[youtube][/youtube]
Forcat paqeruajtëse në përbërje të KFOR-it, kanë konfirmuar se dy pjesëtarë të kësaj force janë plagosur gjatë operacionit të sotëm për heqjen e barrikadës në fshatin Rudarë të komunës së Zveçanit, në veri të Kosovës.

Njëri nga ushtarët, thuhet në komunikatën e KFOR-it, është evakuuar dhe është në gjendje stabile.

Forca paqeruajtëse ka dënuar ashpër këtë akt të dhunshëm, duke thënë se “nuk do të lejojë që situata të përshkallëzohet edhe më shumë” dhe se “do të përdorë masa vetëmbrojtjeje, nëse është e nevojshme”.

Operacionin e sotëm paqerujatësit njoftojnë ta kenë ndërmarrë “me qëllim të përmirësimit të lirisë së lëvizjes dhe nuk ka të bëj vetëm me KFOR-in por me të gjitha organizatat ndërkombëtare dhe gjithë qytetarët e Kosovës”, thuhet në komunikatën e KFOR-it.

KFOR-i ka ftuar gjithashtu të gjitha palët që të shmangin hapat e njëanshëm, deklaratat nxitëse apo përdorimin e akteve të dhunshme.

Milena Cvetkoviq, mjeke në qendrën spitalore në Mitrovicë, i ka thënë Radios Evropa e Lirë se "tre serbë janë plagosur, njëri prej tyre nga të shtënat me armë zjarri, është në gjendje më të rëndë".

Mjetet serbe të informimit nga veriu i Kosovës njoftojnë se KFOR-i ka çmontuar barrikadën në magjistralen Mitrovicë – Leposaviq, përkatësisht te vendi Rudarë, aty ku vitin e kaluar protestuesit serbë kishin ngritur një simbol të lartë kryqi.

Lajmi nuk është konfirmuar ende nga KFOR-i.

Situata raportohet pak më e qetë, ndonëse me tensione.

Që nga orët e hershme, njësitet e KFOR-it, paqeruajtës amerikanë dhe gjermanë, kanë përdorur makinerinë e rëndë dhe eskavatorët me qëllim të heqjes së barrikadës në Rudarë.

Por, me të nisur aksionin, strukturat paralele të pushtetit serb kishin lëshuar alarmet, me çka i sinjalizuan banorët serbë që të dalin në mbrojtje të barrikadës së ngritur.

Nga ai moment, diku rreth orës 8:30 të mëngjesit situata përshkruhet e tensionuar.

Me rritjen e tensioneve, KFOR-i ka përfshirë në aksion edhe helikopterët.

Në anën tjetër, sekretari shtetëror në Ministrinë për Kosovën të Qeverisë së Serbisë, Oliver Ivanoviq, ka thënë se KFOR-i ka ndërmarrë një “veprim shumë të rrezikshëm” duke bërë përpjekje për të hequr barrikadën në Rudarë të Zveçanit.

“Nuk i di motivet për këtë. Me duket se Prishtina dhe KFOR-i shfrytëzojnë vakumin institucional në Serbi për të ndryshuar gjendjen në terren. KFOR-i ka nisur menjëherë të përdorë plumba gome dhe gaz lotsjellës dhe druaj se kjo do të jetë një ditë e gjatë”, ka thënë Ivanoviq për mediat serbe.

Ivanoviq ka thënë se Ministria për Kosovën po bën përpjekje të qetësojë tensionet dhe se tashmë ka kontaktuar misionet ndërkombëtare në Kosovë për këtë çështje.

Serbët e veriut kanë vendosur barrikada në rrugë qysh në fund të korrikut të kaluar, kur Qeveria e Kosovës ka ndërmarrë aksionin për shtrirjen e kontrollit të saj në pikat kufitare 1 dhe 31. /REL/