U promovua Asociacioni për Afirmimin e Gruas

Me 3 mars 2012, në hotelin ARKA në Shkup, u bë promovimi i organizatës së posa krijuar joqeveritare “Asociacioni për Afirmimin e Gruas”. Me këtë rast AAG edhe organizoi konferencën me titull: “Roli i organizatave femërore në vend dhe rajon”.

Fjalën e rastit në fillim e pati kryetarja e Asociacionit për Afirmimin e Gruas, znj. Ajgyl Sulejman, e cila bëri një sqarim rreth nismës së themelimit të AAG-së, vizionit, misionit dhe objektivave të kësaj organizate. Sipas saj, mision i AAG është afirmimi i pozitës së gruas në shoqëri, mbrojtja dhe zhvillimi i të drejtave të saj, nxitja e arsimimit dhe ngritjes intelektuale, mbështetja e grave drejt një roli më aktiv në jetën shoqërore, si dhe ruajtja e vlerave fisnike dhe shenjtërisë së familjes. “Me angazhimin dhe përkushtimin e tyre, gratë arritën të bëhen pjesë e pandarë e ngjarjeve dhe ndryshimeve botërore, duke luajtur shumë shpesh edhe rolin e liderit të suksesshëm botëror dhe bartësit të ndryshimeve shoqërore. Edhe ngjarjet e fundit në botë, e tregojnë atë si një hallkë shumë të rëndësishme në lëvizjet e gjëra popullore për largimin e diktaturave dhe arritjen e ndryshimeve sociale dhe demokratike”, tha ndër të tjera në fjalën e vet kryetarja e AAG, Ajgyl Sulejman.

Fjalë përshëndetëse në këtë promovim patën edhe Xhane Kreshova, kryetare e Forumit të Gruas nga Tetova dhe Nermine Qorolli, aktiviste e vjetër për të drejtat e gruas, të cilat e përshëndetën themelimin e Asociacionit për Afirmimin e Gruas dhe i uruan punë të mbarë dhe të suksesshme.

Përndryshe, paneliste në konferencën e organizuar me këtë rast ishin Teuta Arifi, zv/Kryeministre për Integrime Evropiane në Qeverinë e RM, e cila ligjëroi në temën: “Femra shqiptare dhe integrimi i saj në shoqëri”; Savka Todorovska, kryetare e Këshillit kombëtar të grave në RM, me temën: “Ballafaqimi i femrës me dukuritë devijante në shoqërinë tonë”; Sehija Dedoviq, Drejtore e Qendrës Edukative të Grave “Nahla” nga Bosnja e Hercegovina, me temën: “Roli dhe kontributi i organizatave muslimane të grave në jetën shoqërore”; dhe Nexhla Kojtak, eksperte për çështje familjare nga Republika e Turqisë, me temën: “Pozita e gruas në kohën e globalizimit”.

Sipas znj. Teuta Arifi, roli i gruas shqiptare ka qenë jashtëzakonisht i madh gjatë historisë së popullit tonë, ndërsa arritja e suksesit në jetën publike dhe shoqërore kërkon angazhim më të madh në drejtim të zhvillimit të aftësive dhe afirmimit të ideve. “Përparimi dhe avancimi i pozitës së gruas, veçanërisht në proceset politike dhe shoqërore, ka rolin e vet pozitiv, ngase këto procese i bëjnë gratë më efikase dhe më të dobishme për shoqërinë”, tha në fjalën e vet zv/Kryeministrja Teuta Arifi.

Kryetarja e Këshillit kombëtar të grave në RM, znj. Savka Todorovska, në paraqitjen e vet u përqendrua më shumë rreth gjendjes faktike të femrës në Republikën e Maqedonisë. Sipas saj, statistikat e organizatës që ajo drejton tregojnë se ka një zhvillim pozitiv në drejtim të avancimit të pozitës së grave në vendin tonë, por gjithsesi duhet akoma shumëçka për të ndryshuar dhe përmirësuar.

