e Bashkëshortit (Familja në islam)  Sat 9 Mar 2019 - 22:32 | |
|  Pyes një vajzë të re, në moshë për martesë: “Si do të doje të ishte burri yt i ardhshëm? A e ke menduar?” “Po, e kam menduar. Dua që të ketë tipare të rregullta, nuk po them që të jetë i bukur, por duhet që ta pëlqej, pra të ketë pak elektricitet mes nesh. Më pas, duhet të ketë shtëpi. Edhe makina është e nevojshme, një punë të mirë dhe rrogë. Nuk dua që të heq keq.” Nëse bisedoni me njerëz që janë në moshën e martesës, do të shikoni se sa janë shtuar kërkesat materiale. Sigurisht që do të hidheni e thoni: “Pse a nuk është pasuria e rëndësishme? Në kohët tona, çdo gjë bëhet me para. Si mund të jetohet kur nuk ke as punë dhe as rrogë?” Sigurisht që e shikuar nga ky këndvështrim, njerëzit që mendojnë një gjë të tillë, kanë shumë të drejtë. Paraja është e rëndësishme dhe është bukur kur ke një shtëpi ku të fusësh kokën. Por martesa nuk ka lidhje me asnjërën prej këtyre, dhe në momentin kur zgjidhet personi me të cilin do të kalosh jetën, anët materiale janë të fundit në listë. Le të flasim pak për arsyet... Le të themi se ka pasuri, ka tipare të rregullta, ka mendime të ngjashme me të tuat dhe dëshiron të martohesh me të me idenë se do të keni një jetë të qetë. Por burri juaj është i papërgjegjshëm dhe shumë dembel. Sa herë që ka një problem, shet gjërat që i kanë mbetur nga prindërit. Në vend që të punojë vetë, shfrytëzon trashëgiminë që ka. Në fund, kuptoni se nuk ju ka mbetur më asgjë në duar. Për më tepër që ai është një njeri i pamësuar të punojë. Atëherë, mos vallë duhet të shikojmë karakterin e njeriut përpara se të shikojmë pasurinë e tij? Nga ana tjetër, as kjo nuk është e mjaftueshme sepse idealet ndryshojnë, sidomos në kohët tona që ndryshojnë shumë shpejt. Idealet dhe mendimet nuk janë të mjaftueshme për të mbajtur të bashkuar një çift. Pasuria dhe idealet në një pikë mbarojnë dhe ndryshojnë. Po nëse këto të dyja nuk janë të mjaftueshme për të zgjedhur njeriun e jetës, çfarë është?
Ajo që e forcon një martesë është ecja në të njëjtën rrugë dhe forca për t’i luftuar së bashku të gjitha vështirësitë e jetës. Beteja e përbashkët e çiftit për të përballuar edhe sfidat më të vogla të jetës është më e rëndësishme se përpjekjet për hir të idealeve. Por këtu kemi një pengesë. Rritja e moshës së martesës.
Me kalimin e kohës, mosha kur njerëzit martohen po rritet gjithmonë e më shumë. Sa të mbaroj shkolla, të gjej punë, të bëj pajën, të kursej ca para, të blej një makinë, të bëjmë qejf me lekët e rrogës. I mendojmë të gjitha këto pa kuptuar që po na ik mosha. Pikërisht këtu fillon fatkeqësia.
Mbaron shkollën dhe je vetëm, ke blerë shumë gjëra por je vetëm, ke kursyer por je vetëm, ke pasur probleme por i ke kaluar e vetme...
Një njeri që i ka kaluar të gjitha vështirësitë i vetëm, a mund të ndjejë nevojën për t’u martuar? Në veçanti, djemtë që nuk e ndjejnë nevojën për t’u martuar janë të prirë për t’u larguar prej asaj. Djali vetëm në momentin kur dëshiron të bëhet baba, fillon ta shikojë martesën me më shumë dëshirë.
Njerëzit që edhe pse janë vetëm kanë sukses, e shohin martesën si diçka krejt të panevojshme. Mendimi “unë jam i vetëmjaftueshëm” ushqen egon. Ndërkohë, njerëzit me ego të fryrë e kanë shumë të vështirë që të lidhin jetën me dikë tjetër.
Për këtë arsye, ne kemi nevojë që ta eliminojmë idenë “sa t’i rregulloj të gjithë gjërat, pastaj do të mendoj për martesën.” Në këtë pikë, prindërit kanë rol shumë të rëndësishëm. Familja nuk duhet të ketë pritshmëri të paarritshme. Teksa presim që çdo gjë të jetë perfekte, koha e çiftit kalon me shpejtësi. Mjafton që të ekzistojë diçka mesatare dhe çifti do t'i rregullojë gjërat me kalimin e kohës. Le të kenë një histori për të treguar.
Cilat janë cilësitë që duhet t’i ketë njeriu që do zgjedhim për bashkëshort? Gjëja e parë që duhet të vëzhgojmë tek kandidati për martesë është sistemi i vlerave të tij. idealet ndryshojnë me kalimin e kohës, por vlerat që qëndrojnë në themel të karakterit nuk ndryshojnë. Për shembull, disa nga vlerat kryesore janë: familja, paraja, dashuria, suksesi, përgjegjësia, dëshira për të ndihmuar, respekti, puna dhe thjeshtësia. Kur jeni duke u njohur me një njeri, mundohuni që të kuptoni se cilave prej tyre u jep më shumë rëndësi.
Një burrë që ka prioritet paranë nuk mund të ketë martesë të lumtur me një grua që ka prioritet ndihmën ndaj të tjerëve. Një bashkësi e përbashkët vlerash është kushti kryesor për një martesë të suksesshme. Nëse njëra palë i jep rëndësi familjes, ndërsa tjetra suksesit, familja do të ketë probleme. Një burrë që punon shumë mund ta ketë të vështirë të kalojë kohë me familjen e vet.
Nëse gruaja e tij i jep më shumë rëndësi parasë se familjes, do ta kuptojë burrin e vet që punon deri në orët e vona të darkës dhe nuk do të nxjerrë probleme, por nëse është grua që vë familjen para të gjithave, martesa e tyre do të ndikohet negativisht.
Përmbledhje: Duhet të njihni mirë sistemin tuaj të vlerave. Më pas studioni atë të njeriut tjetër dhe krahasojini për të shikuar nëse keni pika të përbashkëta. Nëse është e nevojshme mund të kërkoni ndihmë nga njerëz më të mëdhenj. Mos e shtyni shumë moshën e martesës. Nëse ju del përpara një njeri që ju përshtatet, mos e shtyni më shumë me dëshirën për të pritur sa të rregullohen të gjitha gjërat. Mos i jepni rëndësinë maksimale anës materiale. Njerëzit e përgjegjshëm, të drejtë dhe punëtorë, në fund të fundit e marrin atë që duan.
| |
|
