Atifete Jahjaga
Presidentja e Kosovës Atifete Jahjaga i dërgoi një telegram ngushëllimi
homologut të Maqedonisë Gjorge Ivanov me rastin e vrasjes së pesë
qytetarëve, në afërsi të Shkupit. ‘I nderuari Presidenti Ivanov, në emër
të institucioneve të Republikës së Kosovës, të qytetarëve dhe në emrin
tim, Ju shpreh ngushëllimet më të thella për vrasjen makabre të pesë
qytetarëve tuaj. Shprehim indinjatën tonë për këtë akt të shëmtuar, duke
pasur besim që kriminelët do të përballen me drejtësinë’, thuhet në
telegramin e ngushëllimit të presidentes Jahjaga. Në telegram, Jahjaga i
kërkonte Ivanovit t’u shprehte ngushëllimet në emër të saj, edhe
familjarëve të viktimave, duke u bashkuar me dhimbjen e tyre. Alsat-M

Ministria e Jashtme e shqipërisë

Me anë të një njoftimi për shtyp Ministria e Jashtme e Shqipërisë
shprehu sot keqardhjen e thellë për ngjarjen e ndodhur në fshatin
Smillkovcë. Ministria e Jashtme e Shqipërisë iu shpreh ngushëllimet e
saj familjarëve të viktimave dhe inkurajon autoritetet shtetërore në
Maqedoni që të hetojnë plotësisht këtë ngjarje. Tirana Zyrtare vlerëson
se në këtë situatë, është e nevojshme ruajtja e qetësisë dhe shmangia e
çdo lloj keqinterpretimi që pengon zbardhjen e kësaj ngjarjeje tragjike.

Ambasada e Turqisë
Edhe Ambasada e Turqisë në Maqedoni shpreh keqardhjen për vrasjen e
pesëfishtë në Smillokovcë. ‘U shprehim ngushëllime familjarëve të
viktimave’- thuhet përmes një komunikate të ambasadës turke në Shkup.
Shpresojmë që autoritetet të kapin sa më shpejtë autorët, dhe t’i
nxjerrin ata përpara drejtësisë në mënyrë që rasti të zbardhet
tërësisht, theksohet në telegramin e ngushëllimit të ambasadës turke në
Shkup.

U varrosën kufomat

Në Radishan, Butel dhe fshatin Creshovë, sot iu dha lamtumira e fundit
pesë të vrarëve të cilët humbën jetën të enjten në afërsi të liqenit në
fshatin Smillkovcë, në orët e vona. Në varrezat e fshatit Radishan u bë
varrimi i Filip Sllavkovskit, Aleksandar Naqevskit, Cvetanço Acevskit,
që të tre rreth të njëzetave ndërsa në Butel u varros shoku i tyre Kire
Triçkovski. Ndërsa trupi i 45 vjeçarit Borçe Stevkovski u varros në
fshatin e tij të lindjes, në Creshovë. Me lot në sy dhe dhembje të madhe
familjarët e 5 personave të vrarë u dhanë lamtumirën e fundit djemve të
tyre. Në varrimin e të rinjve morën pjesë një numër shumë i madh i
qytetarëve.
Vëllai i Stefkovski, tha se uron që kjo tragjedi të jetë
e fundit. Ai i bëri apel ministres së Brendshme Gordana Jankullovska
dhe kryeministrit Nikolla Gruevski, që vrasësit sa më parë të dalin para
drejtësisë. Kërkesa të ngjashme pati edhe nga familjarët e të rinjve,
të cilët gjithashtu kërkuan zbardhjen e tërësishme të rastit duke i
nxjerr autorët e kësaj vrasjeje para organeve të drejtësisë.
Pikërisht
ky incident me përmasa tragjike ishte shkas që Komuna e Butelit ditën e
sotme ta shpallë ditë zie, duke ulur flamurin shtetëror në gjysmë
shtizë në shenjë respekti për 5 të vrarët. Nevzat Mamuti