Kurani si terapi

“Unë nuk të kam thënë asnjëherë se Kurani është një libër i gabuar. Por ti, ngaqë je në gjendje prej të vdekurit, nuk mund ta kuptosh atë. Muhamedi u bashkua me tërësinë. Ishte një pikë, u bë oqean. Në Hira kishte një festë, sepse Muhamedi u ngjit në pikën më të lartë që mund të ngjitet një njëri, në zenit. Dhe e mori atë, dhuratën e madhe. Ai ishte në zenit. Ti pa e përjetuar atë gjendje që u përjetua në Hira, nuk mund ta kuptosh as Kuranin e as Muhamedin. Kurani nuk është gabim, Kurani është i drejtë dhe i vërtetë… Gjithçka është e varur nga ty… Mirëpo ti, ngaqë nuk e ke zbuluar Muhamedin që ke brenda, e mban atë, nuk e jeton. Mos e mbaj, por jetoje, shijoje.” Osho, “Rruga e Mistikës” Kohët e fundit janë bërë disa studime lidhur me energjitë pozitive dhe negative, lidhur me valët që përhap njeriu nga aura, lidhur me energjitë që përmbajnë fjalët, mendimet, madje edhe ndjenjat. Janë arritur rezultate interesante, të cilat lidhen drejtpërdrejt me temën tonë.

Një prej këtyre hulumtimeve është edhe ai që Prof. dr. Masaru Emoto-s ka bërë mbi ujin, mbi kristalet e ujit, punime të cilat i ka përmbledhur në libra të tij të ndryshëm. Prof. Emoto ka punuar me mikroskop mbi kristalet e ujit për 12 vite me radhë dhe ka konstatuar se kristalet e ujit reagojnë ndaj faktorëve të jashtëm, si: fjala, shikimi, shkrimi, muzika, mendimi dhe ndjenjat. “Fotografitë që i janë bërë kristaleve të ujit janë të rregullta dhe të pastra,” -shprehet Prof. Emoto, “por, në momentin kur artikulohet fjala “djall” pranë ujit, kristalet hyjnë në forma kaotike, deformohen; kur bëni që ato të dëgjojnë fjalë të bukura ose kur u thuhen lutje, pastërtia dhe përbërja gjashtëkëndëshe e kristaleve të ujit shfaqet më dukshëm.”

Ai shprehet se uji reagon edhe sipas gradëve të ndryshme të vetëdijes, sikur i di të gjitha dhe merr formë sipas përbërjes së tyre. “Për shembull”, -thotë ai, “kur pranë ujit lëshohet muzikë Heavy-metal, kristalet e ujit shpërbëhen. Gjithashtu, e njëjta gjë ndodh edhe kur përdoren fjalë fyese, banale pranë ujit. Madje, edhe kur mendohen gjëra negative, qoftë edhe kur je i shqetësuar, kristalet e ujit deformohen.”Të mos harrojmë se 70 % e trupit të njeriut është ujë. Imagjinoni çfarë ndikimesh marrim dhe japim ndaj njëri – tjetrit gjatë jetës së përditshme, kur përballemi me fjalë, mendime apo ndjenja negative.

“Si reagojnë kristalet e ujit kur u jepet të dëgjohet Kuran? Po ndaj 99 emrave të Allahut? Si reagon ndaj shkrimit “Bismil’lah” dhe çfarë forme kanë kristalet e ujit të Zemzemit?” -ishin një grup pyetjesh që i patën bërë Prof. Emotos, i cili ishte i ftuar në Ditën e Ujit, vitin e kaluar në Kolegjin Doga në Turqi. Përgjigjja ishte kjo: “Kristalet shfaqeshin në një mënyrë aq të bukur, saqë fillova të mendoja nëse unë kam gjë lidhje me Islamin? Mos ka diçka për të më thënë Islami mua? Mos vallë po më tërheq brenda vetes kjo fe?!… Së shpejti, në Arabinë Saudite do botohet një libër i imi, aty do shikoni edhe fotografitë që i kam bërë ujit në këto raste” Prof. Emoto, bashkë me ekipin e tij ka shkuar edhe në zonat arabe, Egjipt dhe Arabi Saudite, për të bërë testimet që sapo përmendëm.

