Lajmet Ditore

Ivanov: Askush nuk mundet ta kontestojë identitetin tonë


Nuk ka asnjë shtet, asnjë qeveri dhe asnjë fuqi, e cila mundet t'ua kontestojë të drejtën qytetarëve të Maqedonisë që të kenë identitetin e tyre sepse të drejtat e njeriut janë më të fuqishme dhe më të qëndrueshme nga ndërrimet e qeverive ose politikanëve të caktuar, tha presidenti i Republikës së Maqedonisë, Gjorge Ivanov në fjalimin me rastin e shënimit të 60-vjetorit të miratimit të Konventës evropiane për të drejta të njeriut.
Ai në emër të kryesimit maqedonas me Komitetin e ministrave të Këshillit të Evropës, theksoi se në Maqedoni përmes Marrëveshjes së Ohrit jo vetëm që respektohen, por edhe sendërtohen standardet e vendosura të Konventës.
Ivanov, njofton raportuesi i MIA-s nga Strasburgu, theksoi se një pjesë e këtyre parimeve në disa institucione evropiane nuk zbatohen ndaj qytetarëve të Republikës së Maqedonisë para se gjithash për shkak të presionit politik nga një vend-anëtar.
"Sot jam krenar edhe si presidenti i Republikës së Maqedonisë, edhe si qytetar i saj që në emër të të gjitha vendeve-anëtare të Këshillit të Evropës mund t'i dërgoj mesazhe fisnike për promovimin e të drejtave të njeriut në Evropë pikërisht në gjuhën time maqedonase", theksoi Ivanov.
Që Gjykata evropiane për të drejta të njeriut të funksionojë, theksoi ai, për plotësimin e qëllimit të saj, është e domosdoshme vendimet e saj të jenë tërësisht të respektuara dhe të zbatuara nga të gjitha vendet-anëtare.
"Duhet të përforcohet roli i Gjykatës dhe i Komitetit të ministrave që t'i jepet fund mosrespektimit të Konventës evropiane për të drejta të njeriut nga disa vende-anëtare", shtoi Ivanov.
Në vigjilje të shënimit të sotëm, presidenti Ivanov mbrëmë në shoqëri të ministrit të Punëve të Jashtme, Antonio Milloshoski ishte i pranishëm në darkën solemne që me rastin e jubileut të madh e organizoi nikoqiri, sekretari i përgjithshëm i Këshillit të Evropës, Torbjorn Jagland, ndërsa në të cilin ishte i pranishëm edhe sekretari i përgjithshëm i KB-së Bank Ki-mun dhe përfaqësues nga 47 vende-anëtare të KE-së.
Në suaza të shënimit do të mbahet panel diskutim për të ardhmen e të drejtave të njeriut në Evropë, me të cilën do të kryesojë Zhan Pol Kosta, ndërsa do të marrin pjesë edhe njerëzit e parë të trupave kompetente të KE-së për luftën kundër trafikut me njerëz, racizmit dhe mostolerancës, torturës dhe trajtimit jonjerëzor, të drejtave sociale dhe mbrojtjes së pakicave kombëtare dhe gjuhëve minorene.
Konventa evropiane për të drejta të njeriut është miratuar nga Këshilli i sapoformuar i Evropës në Romë më 4 nëntor të vitit 1950, ndërsa ka hyrë në fuqi më 2 shtator të vitit 1953. Konventa bazohet në Deklaratën e përgjithshme për të drejta të njeriut të Kombeve të Bashkuara nga viti 1948. Konventa paraqet kornizë për mbrojtje dhe respektim të të drejtave të njeriut dhe liritë themelore. Me të janë vendosur edhe bazat për Gjykatën evropiane për të drejta të njeriut. Nënshkrues të konventës janë të gjitha 47-të vendet e KE-së. Ata janë obliguar të krijojnë kushte për garantimin dhe mbrojtjen e të drejtave dhe lirive të njeriut dhe ta respektojnë kompetencën e Gjykatës evropiane për të drejta të njeriut. /MIA/

