Lajmet ditore

Nëse nga Ministria e Punëve të Brendshme (MPB) kërkohet kryerja e ekspertizës së dosjeve të paraqitura në opinion, ne mund ta bëjmë një gjë të tillë. Këtë e ka bërë të ditur ministrja për Punë të Brendshme, Gordana Jankullovska.

Ajo ka njoftuar se deri sot, deri tek institucioni që drejton, nuk ka arritur ndonjë kërkesë e tillë.

“Nuk kemi pranuar asgjë konkrete që të mundemi pastaj të japim vlerësim në lidhje me atë se a kemi kapacitet dhe brenda cilit afat do të mund ta bënim atë. Përndryshe, MPB-ja ka laborator për krim-teknikë, e cila është një nga më bashkëkohoret në rajon dhe, mes tjerash, i financuar nga një projekt i BE-së”, ka deklaruar Jankullovska, e cila ka sqaruar se në rastin e dosjeve, MPB-ja mund të veprojë vetëm sipas kërkesës së ndonjë institucioni tjetër dhe jo sipas detyrës zyrtare të ndërhyjë në çështjen e dosjeve.

“Nuk dua të jap kurrfarë vlerësimesh dhe kualifikimesh për diçka që nuk e kemi parë, respektivisht për diçka që nuk është kërkuar asnjë aktivitet nga ne”, ka thënë Jankullovska. / Zhurnal /

Dy incidente të njëpasnjëshme nxënësish të shkollave të mesme u shënuan këtë javë në lagjen e Autokomandës në Shkup. Tv Alsat vizitoi shkollën e mesme profesionale “Vllado Tasevski” ku edhe mëson Argjend Reçica, i cili para dy ditësh, bashkë me shokun e tij u sulmuan teksa zbrisnin nga autobusi, për të mbërritur në shkollë. Ai thotë se shkaku i sulmit ishte se ata flisnin shqip me njëri tjetrin.

“Kemi qenë duke zbrit prej autobusit dhe ata kanë përcjell situatën se jemi duke biseduar shqip dhe duke zbritur, rreth orës 7 e 10 minuta të mëngjesit ata na kanë sulmu. Kanë qenë grup afër 20 persona, ai shoku im është më shumë i lënduar, mu konkretisht me kanë sulmu në kokë edhe në krah sepse kam qenë duke u mbrojtur.”, tregon Argjent Reçica, nxënës.

“Problemet më të mëdha zakonisht ndodhin gjatë rrugës kur shkojmë prej në shkollë deri te stacioni i autobusëve. Më tepër udhëtojmë me 65-in për shkak se 50-a nuk është edhe aq e sigurt se më tepër ka, pala tjetër hyp në atë autobus për atë shkak.”, thotë një nxënëse.

Babai i Argjendit thotë se për sigurinë e nxënësve në përgjithësi duhet të interesohen edhe institucionet më të larta, ose në të kundërtën, vetë prindërit t’i përcjellin nxënësit kur vijnë dhe shkojnë në shkollë.

“Autoriteteve më të mëdha, sidomos partisë tonë që janë në qeveri ose ministri u bëj apel që me bë sigurimin e nxënësve. Neve na duhet siguria e fmive, nëqoftëse nuk munden këta ne prindërit mundemi mu organzu, që përdit nga një prej prindërve mundet me qenë kujdestarë prej mëngjesit deri në mbrëmjë para shkollës apo te ajo ura famkeqe aty që po ndodhë gjithcka.”, thotë Afrim Reçica, prind.

Ndërkohë zëvendësdrejtori i shkollës profesionale ‘Vllado Tasevski’, Arben Idrizi thotë se zgjidhja e këtij problemi është kujdestaria e stacionëve të autobusëve, nga ana e policisë.

“Ne më herët para disa muajve gjithë drejtorët e shkollave për rreth që zhvillojnë mësimin këtu, edhe të ministrisë së Punëve të Brendshme, inspektorë të lartë patëm mbledhje dhe u diskutu kjo cështje, gjithë ishin të mërzitur dhe morën përsipër që policia të bën kujdestari më të shpeshtë. Ata filluan të bëjnë më shpesh edhe këto 4 vitet e fundit unë mendojë se ka pas qetësi dhe nuk ka pas probleme sikur më herët. Por ndoshta ata ngecën edhe e ndalën punën e tyre.”, pohon Arben Idrizi, zëvendësdrejtor i shkollës profesionale “Vllado Tasevski”.

Nga Ministria e Brendshme për Alsat thonë se janë në kërkim të personave, autorë të incidentit, ndërsa nga hetimet e deritanishme dhe kontrollet e disa nxënësve të përfshirë në ngjarje, janë gjetur thika, doreza hekuri dhe shufra metali. Për këta nxënës është ngritur padi kundërvajtjeje. Gjithashtu nga MPB-ja njoftojnë se do të shtojnë numrin e policëve kujdestarë nëpër stacionet e autobusëve dhe pikat e frekuentuara me nxënës. /alsat-m/

Partitë politike shqiptare kanë reaguar sot ndaj fjalimit të djeshëm të Presidentit Ivanov në shënimin e përvjetorit të 60-të nga miratimi i Konventës evropiane për të drejtat e njeriut, në Strasburg.

