Skandal në maternitetin e Fierit, foshnjat hidhen në plehra

Rasti më i fundit u shënua dy ditë më parë, kur poshtë urës së lumit
Gjanica u gjet nga fëmijët romë një foshnjë e pajetë e seksit mashkull.
Si ka përfunduar në lumë foshnja?!

Burime konfidenciale nga
materniteti i Fierit pohojnë se foshnja është hedhur pas abortit në një
kazan plehrash, ndërsa nuk dinë gjë nëse fëmijët apo qentë e kanë
degdisur trupin e vockël të pajetë në ujërat e lumit. Ndërkohë, burimet
zyrtare nga policia janë kontradiktore me burimet zyrtare të
maternitetit, në lidhje me këtë ngjarje. Zëdhënësja e policisë së
Fierit, Valbona Meço thotë se nuk bëhet fjalë për një foshnje, por për
një fetus.

“Më 2 shkurt, një 25- vjeçare së bashku me mamanë e
saj ishin nisur nga Tirana dhe po udhëtonin me furgon drejt Vlorës.
Gjatë rrugës, 25-vjeçaren, e cila ishte shtatzënë 4-muajshe e kanë
kapur dhimbjet. Ajo ka zbritur në Fier dhe ka shkuar në maternitet, ku
dhe ka abortuar. Pas marrjes së mjekimit nga mjekët specialistë, 25-
vjeçarja është larguar së bashku me nënën e saj, ndërkohë që fetusi me
peshë 600 gr është lënë në maternitet”, - shprehet Meço.

E
pyetur për faktin sesi ka përfunduar fetusi në lumin Gjanica dhe për
25-vjeçaren që abortoi, zëdhënësja e policisë së Fierit pohon se
“çështja është nën hetim”.

I kontaktuar me anë të telefonit,
shefi i maternitetit, Besnik Brahimi sqaron “se ka qenë një abort i një
nëne të re në moshë. Çështja është nën hetim, nuk mund të flas më
tepër”.

Nga ana tjetër, burime konfidenciale nga materniteti i
Fierit pohojnë se “më 2 shkurt, një nënë 25 vjeçe me inicialet E.H. ka
abortuar. Në kartelën e saj mjekësore shkruhet se ka qenë shtatzënë
27-javëshe. "Foshnja ka lindur i vdekur dhe është lënë në maternitet”.
Po këto burime bëjnë me dije, se njëra nga pastrueset e maternitetit e
ka marrë foshnjën e vdekur dhe e ka hedhur në koshin e plehrave.
“Foshnjën e pajetë mund ta kenë marrë fëmijët ose qentë dhe ka
përfunduar poshtë maternitetit, në lumin Gjanicë, që ndodhet vetëm 100
metra poshtë godinës së maternitetit. Rrjedha e lumit e ka çuar trupin
tek ura,(rreth 500 metra poshtë maternitetit),- pohojnë punonjëse të
maternitetit, të cilat nuk duan të identifikohen, pasi kanë frikë se
humbasin vendin e punës. Sipas mjekëve, materniteti ka vende të posaçme
që hedh fetuset apo foshnjat e vdekura. Këto të fundit, së bashku me
mbeturinat e tjera të dëmshme, mblidhen dhe digjen në
krematoriume./Start/