Burim-Sherifi
Imam-Aktiv
Numri i postimeve : 760
Data e regjistrimit : 02/05/2010
Mosha : 44
Nacionaliteti-Sheti : Tetovë-Maqedoni
 | Titulli: ROLI,PERGJEGJESIA DHE SFIDAT ME TE CILAT BALLAFAQOHET IMAMI NE KETE DETYRE TE SHENJTE..!  Thu 8 Sep 2011 - 23:03 | |
| Duke përfituar nga përvoja dhjetë vjeçare e imamit në emër të kolegëve të mi do të përpiqemi të shtrojmë para jush esencën e misionit dhe preokupimit tonë me qëllim që të arrihet efekti i dëshiruar në këtë plan, në kontekst të situatave dhe të mundësive që ka institucioni ynë, përkatësisht IMAMI dhe Bashkësia Islame e Kosovës.
Bazuar në kushtetutën e BIK, organizimin hierarkik të kësaj Bashkësie, imami është instancë e rëndësishme parësore dhe këtë për arsye se nga ai nivel krijohet lidhja-raporti besimtarë-institucion. Andaj përgjegjësia e imamit është e drejtpërdrejtë dhe në masë të madhe tregues i cilësive të organizimit e të veprimit të këtij institucioni..
Ky fakt flet qartë për cilësitë në radhë të parë njerëzore. por edhe profesionale që duhet të ketë imami për të pasur suksese në predikimin e filozofisë e të moralit të fesë Islame, mbështetur në parimet Islame, e në të njëjtën kohë ruajtjen dhe kultivimin e ndjenjës së përgjegjësisë tek çdo besimtar si dhe të dinjitetit të BI-së dhe të komunitetit Islam në përgjithësi. Veprimtaria e imamit përqendrohet në këto aspekte të parimeve të Islamit: Ligjërimit, Mësim-Besimit, etj..
Përveç misionit parësor që ka imami, situatat, nëpër të cilat kaluam si komb, imponuan angazhimin shumë më të gjithanshëm në interes të lirisë e të progresit dhe kjo u bë me ndërgjegje e vetëdije të lartë si ndjenjë e përgjegjësi qytetare e etnike. Imamët ligjëratat e tyre i organizuan dhe përqendruan drejtë e në shërbim të motivimit për qëndresën në realizim të idealit të lirisë e të Pavarësisë, varësisht nga konteksti i zhvillimeve politike e të rezistencës së armatosur.
Konsistenca e angazhimit në shërbim të lirisë e të atdheut dëshmon qartë misionin e prijësit fetar-imamit që është përcaktuar qartë edhe nga Kushtetuta Hyjnore. Janë dëshmorët ata që të parët e parandjenë këtë detyrë, dhe ata nga radhët e imamëve. Përpjekja dhe këmbëngulja në këtë mision e shton edhe vlerën dhe dinjitetin e BI-së të Kosovës si pjesë e shoqërisë së lirë.
Imamët janë trashëgimtarë të pejgamberëve
Në kryerjen e detyrave tona të përditshme padyshim që udhëhiqemi nga parimet islame, por duke u bazuar në shëmbëlltyrën e Muhammedit a.s, dijen, metodën që ai ka përdorur dhe që vlerësohet si imami më i suksesshëm i të gjitha kohërave. Gjithashtu edhe duke shfrytëzuar përparësitë dhe mundësitë që ka krijuar zhvillimi i përgjithshëm, e në veçanti zhvillimit i teknikës dhe i teknologjisë, të cilat po të shfrytëzoheshin si duhet do të rrisin efikasitetin në kryerjen e detyrave që kemi.
Të jesh në krye të kësaj detyre, është sa kënaqësi dhe mundësi reale për përfitim shpërblimi nga Allahu, aq edhe përgjegjësi para Tij.
