Kosovë “Bashkohu”: Presidentja ofendoi popullin musliman

Lëvizja “ Bashkohu”, në emër të muslimanëve të Kosovës, shpreh indinjatën e thellë dhe njëherit e kundërshton hapur një pjesë të fjalimit të presidentes Atifete Jahjaga, të mbajtur me datën 15.10.2011 në Zym të Hasit në manifestimin “Takimet e Gjeçovit”.

Përmes një komunikate për medie, kjo lëvizje thotë se Presidentja e vendit, duke bërë përpjekje që ta glorifikojë kanunin e Lekë Dukagjinit, nuk i mjaftoi t’i cekë dobitë që sipas saj kanë rrjedhur si rezultat i praktikimit të kanunit të Lekë Dukagjinit, por ajo e sulmoi rëndë sistemin juridik Islam – Sheriatin.

“…e sulmoi rëndë sistemin juridik Islam – Sheriatin – për të cilin presidentja tha se ishte kundër nderit dhe dinjitetit të njeriut dhe dinjitetit kombëtar, ndërsa kanuni i “Lekë Dukagjinit” sipas saj ishte ai që e mbrojti këto për më shumë se pesëqind vite”, thuhet në reagimin e lëvizjes “Bashkohu”.

Sipas lëvizjes “Bashkohu”, ky deklarim i presidentes së vendit, e cila, sipas lëvizjes, do të duhej të paraqiste personalitet unifikues, “ka prodhuar nxitje të urrejtjes fetare” dhe ka bërë që “ne, si muslimanë, të humbim besimin në institucionin e presidentit” përderisa këtë funksion ta ushtroj presidentja aktuale Atifete Jahjaga e cila nuk siguron paanshmëri në aspektin religjioz dhe nuk siguron unitet te populli i Kosovës.

“Ne kërkojmë nga presidentja e Republikës së Kosovës Atifete Jahjaga që t’i kërkoj falje publikisht popullit musliman të Kosovës për këtë fyerje të rëndë që i është bërë”, theksohet në reagim.

“Bashkohu” i bën thirrje presidentes së vendit ta lexoj kanunin e Lekë Dukagjinit dhe të Drejtën e Sheriatit “dhe pastaj do ta kuptoj se kush e mbron personalitetin dhe dinjitetin njerëzor dhe kombëtar, dhe se kush nxitë ne vëllavrasje pasojat e të cilit janë prezentë edhe sot e kësaj dite”. /zëri/