Tërnava: Fjalët fyese të hiqen nga historia

Tërnava: Fjalët fyese të hiqen nga historia

Myftiu i Kosovës, Naim Tërnava duket se është në një vijë me fjalët e Ministrit të jashtëm turk Ahmet Davitoglu dhe ministrit të Arsimit të këtij shteti, pasi që ka kërkuar heqjen e fjalëve fyese nga historia kur flitet për perandorinë osmane.

Ai në një intervistë për “Kosovën Sot” ka thënë se kërkesa e ministrave turk është keqkuptuar nga disa media kosovare.

“E kam thënë dhe po e them, se është keqinterpretuar në media kërkesa e ministrit të Turqisë. Me atë që kam parë, askund nuk është kërkuar që të ndryshohet historia. Unë jam pro asaj që fjalët fyese, që gjenden në librat tona, ato të largohen, sepse nuk i përket një kodi etik që të fyhen, edhe pse kanë ndodhur luftëra”, ka thënë Tërnava.

Përpos kësaj, Tërnava në këtë intervistë ka kritikuar edhe televizione kombëtare kosovare, që sipas tij, 90 për qind e programit të tyre është e mbushur me filma të zhanrit kriminalistik apo pornografikë dhe shumë “pak për të mos thënë hiç filma që e edukojnë brezin e ri”. “Filma që edukojnë brezin e ri, që avancojnë sjelljet e tij nga e mbara dhe nga e mira, ka shumë pak”, ka thënë ai.

Tërnava ka shpreh po ashtu kënaqësinë e tij për rënien e disa sisteme totalitare nëpër vende të Lindjes duke thënë se është i lumtur për këtë por jo edhe për humbjen e jetëve të njerëzve, sikurse po ndodhin në Libi, Egjipt, Siri dhe vende të tjera.

Ai prapë ka insistuar që xhamia në Prishtinë duhet të ndërtohet vetëm të çerdhja në Ulpianë.

“Ende nuk është caktuar lokacioni. Ajo që kam dëgjuar në shtyp është e vërtetë se tash për tash Komuna e Prishtinës nuk e ka parë të arsyeshme që të ndahet parcela përballë Institutit Albanologjik, gjë që e kërkoj me këtë rast. Apeloj edhe njëherë që të shikojnë mundësinë e ndarjes së kësaj parcele, sepse është shumë e moralshme, njerëzore dhe është kërkjesë e besimtarëve, votuesve, që të ndërtohet aty, është kërkesë e Bashkësisë Islame të ndërtohet aty një xhami e madhe”.

Për Tërnaven është e nevojshme edhe edukata fetare në shkolla. “Ne kemi kërkuar dhe do të kërkojmë vazhdimisht deri në realizimin e kësaj. Nuk do të heqim dorë nga kjo asnjëherë, sepse nuk jemi duke kërkuar diçka që shkon në dëm të kombit tonë”, mendon Tërnava.

Ndërkaq, i pyetur për elementet radikale të islamit në Kosovë, Tërrnava ka thënë se nuk i frikësohet këtyre elementeve.

“Po qe se kemi koordinim të mjaftueshëm mes bashkësive fetare, mes institucioneve, organizatave të ndryshme, ne në Kosovë, asnjëherë nuk duhet të frikësohemi nga elementët radikalë”.

Krejt në fund Tërnava ja ka uruar të gjithë besimtarëve islam për festën e Fiter Bajramin.

“Unë e lus Zotin që në familjet e tyre të ketë mirëqenie, shëndet, harmoni, gatishmëri dhe motiv edhe më të madh për t’i çuar proceset përpara në Kosovë dhe, duke pasur këto gjithherë të jemi me atë që jemi”.