Kryeministri turk, Recep Tayip Erdogan, e ka etiketuar qeverinë
izraelite të kryeministrit Benjamin Netanyahu “ndoshta më të keqen” në
historinë e Izraelit, duke u shprehur se ky vend duhet të lirohet nga
ministri i Punëve të Jashtme, Avigdor Liberman, kanë cituar dje mediet
izraelite intervistën dhënë kanalit arab Al Jazeera.
“Derisa qeveria e Netanyahut të mos ndryshojë politikën e saj, nuk
mund të pres nga ne që ta ndryshojmë tonën”, deklaroi Erdogan, duke
shtuar se Turqia nuk ka interes të ripërtërijë asnjë marrëveshje me
Izraelin dhe se do të shqyrtojë përmirësimin e marrëdhënieve kur pala
izraelite të përmbushë kërkesat e saj.
Marrëdhëniet midis dy vendeve dikur aleate u përkeqësuan pas
ofensivës së Izraelit në Rripin e Gazës, para dy vjetëve. Pastaj,
kaluan në një krizë të paparë, pas sulmit izraelit mbi flotiljen turke,
e cila ishte nisur për të ndihmuar Gazën.
(Koha)
Thu 23 Mar 2023 - 2:31 nga 