Ivanov u shpreh decid në Asamblenë Parlamentare të Këshillit të Evropës, se “nuk ka fuqi në botë që mund ta ndryshojë identitetin e popullit maqedonas”, duke betonuar kështu edhe më tepër qëndrimin e kreut shtetëror të Maqedonisë për mos ndryshimin e emrit kushtetues.

Bashkimi Demokratik për Integrim (BDI), ka vërejtur se negociatat për emrin nuk kanë të bëjnë me identitetin e maqedonasve, por me emrin e shtetit.

Nga kjo parti edhe njëherë kanë përsëritur qëndrimin e tyre se negociatat për emrin duhet të vazhdojnë dhe në afat të shpejtë të gjendet zgjidhja për emrin, si pengesë për integrimin e mëtutjeshëm të Maqedonisë në strukturat ndërkombëtare.

“Klasa politike dhe kjo Qeveri është e detyruar të bëjë negociata dhe të gjejë zgjidhje për çështjen e emrit të shtetit. Nuk bëhet fjalë për identitetin e kombit, por për emrin e shtetit. Dhe, emri i shtetit, është kriteri themelor politik për të realizuar ambiciet dhe aspiratat kyçe të vendit, pra integrimi i Maqedonisë në BE dhe NATO”, ka deklaruar zëdhënësja e BDI-së, Ermira M. Devaja.

Ndërkaq, nga Demokracia e Re (DR), kanë kritikuar ashpër Presidentin Ivanov, duke e paralajmëruar atë se me retorikën e tillë po i bën dëm të madh interesave të qytetarëve, edhe atë, sipas deputetes Flora Kadriu, në emër të rejtingut të tij personal.

“Deklarata e Ivanov se nuk ka asnjë fuqi në botë që do të mund ta ndryshonte emrin, është tendencë që me populizëm të lirë të përfitojë rejting personal dhe rejting për parinë që e ka zgjedhur. Ne konsiderojmë se ai nuk është i vetëdijshëm se çfarë dëmi po shkakton me politikën e tij jo pragmatike dhe joracionale, e cila është në disharmoni të plotë me nevojat dhe kërkesat e qytetarëve të Maqedonisë”, ka theksuar Kadriu.

Ndërsa, lidhur me vlerësimet e Ivanovit se përmes Marrëveshjes së Ohrit respektohen standardet evropiane për të drejtat e njeriut, nga BDI janë shprehur se është pozitive që qëndrimet e Presidentit kanë filluar të ndryshojnë, ndërkaq nga DR-ja kanë akuzuar Ivanovin se është shembulli më i keq për zbatimin e kësaj marrëveshje. / Zhurnal /

Shtetet e Bashkuara planifikojnë t'i shesin aeroplanë luftarakë në vlerë prej 60 miliardë dollarësh Arabisë Saudite. Zyrtarët e Departamentit të Shtetit thanë se nuk presin që këto plane të kundërshtohen nga Izraeli.

Ky hap synon forcimin e vendeve të rajonit në kohën kur dyshohet se Irani synon të prodhojë armë bërthamore./rel/

Athinë - I dërguari i Kombeve të Bashkuara për luftimin e torturës, Manfred Novak, deklaroi se kushtet në burgjet greke dhe në qendrat e paraburgimit janë "tmerruese".

E enjte 21 Tetor 2010 11:25

Pasi vizitoi burgje, qendra paraburgimi, stacione policore, spitale burgjesh dhe qendra të ndalimit të migrantëve në të gjithë Greqinë, Novak arriti në përfundimin se gjendja ishte alarmante. "Të gjitha burgjet që vizitova ishin të mbi populluara", theksoi Novak.

Zyrtari i kombeve të Bashkuara i kërkoi Greqisë që të reformojë sistemin e drejtësisë si një nga rrugët për të zgjidhur problemin e mbipopullimit të burgjeve. Po ashtu, Novak kërkoi ngritjen e një mekanizmi të pavarur për hetimin e ankesave ndaj policisë./start/

Presidenti Turk Abdullah Gyl ështe duke pritur Presidentin gjerman, Kristian Vulf .

Presidenti gjerman, i cili përpara se të vijë në Ankara tërhoqi vëmendjen me deklaratën "Edhe Islami është një pjesë e Gjermanisë, unë jam presidenti edhe i myslimanëve", përsëriti edhe një herë pikëpamjet e tij.

Presidenti Gyl i dha mbështetje homologut gjerman dhe tha: "Edhe unë jam presidenti i nënshtetasve jo myslimanë".

Pas mesazheve të rëndësishme që u dhanë në Pallatin Presidencial Çankaja, Presidenti gjerman u takua me Kryeministrin Rexhep Tajip Erdoan.

Vizitat nëpër objektet fetare përbëjnë një pjesë të rëndësishme të programit të Presidentit Vulf në Turqi. Në këtë kuadër ai është takuar edhe me Kryetarin e Entit Fetar të Turqisë, Ali Bardakollu./trt/