Ndarja solemne e diplomave në “Medresenë Isa Beu”

Në SHMI “Medreseja Isa Beu” sot u bë ndarja solemne e diplomave të maturantëve të kësaj medreseje dhe paraleleve të shtrira në disa qytete tjera. Në këtë ceremoni ka marrë pjesë edhe kreu i BFIM-së, Reis Ulema, H.Sulejman ef.Rexhepi, sekretari i përgjithshëm i BFIM-së, h.Afrim.ef.Tahiri si dhe personalitete të tjera të pranishëm, profesorë, familjarë dhe nxënës. Drejtori i SHMI “Medreseja Isa Beu” Shkup, Ibrahim Idrizi deklaroi se SHMI “Medreseja Isa Beu” është vatër e dijes, arsimit, prespektivës. Ai shprehu mirënjohje për suksesin e arritur të medresantëve të shkollës qendër dhe të të gjitha paraleleve të shtrira në vend. Në fund falënderoi Reis Ulemanë për kontributin e dhënë në mbarvajtjen dhe funksionimin e kësaj vatre të edukimit dhe arsimimit, si dhe për përkrahjen e kultivimit të vlerave islame në Maqedoni. Kreu i BFIM-së, Sulejman Rexhepi theksoi se “ tani jemi para një akti shumë me peshë për historinë tonë ngase diplomojnë gjenerata e re e kësaj medreseje. Historia që ne gjithnjë frymëzohemi është ajo e Muhamedit a.s, e cila nuk ka përfunduar, por që vazhdon të jetë aktuale. Andaj e gjithë kjo që tani po e hasim në shoqërinë muslimane nuk është problem teorik, por praktik, neve nuk jemi të pozicionuar atje ku ka paraparë Allahu fuqiplotë. Kjo është pasojë e injorancës që ka filluar kah moti t’i rikthehet muslimanëve. Kjo është rezultat që ne sot nuk paraqesim forcë ekonomike, politike, ushtarake etj. Arsyeja e kësaj ngecjeje në të gjitha poret e jetës është se neve jemi larguar nga fundamentet islame”.

H. Sulejman ef. Rexhepi ju shprehi suksese të diplomuarve në studime duke e lutur Allahun fuqiplotë që të kenë shëndet dhe perspektivë të ndritur. Në fund Reis Ulema ua shpërndau diplomat të gjithë nxënësve të Medresesë Isa Beu dhe paraleleve të saj si dhe u shpallën nxënësit e gjeneratës. (INA)