Festa e Flamurit Kombëtar Dita e Flamurit – festa në Tiranë, Prishtinë, Shkup

Festa e Flamurit Kombëtar do të festohet me disa aktivitete në Tiranë, Prishtinë, Shkup dhe trevat tjera shqiptare. Agjenda e festimeve…

Shqipëri

Në Vlorë, Tiranë dhe qendrat tjera shqiptare do të shënohet 99 vjetori i Pavarësisë dhe Dita e Flamurit.

Bashkia e Vlorës ka organizuar një sërë aktivitetesh kulturore e artistike, me ç`rast pritet me promovime librash të autorëve vlonjat, koncerte me këngë të të gjitha rrymave muzikore, premiera në teatrin “Petro Marko”, por edhe aktivitete sportive. Në kuadër të kësaj dite nuk do të mungoj dhe vizita e kreut të vendit, presidentit Bamir Topi.

Në Tiranë nën patronatin e Bashkisë organizohen aktivitete të ngjeshura kulturore dhe artistike. Sheshet kryesore do shndërrohen në qendra argëtimi për të rritur e fëmijë, panaire, këngë, animacione, shfaqje cirku, valle tradicionale e gjithçka tjetër që pritet të sjellë atmosferë të vërtetë festime këtë fund nëntori.

Ora: 10:00, ceremoni në varrezat e Dëshmorëve.

Ora: 09:00 – 21:00, Panairi “Blej shqip”, në rrugën Murat Toptani

Ora: 10:00 – 13:00, shfaqje për fëmijë nga Cirku i Tiranës Teatri Metropol dhe fëmijët e qendrës “TEN” në Parkun Rinia.

Orari: 11:00 – 13:00 dhe 16:30 – 18:00, këndi I fotografisë, në trotuarin përpara Galerisë së Kombëtare të Arteve.

Orari: 11: 00 – 13:00, konkursi i pikturës dhe Kori i fëmijëve në sheshin tek Vëllezërit Frashëri.

Orari:12:30 – 13:30, kamerata e Tiranës tek Vëllezërit Frashëri .

Orari: 18:00, koncert në sheshin “Nënë Tereza”.

Orari: 20:00 ,shfaqja e filmit në Galerinë Kombëtare të Arteve.

Kosovë

Në Prishtinë do të organizohen një varg manifestimesh me rastin e përvjetorit të 99 të pavarësisë së shtetit shqiptar. Qeveria ka caktuar këtë ditë si ditë feste dhe pushimi, mirëpo pa ndonjë aktivitet organizativ. Janë manifestime të ndryshme që organizohen nën patronatin e Komunës së Prishtinës, Lëvizjes Vetëvendosje, por dhe Aleancës Kuqezi.

Komuna është përkujdesur për rregullimin e sheshit duke krijuar një atmosferë festive. Ndërsa sa i përket aktiviteteve kulturore do të organizohet një koncert për fëmijët në orën 13:00 në Pallatin e Rinisë dhe në mbrëmje një koncert festiv në orën 20:00 në sheshin “Nëna Tereza”.

Aleanca Kuq e Zi gjithashtu ka organizuar një aktivitet festiv nga orët e para të mëngjesit, e cila i fton shqiptarët që ti bashkohen festës së tyre në Prishtinë, për të shpalosur flamurin gjigant kuq e zi, i cili është nisur me karvanin nga Vlora.

Siç është paralajmëruar marshi nis nga ora 10:30 në Kinema ABC dhe më pas mijëra qytetarë do të marshojnë në shëtitoren nga hotel Grandi drejt Neë Born-it.

Lëvizja Vetëvendosje vjen me një program jo vetëm në Prishtinë, por edhe në Gjakovë dhe Prizren.

Maqedoni

Në Maqedoni gjithashtu janë paraparë një sërë aktivitetesh me rastin e shënimit të Ditës së Flamurit. Gati në të gjitha komunat e banuara me shqiptarë janë organizuar manifestime të ndryshme nën patronatin e komunave, por edhe shkollave për të shënuar këtë përvjetor të 99-të.

Në Shkup në ora 20.00 do të organizohet një Koncert festiv në sheshin “Skenderbeu” nën organizimin e Lëvizjes “ZGJOHU”, Shoqatës studentore “Dardania”, ndërsa mbështetur nga Komuna e Çairit dhe Ministria e Ekonomisë.

Në Institutin për Trashëgimi Kulturore Shqiptare janë paraparë aktivitete festive letrare.

Në Tetovë, Gostivar, Dibër, Kumanovë, Strugë gjithashtu janë paraparë aktivitete festive të organizuara nën patronazhin e komunave dhe shkollave, e organizatave joqeveritare dhe kombëtare.

Në Gradec të rajonit të Gostivarit do të shënohet festa e 99 vjetorit, ku do të zbulohet busti i Mehmet Pashë Derallës, Ministrit të parë të mbrojtjes në qeverinë e Ismail Qemalit bashkë me pllakat përkujtimore për varezat e 163 shqiptarëve të ekzekutuar nga forcat serbe në vitin 1915. Në këtë eveniment do të marrin pjesë personalitete politike, ndër të cilët kreu i BDI-së, Ali Ahmeti, i cili ka konfirmuar praninë e tij.

Komuna e Gostivarit do të organizojë disa aktivitete festive nën patronatin e kryetarit të saj Rufi Osmani, duke përfshirë programe artistike dhe letrare.

Në tre komunat Preshevë, Medvegjë dhe Bujanoc të Luginës së Preshevës, me rastin e këtij përvjetori do të organizohen protesta në shenjë të diskriminimit dhe moslejimin e përdorimit të flamurit kombëtar nga autoritetet serbe.

Shënimi i përvjetorit të 99 të Ditës së Pavarësisë do të bëhet me manifestime të ndryshme në diasporë.

(INA)