Qëllimi ynë është që të njohim më mirë Zotin tonë.
Nëse do e njohësh Zotin, do e duash Atë.
Është e pamundur që ta njohësh Zotin dhe të mos e duash.
Nëse do e njohësh, do t’i bindesh.
Nëse do e njohësh, do të kërkosh kënaqësinë e Tij.
Nëse do e njohësh, do të ndjesh mall për Xhennetin e Tij.
Nëse do e njohësh, do të rrjedhin lotë nga malli për ta takuar.
Shumë njerëz kanë frikë nga vdekja, ndërsa ti e dëshiron, pasi të takon me Zotin e Madhërishëm.
Nëse do e njihje, do të shkriheshe nga malli për Të.
Nëse do e njihje, ëmbëlsia që të fal adhurimi dhe bindja e Tij, do të dukej më e ëmbël se mjalti.
Nëse do e njihje, nuk do të pranoje të veproje asgjë që e zemëron Atë.
Nuk ka gjë më të madhe dhe më madhështore se kaq që ta themi.
Nuk do të kërkosh të fitosh Xhennetin, veçse pasi ta njohësh Zotin e Madhërishëm. Nuk do të frikësohesh nga ndëshkimi i Tij, veçse pasi ta njohësh.
Nuk do të kërkosh të arrish kënaqësinë e Tij, veçse pasi ta njohësh.
Nuk do të mund të falesh, agjërosh, kryesh Haxhin, lexosh Kur’anin, japësh lëmosh, veçse pasi ta kesh njohur.
Nuk do të largohesh dot nga harami që është bërë kaq i lehtë, veçse pasi ta kesh njohur.
Të githa këto i përmbledhim në një fjali:
*Nëse e njeh Urdhëruesin, i pranon lehtë urdhërat*.
Ne i thyejmë urdhërat e All-llahut të Madhërishëm, pasi nuk e kemi njohur mirë Atë.
Nëse do ishe i ndërgjegjshëm se urdhërat e kujt ke thyer, do e kuptoje sa gabim të rëndë që ke bërë. Mos shiko vogëlsinë e gjynahut, por shiko urdhërin e kujt ke thyer.
O vëlla dhe motër, a e kupton se urdhërat e kujt thyen çdo ditë?
A e kupton se kë zemëron sa herë kryen vepra të ulëta?
- “Nëse e njeh Urdhëruesin, i pranon lehtë urdhërat.”
- Sa më shumë ta njohësh Zotin, aq më shumë i dorëzohesh vullnetit të Tij.
- Sa më shumë ta njohësh, aq më lehtë do ta pranosh caktimin e Tij.
- Sa më shumë ta njohësh, aq më të lehta të bëhen fatkeqësitë me të cilat përballesh.
- Nëse do e njohësh, do të pajisë me dije dhe njohuri të rralla.
- Nëse do e njohësh, do e shohësh qartë dashurinë, mëshirën, keqardhjen, butësinë… e Tij.
*Njohuri që çon në bindje, bindje që çon në lumturi.*
Nëse kërkon ta njohësh Zotin e Madhërishëm, njihe nëpërmjet emrave të Tij.
Thotë Zoti i Madhërishëm në Kur’an:
”Ne nuk e shpallëm Kur’anin që të vuash...” (Ta Ha: 2)
- Feja nuk është për t’i bërë njerëzit të vuajnë, por për t’u dhënë lumturinë e humbur.
Thotë Profeti [sal-lall-llahu alejhi ve sel-lem]:
”Feja është këshillë…”
Qëllimi ynë është që të njohim sa më mirë Zotin tonë dhe nuk pretendojmë të jemi të pagabueshëm.
Teksa shkruajë këtë tekst, mua personalisht me vjen zor dhe turp të flas rreth Zotit të Madhërishëm.
Ne njerëzit e krijuar nga balta, flasim dhe prezantojmë Krijuesin Madhështor.
Vetë Profeti [sal-lall-llahu alejhi ve sel-lem] thoshte në lutje:
*Unë nuk mund të lavdëroj siç duhet. Ti je ashtu siç e ke përshkruar Veten Tënde!*
---------------------------------------------
Shkruar nga: Bujamin Salija
Thu 23 Mar 2023 - 2:31 nga 