Znj. Sehija Dedoviq, Drejtore e Qendrës Edukative të Grave “Nahla” nga Bosnja e Hercegovina, theks të veçantë i dha rëndësisë së themelimit të organizatave të femrave të ngjashme si Asociacioni për Afirmimin e Gruas, të cilat do të luajnë rol të rëndësishëm në ngritjen e vetëbesimit tek femrat, për t’u avancuar dhe për të dhënë kontribut në shoqëri. Ajo, po ashtu, bëri një njoftim të shkurtër rreth punës së Qendrës Edukative “NAHLA”, ku ndër të tjera organizojnë edhe trajnime dhe këshillime psikologjike për gratë të cilat kanë probleme dhe vështirësi në jetë, si dhe programe dhe kurse të ndryshme për aftësimin profesional të grave për punësime të mëtutjeshme.

Ekspertja për çështje familjare nga Turqia, znj. Nexhla Kojtak, në ligjëratën e vet u fokusua te roli i gruas fillimisht si shtyllë e familjes, e pastaj edhe si kontribuuese e rëndësishme në rrjedhat shoqërore. Por, sipas saj, duhet pasur kujdes nga modernizimi i rrejshëm dhe zhvillimi i hovshëm i teknologjisë, në mënyrë që femra të mos del nga natyrshmëria e saj e të qenurit nënë, bashkëshorte etj. “Edukata dhe dashuria të cilat i jep gruaja, që e bën njerëzimin të posedojë ndjenja humane dhe njerëzore, janë arsyeja kryesore që një shoqëri të zhvillohet mbi themele të shëndosha. Andaj, përderisa gruaja arsimohet dhe avancohet, ngritet dhe formohet dinjiteti i saj, ajo i ndihmon shoqërisë me aftësitë e veta, por njëkohësisht edhe formon gjenerata të shëndosha të cilat japin kontribut pozitiv në shoqëri”, theksoi ndër të tjera mysafirja nga Turqia, Nexhla Kojtak.

Konferenca në fjalë ishte aktiviteti i parë që realizoi Asociacioni për Afirmimin e Gruas, i cili është themeluar në dhjetor të vitit 2011. AAG është organizatë joqeveritare e grave, pa marrë parasysh përkatësinë e tyre etnike apo fetare, përmes të cilës ato do të mund t’i realizojnë liritë dhe të drejtat e veta personale dhe kolektive, si dhe interesat e tyre të përbashkëta shoqërore, kulturore, arsimore, sociale dhe të tjera. Selia e AAG është në Shkup, ndërsa aktivitetin e vet do ta shtrijë në tërë territorin e Republikës së Maqedonisë.

Disa nga objektivat e Asociacionit për Afirmimin e Gruas janë:

- Inicimi, përcjellja dhe studimi i çështjeve për përmirësimin e pozitës së grave në vend, avancimin e tyre në shoqëri dhe rritjen e rolit dhe ndikimit në zhvillimin e gjithmbarshëm;

- Zgjidhja e problemeve të ndryshme në lidhje me statusin e gruas dhe ngritja e vetëdijes së saj kombëtare e fetare, kulturore e arsimore, ekonomike e shëndetësore etj;

- Veprimi në drejtim të sigurimit të përfaqësimit adekuat të grave në të gjitha sferat e jetës publike;

- Mbrojtja e dinjitetit dhe integritetit të gruas, si dhe eliminimi i të gjitha formave të dhunës kundër saj;

- Ruajtja e vlerave pozitive të familjes dhe rolit të padiskutueshëm të gruas në zhvillimin dhe edukimin e fëmijëve;

- Ndërmarrja e masave dhe aktiviteteve për çrrënjosjen e veseve të këqija, siç janë alkooli, droga, prostitucioni dhe dukurive tjera devijante;

- Inkurajimi i përfshirjes së grave në nisma të ndryshme qytetare, humanitare, edukative, kulturore dhe fetare.