Zyra Civile Ndërkombëtare (ICO) i ka kërkuar udhëheqësve kosovarë që t'i organizojnë zgjedhjet e pritshme në vend në përputhje me standardet ndërkombëtare.
Kjo zyrë që bën mbikëqyrjen e zbatimit të planit të Ahtisaarit për pavarësinë e Kosovës, nuk ka deklaruar nëse mbështetë mbajtjen e zgjedhjeve të jashtëzakonshme deri në fund të këtij viti apo të atyre të parakohshme të përcaktuara më 13 shkurt.
Zëdhënësi i Zyrës Civile Ndërkombëtare, Kai Mueller Berner në një deklaratë dhënë BBC-së ka thënë se u takon partive dhe institucioneve në Kosovë që të vendosin për rrugën përpara.
Ai shprehu besimin se subjektet politike do të arrijnë konsensusin e nevojshëm për zgjedhje, duke respektuar Kushtetutën.
Zëdhënësi Berner theksoi rëndësinë e funksionimit të shtetit të Kosovës dhe përparimin e vendit drejt përmbushjes së obligimeve rajonale dhe atyre evropiane.
Në këtë rrafsh, ai veçoi miratimin e legjislacionit të nevojshëm në Parlament, dialogun e Prishtinës dhe Beogradin dhe organizimin e zgjedhjeve në harmoni me standardet ndërkombëtare.
Vetë shefi i Zyrës Civile Ndërkombëtare në Prishtinë, Pieter Feith që është përfshirë këto ditë në konsultat me drejtuesit e institucioneve dhe partive kryesore politike rreth zgjedhjeve, nuk ka dashur të flasë për këtë çështje. /Telegrafi/

Pas bisedimeve bilaterale, presidenti francez Nicolas Sarkozy dhe kancelarja gjermane Angela Merkel, pritën në Deauville presidentin rus, Dmitri Medvedev në një takim trepalësh.
Merkel theksoi se duhet shtuar baza e besimit me Rusinë, njofton Deutsche Welle.
Në qendër të këshillimeve dyditore do të jetë politika e sigurisë. Në nëntor, NATO-ja pritet të shpalosë një vizion të ri për sigurinë, i cili mund të përfshijë një mburojë anti-raketore evropiane.
Ndryshe, Rusia ka refuzuar deri tani ta mbështesë një mburojë raketore, për shkak të drojës se mund të ketë si objekt qytete ruse. Kohët e fundit, presidenti Medvedev ka folur megjithatë në mbështetje të një kornize të re evropiane të sigurisë. /Telegrafi/

Tetë persona humbën jetën sot në kryeqytetin çeçen, Grozni pasi disa sulmues me armë dhe një vetëvrasës me bombë, sulmuan Parlamentin kombëtar. Në mesin e viktimave janë edhe të paktën katër pjesëtarë të sigurimit të parlamentit ndërsa pas përleshjeve disa orëshe janë likuiduar edhe katër sulmuesit prej të cilëve dy ishin vetëvrarë. Sipas medieve ruse, sulmuesit kanë pasur cak kryetarin e parlamentit Dukuvaha Abdurahmanov të cilin në kohë të duhur e kishin nxjerr nga parlamenti. Sipas informatave të pakonfirmuara, sulmuesit për të cilët besohet se janë anëtarë të grupeve islamike të cilat luftojnë kundër qeverisë pro ruse të Groznit, fillimisht kanë shpërthyer eksplozivin në kohën kur deputetët kanë ardhur në punë. Më pas kanë filluar të shtinë me armë në drejtim të ndërtesës së parlamentit dhe kanë filluar përleshje të hapur me policinë. Incident i këtillë në Çeçeni nuk ka ndodhur një kohë të gjatë, ku për momentin funksionon qeveria që ka mbështetje të plotë të Moskës, kështu që rebelët tentojnë përmbysjen e saj. Në Çeçeni pas shpërbërjes së Bashkimit Sovjetik, u zhvilluan dy lufta për shkëputje nga Moska, e para në vitin 1990 kurse e dyta në vitin 2000. Ivan Bllazhevski