Për të qenë kjo veprimtari e suksesshme, frytdhënëse, në raport me kohën, rrethanat dhe kushtet momentale, imami-predikuesi islam duhet që:
1) Të ketë përgatitje profesionale, gjegjësisht të jetë njohës i mirë i asaj çështjeje të cilën angazhohet ta predikojë, të interpretojë argumentueshëm, me fakte nga burimet e mirëfillta dhe literatura burimore për çështjen përkatëse. Kjo arrihet duke u angazhuar në vazhdimësi në studim e hulumtim, sepse jorastësisht i tha Allahu Muhammedit a.s:
“Dhe thuaj: Zoti im më shto diturinë!” (Ta Ha, 113).
2) Në programin e punës së tij imami duhet të caktojë qartë prioritete pa humbur kohë në çështje të rëndësisë dytësore, sepse në këtë frymë ishte porosia e Muhammedit a.s për Muadh bin Xhebelin kur e dërgoi me misionin e predikuesit në Jemen.
3) T’i ketë bazë të veprimit të tij parimet e metodologjisë së të vepruarit të Muhammedit a.s, sepse suksesi i Tij në këtë lëmi vlerësohet nga Allahu si absolutisht më i suksesshmi, kur tha:
“Ju e kishit shembullin më të lartë në të dërguarin e Allahut”. “Ahzabë, 21).
4) Të dominojë bindshëm qëllimi se përmes detyrës së imamit arrihet kënaqësia e Allahut dhe shpërblimi i Tij në të dy botërat e të kihet kujdes maksimalisht që të mos infiltrohet në punën e tij ndonjë interes tjetër. Shih pra çfarë vlerësimi i jep Allahu në Kur’an kësaj pune:
“E kush është në rrugën më të mirë se ai që thërret (udhëzon( në rrugën e Allahut që bënë vepra të mira, dhe që thotë: ‘Unë jam prej Muslimanëve?” (Fussilet, 33).
Edhe Muhammedi a.s. thotë:
“Sikur ta udhëzonte Zoti një person përmes udhërrëfimit tënd është më mirë sesa një pasuri e tërë në duart e një njeriu”. (Hadith).
5) Është kërkesë e aktualitetit mobilizimi ynë në plasimin e vlerave të Islamit duke përmbushur zbrazësitë në këtë plan nga ndikimet e pamira në të rinjtë dhe familjet tona. Kjo shton nevojën e hartimit të një programi në nivel të BI-së për të ruajtur komunitetin Islam nga shumë të liga, të cilat i sjellin zhvillimi dinamik i bashkëkohësisë duke konsoliduar bashkëpunim me të gjitha strukturat dhe shtresat e shoqërisë.
6) Të ndikojë në mënyrën efektive me shembullin personal tek bashkëbiseduesit, gjegjësisht t’i paraprijë veprimi konkret fjalës së shprehur, apo udhëzimit, e në ndërkohë të bashkëveprojnë paralelisht në arritjen e efektit të synuar. Në të kundërtën bie ndesh fjala me veprim, nuk arrihet ajo çka dëshirohet dhe vjen në shprehje qortimi i Allahut në Kur’an:
“Pse po e thoni (ta veprojnë të tjerët( atë çka nuk e veproni vetë?! Është mëkat i madh te Allahu ta thoni atë që nuk e punoni”. (Saff, 3).
7) Të kihen parasysh tri parime të da’ves të përmendura në ajetin 125 kur’anor të kaptinës Nahl: Thirrje në rrugën e Allahut me urtësi, këshilla të bukura dhe polemika në formën më të mirë, në mënyrë që këto metoda të aplikohen varësisht nga bashkëbiseduesi, e paraprakisht duhet njohur mentalitetin e tjerëve, aspektin psiko-social, shkallën e gatishmërisë për bashkëbisedim, pra të diagnostifikohet saktë e më pas terapia adekuate në bazë të recetës së lartpërmendur:
“Ti (Muhammed) thirr për në rrugën e Zotit tënd me urtësi, këshillë të mirë dhe polemizo me ata (kundërshtarët) në atë mënyrë që është më e mira”.
