Besimtarët muslimanë në Bosnjë e Hercegovinë, në prag të festës së vitit të ri, janë porositur të mos e ndjekin zakonin që fëmijëve t’ju dhurojnë dhurata, ose këtë ta bëjnë përmes baba dimrit, sepse ato janë simbole që nuk i përkasin traditës islame

“Të gjithë e dimë se baba dimri nuk është element i pranuar në traditën islame. Figura e baba dimrit lidhet direkt me traditën krishtere dhe në të vërtetë ai është vetëm një tjetër emër për një person nga kjo traditë, i njohur si Shën Nikolla. Ata që mundohen ta fshehin këtë fakt dhe përpiqen ta paraqesin, ose ta imponojnë baba dimrin si simbol të pranueshëm, që u jep fëmijëve dhurata me rastin e vitit të ri kalendarik, festë, e cila gjithashtu ndërlidhet me besimin krishterë, në datën e lindjes së Jezusit (Isait a.s.), turbullojnë të vërtetën dhe e mashtrojnë opinionin, e në veçanti fëmijët muslimanë duke u përpjekur që t’ju imponojnë simbolet e huaja si neutrale", është mendim i ekspertit për fetva të Rijasetit (Këshillit) të Bashkësisë Islame në Bosnje e Hercegovinë, Enes Ljevakoviç, të publikuar në faqen e saj zyrtare.
Edhe pse, sipas tij, duhet të respektohet e drejta e zgjedhjes së çdo individi dhe familjes për të vepruar në përputhje me ndërgjegjen dhe angazhimin e tyre, ai thotë se festimi i vitit të ri kalendarik, dhe baba dimri nuk janë elemente të njohura e as të pranuara në traditën islame.
"Alija Izetbegoviq, në vitin 1996, pati thënë: Kjo nuk është festë jona. Ata (viti i ri dhe baba dimri) u janë imponuar muslimanëve dhe fëmijëve të tyre në kohën kur mungonte liria, si shenjë mbrojtëse e politikës së asaj kohe dhe si simbol i mësimeve dhe traditave jo islame, prandaj ato duhet të injorohen ", thotë Ljevakoviç. Eksperti i BI-së nga BeH në fund porosit se është e drejtë e secilit individ ose familje të pranoj ose jo vitin e ri dhe baba dimrin, por për këtë, sipas mësimeve islame, do të japë përgjegjësi.
Debati se a duhet ta festojnë muslimanët e BeH-së vitin e ri dhe a duhet ta pranojnë baba dimrin ishte iniciuar nga ish-kryetar i Presidencës së Bosnjës dhe Hercegovinës Alija Izetbegoviq në vitin 1996.
"Kjo nuk është festë jona," ishte porosia publike e Izetbegoviçit, e cila pati shkaktuar reagime të ashpra dhe negative për shkak të shkeljes së karakterit laik të shoqërisë boshnjake.