Ndërhyrja e Policisë, reagon Forumi Musliman i Kosovë

Forumi Musliman i Kosovës, si organizatë e cila monitoron dhe
mbikëqyr vlerat e kulturës dhe traditës islame në Kosovë, përmes një
komunikate për medie, ka reaguar ndaj ndërhyrjes policore me rastin e
faljes së namazit të xhumasë në rrugë përball xhamisë së Qarshisë, si
shenjë protestë në kërkesat të arsyeshme për lejimin e një hapësire dhe
leje përkatëse nga autoritet komunale të Prishtinës për ndërtimin e një
xhamie qendrore në qendër të Prishtinës si nevojë imediate e besimtarëve
musliman të Prishtinës.
“Forumi Musliman i Kosovës e ndien veten të obligueshëm që të
prononcohet me këtë Deklaratë për shtyp me të cilën jo vetëm që i
përkrah protestat e besimtarëve muslimanë, por edhe aktivisht merr pjesë
në Lëvizjen Bashkohu në mesin e shumë OJQ-ve pjesëmarrës të shoqërisë
civile muslimane në Kosovë në njërën anë, ndërsa në anën tjetër gjykon
ashpër ndërhyrjen e policisë së Kosovë në momentin e faljes së namazit
të xhumasë, që është një shkelje flagrante e të drejtave njerëzore, të
lirisë së shprehjes së përkatësisë fetare si dhe të praktikimit të lirë
dhe publik të riteve fetare, me ç’rast si pasojë e kësaj pas prangosjes
së një besimtari,ai është rrahur dhe keqtrajtuar në mënyrë më brutale në
lokalet e policisë në Prishtinë”, thuhet në komunikatë.
Ky forum shprehet se kanë tentuar të pamundësojnë një veprim të
tillë, ndërhyrjen e policisë së Kosovë, mirëpo, për dallim nga java e
kaluar, sipas tyre, “tani policia e Kosovës, me urdhër nga strukturat
politike udhëheqëse komunale apo qendrore , ka ndërhyrë në mënyrë
brutale, dhe falë angazhimit tonë maksimal kemi arrit që të parandalojmë
një eskalim më të gjerë të dhunës”.
Forumi Musliman i Kosovës thekson se, edhe pse toleranca dhe harmonia
fetare si në Kosovë, ashtu edhe në gjithë shoqërinë shqiptare, është
rezultat pikësëpari i shumicës dërmuese muslimane të popullit tonë, ata
kërkojnë edhe prej pakicës katolike shqiptare në Kosovë që të jap
kontributin e saj për një harmoni të tillë, e jo, sipas tyre, t’u japin
leksione dhe udhëzime se ç’duhet bërë. Këtë ata e bazojnë në komunikatën
e fundit të lëshuar nga zyra ipeshkvnore e dioqezës Shkup- Prizren, ku
mes tjerash, thuhet: “Në kohën e fundit, shfaqen disa dukuri të huaja
dhe të dëmshme për popullin dhe shtetin tonë, dukuri këto të cilat
rrezikojnë, edhe ashtu gjendjen e brishtë e jostabile që kemi. Aq më
tepër na befason heshtja institucionale, politike, shoqërore dhe
kulturore ndaj këtyre dukurive të dëmshme”.
Përmes kësaj komunikate, Forumi Musliman i Kosovës i bënë thirrje
organeve gjegjëse komunale që sa më parë që është e mundur që të
realizojë këtë nevojë imediate të besimtarëve muslimanë të Prishtinës,
duke ndarë parcelën e duhur dhe lejen përkatëse për ndërtimin e xhamisë
qendrore në qendër të Prishtinës, e të zvarritur gjer tani plot 10 vite
me radhë, pasi që, siç theksohet në komunikatë, “tani e tutje do të
angazhohet dhe do të përdorë të gjitha mjetet e duhura demokratike dhe
nuk ka më fuqi që do të mund të ndal gjer në realizimin e plotë të këtij
qëllimi fisnik”.
Forumi Musliman i Kosovës i bën apel të gjithë besimtarëve shqiptarë
muslimanë që të jenë maksimalisht të matur, por edhe të qëndrojnë stoik
dhe të palëkundur në kërkesat e tyre për ndërtimin e xhamisë qendrore në
qendër të Prishtinës, dhe se me asnjë çmim nuk do të largohen kurrë nga
identiteti i tyre kombëtar shqiptar dhe fetar musliman.
(Zeri)