Pas rënies së Raportit Mavi Marmara në dorën e shtypit dhe mospërmbushjes së kërkesave të Turqisë nga Izraeli, Ankaraja po vë në zbatim masa detyruese tepër të fuqishme.
Ministri i Punëve të Jashtme të Turqisë, Ahmet Davutollu deklaroi se marrëdhëniet me Tel-Avivin nuk do të normalizohen deri në përmbushjen e kërkesave.
“Pesha e kësaj situate bie vetëm mbi qeverinë izraelite dhe veprimin e saj të papërgjegjshëm”, u shpreh Davutollu.
Kështu kreu i diplomacisë turke bëri publike arsyen e sanksioneve në drejtim të Izraelit.
“Marrëdhëniet me Tel-Avivin do të reduktohen në nivelin e sekretarit të dytë. Të gjithë nëpunësit e ambasadës, me në krye ambasadorin, do të kthehen në vendin e tyre jo më vonë se ditën e mërkurë. Janë pezulluar të gjitha marrëveshjet ushtarake me Izraelin. Turqia do të marrë çdo lloj mase të nevojshme për lirinë e lundrimit në Mesdheun Lindor”, theksoi Ahmet Davutollu.
Duke prekur edhe temën e rënies së Raportit Mavi Marmara në duart e mediave të shkruara, Ministri Davutollu tha se lidhur me këtë është çuditur edhe vet Sekretari i Përgjithshëm i Organizatës së Kombeve të Bashkuara, Ban Ki-Mun.
Davutollu përsëriti edhe një herë kushtin e plotësimit të kërkesave për normalizimin e marrëdhënieve.
“Në pikën ku gjendemi sot, Izraeli ka shpërdoruar të gjitha mundësitë që i janë njohur deri më tani. Qëndrimi ynë ndaj këtij veprimi të jashtëligjshëm të Izraelit, që nga momenti i parë, ka qenë i qartë dhe parimor. Pa u përmbushur kërkesat dhe disa kushte të caktuara, nuk do të normalizohen as marrëdhëniet”, përfundoi z. Davutollu.
(TRT)
Thu 23 Mar 2023 - 2:31 nga 