Ndër të tjera ata kanë bërë studime mbi myslimanin që bën dua, mbi
njeriun që dëgjon ezanin dhe mbi njeriun që dëgjon Kuran. Për arsye të
rezultateve që ai pati dhënë pas studimit, u popullarizua shumë emri i
tij në shtetet Islame.
Në një prej stacioneve televizive të Kajros, ai ka shpjeguar gjatë ndikimin që shkakton në organizmin e njeriut dhe efektin që bën artikulimi i Fjalës së Zotit, i ezanit dhe i Esmau’l-Husnas (emrat e Zotit). Në fund, ai përdor një shprehje të tillë: “Feja Islame është besimi i drejtë, këtë e dëshmon edhe përputhshmëria që ka Fjala e Zotit me organizmin e njeriut.” Pasi pata lexuar këtë, të nderuar të ftuar, fillova ta mendoja pak më ndryshe thënien e Profetit tonë të dashur: “Kurani dhe besimtari janë binjakë”. Ndoshta edhe në Kuran përmenden momentet më ekstreme të fuqisë së fjalës, së tingullit, zërit, p.sh. Fuqia e fjalës “Kun!” (Bëhu!), fuqia e zërit që do dalë nga suri (briri), aq i veçantë sa të bëjë të vdesë çdo njeri e pastaj të ringjallet çdo njeri. Dhe në suren Kamer, ajeti 31 thuhet: “Ne u lëshuam kundër tyre një ushtimë, e ata u bënë si shtroje vathi.” Imagjinoni çfarë efekti mund të bëjë zëri, në ç’dimensione mund të hyjë.

Po, Kurani është i koduar tek çdo njeri, pa përjashtim. Shkenca do ta vërtetojë këtë gjë në kohët që do vijnë. Dhe, me sa duket, së shpejti do fillojmë ta dëgjojmë shpesh këtë gjë. Madje, një shkencëtar mysliman pakistanez, inxhinier i genetikës, në punimet që ka bërë rreth ADN-së ka konstatuar se në kodonet me numër P19 të ADN-së gjendet e shkruar sureja Alak. Vini re, P19-a dhe sureja Alak. Është sureja e parë që ka zbritur dhe përbëhet nga 19 ajete. Pa dashur të ndalemi në misterin e shifrës 19, po qëndrojmë në temën tonë.

Jo më kot ekspertët e valëve që përhap njeriu nga truri, kanë konstatuar se leximi i Kuranit në gjuhën autentike bën efekt që njeriun ta mbetet apo të kthehet në valët alfa, pra në valët e prehjes, qetësisë shpirtërore, duke ia transformuar valët beta që zakonisht përçon njeriu kur është i shqetësuar. Pikërisht këtë gjë ka vërtetuar edhe studimi i klinikës “Akbar” në Florida. Studimi ishte planifikuar të realizohej mbi ajetet e Kuranit që flasin për mëshirën dhe kurimin. Ky studim do të bëhej në lidhje me ndikimin fizik të Kuranit dhe veçoritë kuruese të tij mbi organizmin, që do të vëzhgoheshin nga mjetet më moderne të kompjuterizuara. Për këtë studim u morën vullnetarisht persona jomyslimanë, të cilët nuk dinin arabisht, si dhe persona të moshave të ndryshme. Pra, eksperimenti do të kryhej mbi ata që nuk kanë asnjë njohuri në lidhje me ndikimin kurues të Kuranit. Së bashku me origjinalin arabisht të Kuranit, të eksperimentuarit dëgjuan edhe përkthimin e tekstit në anglisht. Në këtë kohë, leximi i Kuranit bëhej nga zëra të ndryshëm, duke u marrë kështu parasysh veçoria e ndikimit tëzërit. Pas studimeve prej një viti, përfundimi që doli, me një fjalë të vetme ishte i jashtëzakonshëm, sepse te 97% e vullnetarëve të eksperimentuar u vu re një rënie e theksuar e stresit, për shkak të ndikimit të drejtpërdrejtë në sistemin nervor autonom. Një arritje tjetër e eksperimentit ishte edhe mundësia e matjes së ndikimit të dëgjimit të Kuranit mbi trupin e njeriut.
Në këtë sukses, rolin kryesor e luajtën mjetet matëse kompjuterike, të prodhuara posaçërisht për këtë eskperiment. Matjet u bënë në saje të ndryshimit të potencialit elektrik të muskujve, përçmimit elektrik të lëkurës, shpejtësisë së rrahjes së zemrës dhe ndryshimit të nxehtësisë së lëkurës.

