Mos ia lejo vetes t'i bësh padrejtësi shërbëtorëve të tu!
Mos ia lejo vetes t'i bësh padrejtësi punonjësve dhe vartësve të tu! Mos ia lejo vetes t'i bësh padrejtësi një gruaje të ve!
Mos ia lejo vetes t'i bësh padrejtësi një jetimi!
Mos ia lejo vetes t'i bësh padrejtësi të vobektëve dhe njerëzve në nevojë! Mos ia lejo vetes t'i bësh padrejtësi grave!
Mos ia lejo vetes t'i bësh padrejtësi çirakut, ose t'ia vonosh rrogën! Ruaje veten nga mallkimi dhe lutja kundër teje e dikujt që i ke bërë padrejtësi! Mos prano të shoqërohesh me zullumqarë, se mund të përfshijë mallkimi i personave që u ka bërë zullum!
Mos prano të ecësh mbi tokën e Zotit dhe nën qiellin e Tij, ndërkohë që i ke hyrë dikujt në hak!
Thotë Zoti në Kuran:"Atëherë, një lajmëtar midis tyre do të thërrasë: “Mallkimi i Allahut është mbi zullumqarwt." (Araf, 44)
Njeriu i padrejtë dhe zullumqar është i mallkuar dhe kurrë nuk do i shpëtojë dorës së drejtësisë.
"Zullumqarët nuk do të kenë askënd që t’i ndihmojë." (Bekare, 270)
Mos ji nga ajo kategori njerëzish që me të tjerët sillet mirë, kurse familjarët e tij i trajton keq!
Mos ji nga ata njerëz që i bëjnë padrejtësi grave!
Mos ia lejo vetes të vësh dorë mbi gruan tënde!
Mos ia lejo vetes ta ofendosh, nënshtrosh dhe nëpërkëmbësh!
Mos ia moho dhe mos e provo nga të drejtat e saj!
Mos u bëj padrejtësi fëmijëve të tu duke i trajtuar keq!
Mos u bëj padrejtësi prindërve të tu duke u sjellë keq me ta!
Mos prano t'i bësh padrejtësi qoftë dhe vetes tënde dhe kjo duke heshtur kur të tjerët të ofendojnë dhe të nëpërkëmbin!
Mos prano të fillosh agjërimin e Ramazanit me padrejtësi mbi supe!
Mos prit të vijë vdekja dhe të ndahesh nga kjo botë, me zullume në kurriz. Thotë Zoti në Kuran lidhur me ndëshkimin e zullumqarëve Ditën e Kiametit:"Ne kemi përgatitur për mohuesit keqbërës një zjarr, që do t’i rrethojë nga të gjitha anët (si çadra).
Nëse do të kërkojnë ndihmë, do t’u jepet një ujë si xehja e shkrirë, që do t’ua përcëllojë fytyrat. Sa pije e tmerrshme është ajo e sa strehim i keq është ai (zjarri)!" (Kehf, 21)
Nëse të mashtron forca dhe pushteti që të sillesh padrejtësisht me njerëzit, kujto forcën dhe pushtetin e Allahut të madhëruar.
Një ndër ligjet e Zotit në këtë botë, është se kushdo që bën padrejtësi mbi njerëzit e tjerë, do e shijojë padrejtësinë në kurrizin e tij, herët a vonë.
Thotë Zoti në Kuranin famëlartë:"Dhe mos anoni nga ata që bëjnë padrejtësi, përndryshe do t’ju përcëllojë Zjarri. Ju nuk do të keni mbrojtës tjetër përveç Allahut dhe nuk do të ndihmoheni." (Hud, 113)
Thotë Profeti a.s:"Kur umeti im të frikësohet nga përballja me zullumqarin dhe të ketë frikë t'i thotë:"Ti je zullumqar!" laji duart prej tyre." Nuk ka më dobi tek njerëz të tillë.
Në një hadith tjetër, Profeti a.s thotë:"Duhet të urdhëroni për mirë dhe të ndaloni nga e keqja. Përndryshe Zoti mund t'ju sjellë ndëshkimin e Tij, ku do i luteni dhe Ai nuk do u përgjigjet."
Ne sot përballemi ose me njerëz që u është bërë padrejtësi, janë nëpërkëmbur dhe poshtëruar, ose me njerëz zullumqarë, që shfrytëzojnë kompetencat dhe aftësitë që u ka dhënë Zoti, për të poshtëruar dhe dhunuar të tjerët.
Unë i bëj thirrje çdo myslimani, zullumqar qoftë apo i nëpërkëmbur, që të reflektojë dhe t'i thotë "ndal" kësaj gjendjeje. Nëse je i nëpërkëmbur, i dhunuar dhe i poshtëruar dhe nuk ke çfarë të bësh, të paktën ngriji duart drejt Atij që dëgjon çdo pëshpërimë dhe thuaji:"O Zot! Unë nuk kam tjetër veç Teje, prandaj më ndihmo dhe më nxirr nga kjo gjendje!" Kërko ndihmën e Atij që ka në dorë gjithçka dhe është i Gjithëfuqishëm e i pushtetshëm mbi këdo tjetër. Gjëja më e keqe është që të durosh padrejtësinë dhe të mos kesh mundësi t'i ngresh qoftë dhe duart të kërkosh ndihmën e Zotit.
Author:Bujamin Salija on Sunday,October 14,2010
Thu 23 Mar 2023 - 2:31 nga 
