“Kisha” në Kalanë e Shkupit, reagon FRI

Me
rastin e mbirjes së objektit misterioz në Kalanë e Shkupit, Forumi
Rinor Islam, si pjesë e sektorit civil në RM, e ngrit zërin e vet, duke
kërkuar nga organet relevante që sa më shpejtë të ndërmarrin hapa
preventiv për të parandaluar rritjen e pakënaqësisë së qytetarëve të
Republikës së Maqedonisë dhe ngritjen e mëtejme të tensioneve ndëretnike
dhe ndërkonfesionale.
Forumi Rinor Islam shfaq dyshimet e veta se edhe ky objekt paraqet
një veprim e lojë të pushtetarëve maqedonas, të cilët me mjeshtërinë
tanimë të dëshmuar dëshirojnë t’i vendojnë qytetarët para aktit të
kryer. Ngritja e këtij objekti pa solemnitetet përcjellëse të vendosjes
së gurë themelit (ashtu siç jemi mësuar t’i shohim zakonisht), pastaj
mungesa e pamjes dhe projektit ideor, që sipas ligjit duhet të jenë të
vendosura në afërsi të objektit, bashkë me elementet tjera përcjellëse
që duhet të ketë një ndërtim i tillë, na e shton edhe më shumë dyshimin
se plani përfundimtar i këtij objekti është krishterizimi i kalasë së
Shkupit, për më tepër që i njëjti i ka të gjitha elementet e një kishe.
Duke pasur këtë parasysh, Forumi Rinor Islam kërkon nga faktori
politik shqiptar në pozitë dhe opozitë që të veprojë fuqishëm dhe
njëzëri ndaj objekteve të tilla dhe provokimeve tjera të ngjashme në
aspektin kombëtar dhe fetar, si dhe të jemi më aktiv në parandalimin e
gjërave të kësaj natyre.
Lusim Zotin që të gjithë të vetëdijesohemi dhe të punojmë për të
mirën e përgjithshme, para daljes së situatës prej kontrollit, të cilën
besojmë se askush prej nesh nuk e dëshiron.

Punimet rreth ndërtimit të objektit të shumëpërfolur në
Kalanë e Shkupit, duhet të ndalen. Ky është qëndrimi i nënkryetarit të
BDI-së Izet Mexhiti sipas të cilit, edhe pse pa paragjykim, rindërtimi i
këtij objekti paraqet ndërhyrje dhe zhvlerësim të vlerave historike.
“Ne
respektojmë nevojën për gjurmime dhe konfirmimin e vlerave të gjetura
historike por Kalaja si fortesë që i ka mbijetuar shumë periudhave,
kulturave dhe pushtimeve, është historia vetë. Mesazhi ynë sot është i
qartë. Me krijimin e traditave kulturore në Maqedoni bashkëpjesëmarrës
dhe bashkëpërgjegjës janë edhe shqiptarët. Duke mos dashur të
paragjykojmë se për çfarë objekti bëhet fjalë, për shkak të dilemave dhe
shqetësimeve të mëdha që ka shkaktuar, u bëjmë thirrje përgjegjësve që
menjëherë të ndërpresin punimet”, deklaroi Izet Mexhiti, nënkryetar i
BDI-së.
Ndërkohë, arkitekti Mirosllav Gërçev tha se është e
paligjshme të rindërtohen objektet që mund të hasen nëpër lokalitete të
ndryshme pasi sipas tij, ato mund të keqpërdoren dhe të shtrembërojnë
historinë sipas dëshirës.
“Është krejtësisht e paligjshme, kjo që po
ndodh në Kalanë e Shkupit dhe jo vetëm tani por edhe ndërtimet e tjera
janë ndërtime të paligjshme. Ndoshta një prej pasojave më serioze është
qëllimi i këtyre ndërtuesve të paligjshëm, që të falsifikojnë historinë,
pasi ata me paragjykimet e tyre aktive që janë kriminele, në bazë të
prejardhjeve të tyre futen në shtresat historike dhe bëjnë përzgjedhje
personale se çfarë do të prezantojnë nga ato që kanë gjetur, çfarë kanë
pasur dhe çfarë do të rindërtojnë, në thonjëza kuptohet”, tha Mirosllav
Gërçev, arkitekt.
Lidhur me këtë objekt, qëndrimi mbetet i pa
harmonizuar edhe brenda vetë BDI-së. Ndryshe nga Mexhiti, që kërkon
ndërprerjen e punimeve, disa ditë më parë sekretari i përgjithshëm i
BDI-së Abdilaqim Ademi tha se BDI nuk është kundër ndërtimit të këtij
objekti.
“Ne do të reagojmë gjithmonë kur do të ketë tendenca për të
instaluar objekte fetare ose për të anashkaluar periudhat ilire ose
periudhat që kanë të bëjnë me shqiptarët në Maqedoni. Në këtë rast nuk
bëhet fjalë për objekt fetar, por bëhet fjalë për një pjesë të Muzeut
Arkeologjik. Ne gjithmonë do të jemi kundër nëse eventualisht dikush
tenton të ndërtojë objekte fetare, sepse ata që janë përcaktuar për
pamjen e këtij objekti sigurisht që janë bazuar diku dhe në ndonjë
periudhë tjetër”, deklaroi ditë më parë Abdilaqim Ademi, sekretar i
përgjithshëm i BDI-së.
Ndërkohë arsyetimi i Ministrisë së Kulturës
dhe Drejtorisë për Mbrojtjen e Monumenteve Kulturore, vazhdon të jetë se
‘në këtë rast nuk bëhet fjalë për kishë, por për objekt që do të
shfrytëzohet si pjesë e muzeut arkeologjik ku do të eksponohen
artefaktet e gjetura në atë lokalitet që nga viti 2007 kur filluan
gërmimet. Valmir Kuçi