Rriten tensionet mes BDI-së dhe PDSH-së për dosjet e tre funksionarëve të lartë të partisë së Ahmetit, të shënjestruar si bashkëpunëtorë të shërbimeve sekrete. Pas akuzave të një dite më parë të deputetit të BDI-së Talat Xhaferi se dosjet e tre funksionarëve janë fabrikuar nga Hisen dhe Rexhep Musliu, sot personat e akuzuar u kundërpërgjigjën. Ata i quajtën akuzat e Xhaferit, të pa argumentuara dhe paralajmëruan padi penale ndaj tij.“Në çfarë detyre ai u kyç në UÇK. Tre muaj para se të kyçet në UÇK, me cilën funksion aktual të shërbimit sekret ushtarak të ARM-së i kaloi bashkarisë, çfarë detyra mori ai që të kyçet në UÇK dhe ne UÇK ai u kyç me dy emblema. Një emblemë para pjesëtarëve udhëheqësish së UÇK-së e kishte emblemën e UÇK-së kurse përbrenda e kishte yllin të ish Armatës së Maqedonisë, Jugosllavisë dhe si më vonë po ky Talat Xhaferi u bo komandant i brigadës 116 që përfshinte Gostivarin dhe rrethinën” tha Hisen Musliu ish punonjës policie. Në reagimin e Rexhep Musliut, edhe ai i akuzuar nga BDI, thuhet se ‘me plot përgjegjësi penale dhe materiale pohoj se asnjëherë në jetën time dhe karrierën profesionale nuk kam marrë pjesë në akte kriminale të falsifikimit të dokumenteve, as edhe të dosjeve të shërbimeve sekrete në Republikën e Maqedonisë. E porosis Talat Xhaferin dhe partinë e tij se akuzat e lëshuara në konferencën për shtyp do të kenë mundësi t’i argumentojnë para organeve kompetente të gjyqësisë” thuhet në reagimin e Rexhep Musliut. Në BDI përsëritën edhe një herë se fabrikues të dosjeve të tre funksionarëve të tyre është PDSH-ja. Abdylaqim Ademi tha se BDI-ja prej sot nuk do të komentojë dhe as do t’u përgjigjet akuzave të mëtejshme të PDSH-së lidhur me të ashtuquajturat dosje të fshehta. BDI ka punë shumë më serioze se sa të marrë pjese në tragjikomedinë e quajtur “PDSH-UDB” “Më duhet të them në emër të udhëheqësish së partisë sonë, se BDI-ja nuk e ka më mendjen të humbë kohë me këtë parti politike, e cila për shkak se nuk ka çka ti ofrojë elektoratit, mundohet të përçajë popullin, si gjithmonë që ka vepruar që nga themelimi i saj, dhe atë me intriga nga më të ulëtat dhe me fabrikime sipas instruksioneve të strukturave të cilat që nga formimi i kësaj të ashtuquajtur parti politike janë këshilltarë kryesor të saj, dhe atë jo vetëm për formimin por edhe për mënyrën e veprimit të saj” tha zv/kryeministri Abdylaqim Ademi. Ka reaguar edhe partia e Thaçit. “Duhet ta dini, nëse nuk e dini, atëherë jua përkujtojmë se do të viheni përpara drejtësisë gjermane, asaj të Kosovës dhe të Shqipërisë. Kurse këtu në Maqedoni pas rrëzimit nga qeveria, ju spiunë serbë do të keni telashe serioze me gjyqet në Maqedoni. Jeni shastisur krejt dhe nuk dini çfarë bëni. Adresa ku duhet të drejtoheni janë; Beogradi, Komisioni për Lustrim, Gjyqësori qoftë në Maqedoni qoftë jashtë dhe llogarinë përfundimtarë do ta jepni para shqiptarëve, si këtu ashtu edhe para atyre në Kosovë dhe Shqipëri” thuhet në reagimin e PDSH-së. Akuzat e ndërsjella mes PDSH-së dhe BDI-së filluan pasi Shpend Lushi nga Tetova në Komisionin për Lustrim dorëzoi tre dosje të funksionarëve të lartë të BDI-së si bashkëpunëtorë të shërbimeve sekrete serbe. Shkëlzen Aqifi

Kryeministri Nikolla Gruevski duke komentuar zhvillimet e fundit rreth procesit të lustrimit dhe dosjeve të funksionarëve të partnerit të koalicionit – BDI, tha se duhet të pritet qëndrimi i institucioneve. I pyetur se a do ta mbështesë qeveria Komisionin për lustrim që të kërkojë dokumente nga Beogradi, Gruevski tha se ndihma nuk do të mungojë.“Sa më përket mua, institucionet i kanë tërësisht duart e lira që të bëjnë atë, bile edhe kanë inkurajim për të bërë atë. Komisioni për lustrim është më kompetent dhe ai duhet të japë orientimin kush dhe si duhet të punojë në atë drejtim. Duhet ato punë ti lëmë ti kryejnë institucionet. Siç mësova, BDI ka lajmëruar se do të kërkojë pastrimin në rrugë institucionale të punëve që u paraqitën periudhën e fundit” tha kryeministri Nikolla Gruevski