Imami i Podujevës e padit në EULEX Tërnavën
Rriten pakënaqësitë brenda udhëheqëisë së komunitetit mysliman të Kosovës. Imami i xhamisë “Met Podujeva” në Podujevë, Idriz Bilalli ka paralajmëruar padi kundër myftiut të Kosovës, Naim Tërnava bashkë me të tjerë imamë nga Kosova.
“Në shumë Këshilla lokale të BIK anekënd Kosovës po kontestohen zgjedhjet e Këshillave lokale të BIK, ku vullneti i votuesve është vjedhur nga Naim Tërnava dhe grupi i tij. I cili pretendon të rizgjidhet për të tretën herë myfti dhe të vazhdoj të gëzoj privilegjet. Kjo situatë pritet të rezultojë me një aktpadi të përgatitur nga dhjetëra imamë anekënd Kosovës, që do e dorëzojnë në prokurorinë e EULEX dhe tek ajo vendore. Aktakpadi kundër Naim Tërnavës për keqpërdorime dhe manipulim të procesit zgjedhor në BIK dhe për mos transparencë të financave të BIK.”, thuhet në një njoftim të imamit Bilalli.
Aty thuhet se kjo situatë po ndihmon për të marrë hov grupet e vogal radikale islamike.
“Në disa grupe të vogla po rekrutojnë radikal të rinj islamik duke praktikuar betimin “Bejah” të importuar nga jashtë Kosovës. Betim ky që sipas radikalëve, gjatë ritualit lejon dhunën dhe mbytjen e tradhtarëve të islamit. Të rekrutuarit radikal betohen, se nëse ndonjëri e tradhton grupin, grupi i radikalëve ka të drejt ta shpoj e ta therë me thika dhe ta mbys atë. Këto grupet po marrin hov në Kosovë, nga ndikimet nga jashtë, por edhe për shkakun se myftiu Naim Tërnava u ka krijuar hapësirë, duke keqmenaxhuar situatën dhe duke mos u distancuar kurrë ndaj disa imamëve radikal që janë nën ombrellën e Bashkësisë Islame/ BIK, të cilët i ka dekretuar vet Tërnava.”, thuhet më tutje në njoftim.
Përvec manipulimeve në zgjedhje, Bilalli dhe të tjerë imamë kërkojnë edhe llogari për buxhetin e BIK-ut, pasi që thonë se ka dyshime për keqpërdorime. (io)