Mundësitë dhe fushëveprimi i imamit
Sfida me të cilat ballafaqohet imami sot janë të shumta dhe të ndryshme, mirëpo edhe mundësitë e veprimit në tejkalimin e tyre janë të mëdha e mund të arrihen rezultate inkurajuese, duke krahasuar me të kaluarën. Por vetëm duhet dashur, ditur e shfrytëzuar këto mundësi. Nuk mjafton sot, t’i bëhet ballë gjithë kësaj propagande që zhvillohet e as të interpretohet esenca e programit hyjnor, vetëm përmes një ligjërimi të shkurtër në minberin (foltoren) e xhamisë, një herë në javë, e aq më pak kur ky ligjërim bëhet, në të shumtën e rasteve, vetëm në gjuhën arabe e nga pjesa dërmuese nuk kuptohet fare.
Janë krijuar kushtet ideale që përmes mënyrave komunikuese bashkëkohore si: fjala e shkruar (revista, libra ,broshura, etj.), kaseta e videokaseta, radio e TV, interneti etj., të avancohet interpretimi, zbërthimi e shpjegimi i fjalës së Zotit. Segmenti tjetër, organizimi i mësim-besimit me të vegjlit, tribuna shkencore publike për të ngriturit, ligjërata tematike për të rinjtë, depërtimi nëpër forume të ndryshme me qëllim ndikimi e parandalimi të dukurive devijante në shoqëri. Të gjitha këto janë në kuadër të fushëveprimit të Imamit në rrethana aktuale dhe imperativ i kohës në të cilën jetojmë.
Kërkesa të kohës nga përvoja e imamit
Për të qenë më frytdhënës puna e Imamit në fushën e predikimit dhe për të ngritur shkallën e profesionalizmit të tij, në bazë të përvojës nga imami, në emër të pjesëmarrësve të këtij seminari, për BI-në e Kosovës, gjegjësisht Kryesinë e saj, propozoj që në të ardhmen të angazhohen që:
1) Të shfrytëzohet objekti ideal i Medresesë dhe salla e amfiteatrot e institucioneve tona të shtetit për organizimin e seminareve, kurse të trajnimit për imamë, pasi që janë krijuar mundësitë e sjelljes së kuadrove eminente nga Universitetet e ndryshme Arabe e Islame, si Shejh Abdulkadër Arnauti, Shuajb Arnauti, Jusuf Kardavi, etj. Këto kurse trajnimi mund të jenë në kohëzgjatje 2-3 javore me një program të ngjeshur, të përfshihen imamët e dy e më tepër Këshillave e kështu me radhë.
2) Të sforcohet bashkëpunimi në linjën vertikale, Kryesi e BI-së – Këshill, i BI-së – Imam, përmes takimeve më të shpeshta e të rregullta.
3) Të stimulohet imami me publikimin e punës së tij në buletinet e BI-së, si “Dituria Islame”, “Edukata Islame”, “Takvimi” etj. Të organizohet një herë në vit zgjedhja e imamit më të suksesshëm mbi bazën e kritereve paraprake dhe të çmohet puna e tij edhe në këtë formë.
4) Të insistohet pareshtur në të gjitha nivelet shkencore të arsimit tonë, duke u argumentuar bindshëm se futja e lëndës së mësimit fetar në programet shkollore është në interes të të rinjve në parandalimin e dukurive devijante në shoqërinë dhe njëherit të spastrohen tekstet mësimore nga ideologjizmat dhe ateizmat.
5) Të nivelizohet edhe imami me përgatitje të njëjtë profesionale me punëtorët tjerë të administratës në aspektin financiar në mënyrë që të mos i iket detyrës së imamit. Kjo arrihet me një centralizim të të mirave materiale me të cilat posedon BI e Kosovës.
Le të shërbejë kjo kumtesë imja si një problematizim i çështjeve praktike për të diskutuar dhe ofruar zgjidhje në shërbim të misionit tonë të shenjtë dhe të kredibilitetit të BI-së në tërësi.
Ju faleminderit! 
Burim sherifi
| |
|