Të gjitha këto ndryshime ndikuan në organet e tjera të trupit dhe në funksionet e tyre, duke bërë të mundur të përcaktohej kështu edhe ndikimi mbi sistemin nervor autonom. Gjithashtu, ky sistem tregoi ndikimin e Kuranit edhe në vënien në lëvizje të sistemit imunitar, duke bërë të mundur parandalimin e kancerit dhe të shumë sëmundjeve tjera. Përfundimet e pjesës së parë të eksperimentit u paraqitën në “Kongresin e 17-të të Mjekësisë Islame”, në Misuri të Amerikës Veriore, ku rezultatet u pranuan me entuziazëm. Kështu, krahas burimit kurues shpirtëror doli në pah edhe forca shëruese, në drejtimin material dhe fizik e Kuranit. Duke mos i lënë vend rastësisë, këto makina nxirrnin çdo herë të njëjtin rezultat të ndikimit të Kuranit tek të eksperimentuarit, ndërsa ndaj dëgjimit të fjalës Allah u vu re se rritja e qarkullimit të gjakut, e rrahjeve të zemrës dhe nxehtësia e lëkurës u normalizuan. Vlen për t’u përmendur se dëgjuesit nuk dinin absolutisht asgjë rreth asaj që dëgjonin. Megjithatë, kur dëgjonin fjalën Allah, ndikimet ishin të menjëhershme, ndryshe prej pjesëve të tjera.

Pikërisht këtë po konstaton prej kohësh edhe psikiatri holandez Vander Hoven, i cili tash tri vite me radhë punon mbi zërin, mbi gjuhën dhe analizon efektet e tyre tek njeriu. Vetë ai nuk është mysliman, por ka parashtruar se sistemi, muzikaliteti dhe vibracioni i fjalëve të ajeteve të Kuranit bën efekt shumë pozitiv, në veçanti tek ata që janë të sëmurë me zemër, me tension dhe me strese. Ai thotë se ata që lexojnë dhe dëgjojnë Kuran e largojnë veten lehtësisht nga shqetësimet psikologjike. Për shembull, kur përmendet fjala Allah, thotë ai, germa e parë, germa “elif/a” është një zë që vjen nga respiratori dhe kontrollonfrymëmarrjen. Ndërsa kur thuhet bashkëtingëllorja “l”, gjuha prek lehtë në qiellzën e sipërme, gjë e cila është një pauzë. Më pas, të bësh të njëjtin kontroll të frymëmarrjes, pra të thuash sërish “la”lironfrymëmarrjen. Veçanërisht, kur thuhet germa e fundit që është “h” krijohet një lidhje mes mushkërive dhe zemrës, lidhje kjo që rregullon ritmin e zemrës. Në shëndetin njerëzor faktori më i rëndësishëm dhe më parësor është frymëmarrja. Hoveni ka konstatuar se me frymëmarrje të rregullt njeriu është mirë, ndërsa kur ka frymëmarrje të parregullt njeriu është i ekspozuar ndaj sëmundjeve. Në një qendër mjekësore, gjithnjë duke iu referuar gjendjes së pacientëve, ai i këshillon ata që ta artikulojnë në sasi të caktuara fjalën “Allah”. Ai në këtë mënyrë bën terapi. Fjala Zot nuk mund ta zëvendësojë fjalën “Allah” apo fjala “lexo” fjalën “ikra”. Përkthimi vlen për të kuptuar. Prandaj, vendin e origjinales nuk mund ta zëjë asgjë. Gjuha e nënndërgjegjës së njeriut është kuranishtja, pra gjuha e Zotit në një farë mënyre. Format janë në ADN-në tonë që prej kohës së Hz. Ademit (a.s.), të cilat ne i trasformojmë në vibrime, pastaj i zgjojmë me Kuran…Studime të tilla po bëhen në mbarë botën. Ndërsa, Kurani, nëfakt ka 1400 vjet që po bën efektin kurativ tek njerëzit. Shkenca thjesht po i vë emër praktikës së myslimanëve.

Sot, më shumë se kurrë, ne duhet t’i rikthehemi këtij libri të mistershëm, Kuranit, ta lexojmë atë me këtë vetëdije: Kurani është shërim për brendësitë tona dhe mëshirë për besimtarin.
Ma. Artur Tagani / Etika nr: 33, Dhjetor 2010