![[Lajmet Ditore] SHBA ka përgjuar telefonatat e 35 liderëve botërorë (u186u)a-OBAMA-MERKEL-386x217](https://2img.net/h/www.mesazhi.com/modules/news/images/option6/(u186u)a-OBAMA-MERKEL-386x217.jpg)
Një raport i ri thotë se Shtetet e Bashkuara kanë përgjuar thirrjet telefonike të 35 udhëheqësve botërorë.
Raporti në gazetën britanike “Guardian” citon një dokument të vitit 2006, i cili është nxjerrë nga ish-kontraktori i inteligjencës amerikane, Edward Snowden.
Raporti nuk përmend emrat e udhëheqësve që janë përgjuar nga Agjencia për Siguri Kombëtare e Shteteve të Bashkuara.
Ai thotë se zyrtarët amerikanë i kanë dhënë kësaj agjencie mbi 200 numra telefoni për 35 udhëheqës, të cilët janë siguruar nga Shtëpia e Bardhë, Departamenti i Mbrojtjes dhe Departamenti i Shtetit.
Zbulimi vjen në kohën kur në Gjermani ka shpërthyer zemërimi për shkak të dyshimeve se Shtetet e Bashkuara kanë përgjuar thirrje telefonike të kancelares Angela Merkel.
Të enjten, Shtëpia e Bardhë nuk e ka mohuar se ka përgjuar telefonin e Merkelit, por ka thënë se një gjë e tillë nuk do të ndodhë në të ardhmen.
Zyrtarët amerikanë thonë se përgjimi i bërë nga Shtetet e Bashkuara është i nevojshëm për të penguar komplotet terroriste dhe është i ngjashëm me spiunazhin që kryhet nga shumë shtete.
Por, kritikët, duke u thirrur në dokumentet e zbuluara nga Snowden, thonë se agjencitë amerikane kanë shkuar përtej asaj që është e nevojshme për të luftuar ekstremistët.
Në një samit të Bashkimit Evropian, presidenti i Këshillit të BE-së, Herman Van Rompuy, ka thënë se udhëheqësit e Gjermanisë dhe të Francës duan të negociojnë një “mirëkuptim” me Uashingtonin, mbi punën e shërbimeve të inteligjencës.
“Krerët e shteteve dhe të qeverive kanë marrë parasysh planet e Francës dhe të Gjermanisë për të kërkuar bisedime dypalëshe me Shtetet e Bashkuara, me qëllim të gjetjes së një mirëkuptimi në këtë fushë, para fundit të vitit. Ata kanë thënë se vendet e tjera të BE-së janë të mirëpritura për t’iu bashkuar kësaj nisme”, ka thënë Rompuy.
Presidenti i Komisionit Evropian, Jose Manuel Barroso, ka thënë se për shumë evropianë, përgjimet e telefonatave apo të e-maileve janë të papranueshme, sepse ato ngrenë spektrin e regjimeve totalitare.
“Natyrisht se zbulimet e ditëve dhe muajve të fundit kanë tronditur privatësinë personale dhe sigurinë e të dhënave. Kjo është një çështje shumë serioze, sepse për ne evropianët këto janë vlera themelore. Kjo është pikërisht arsyeja që na bën të këmbëngulim në miratimin e një legjislacioni të propozuar për mbrojtjen e të dhënave”, ka thënë Barroso.
Raportet thonë se disa politikanë evropianë kanë bërë thirrje për pezullimin e bisedimeve me Uashingtonin për marrëveshjen e tregtisë së lirisë midis BE-së dhe SHBA-së, për shkak të akuzave për spiunim.
Por, ato janë hedhur poshtë nga kryeministri i Italisë, Enrico Letta, i cili ka thënë se nuk ka “asnjë lidhje” midis spiunimit dhe çështjeve tregtare.
Në një tjetër zhvillim, disa figura të filmit në Hollywood kanë ngritur zërin e tyre kundër aktiviteteve të mbikëqyrjes amerikane.
Personalitetet që përfshijnë regjisorin Oliver Stone, janë shfaqur në një video, në të cilin thonë se liritë e amerikanëve janë në rrezik për shkak të mbikëqyrjes së pakontrolluar të qeverisë.
![[Lajmet Ditore] SHBA ka përgjuar telefonatat e 35 liderëve botërorë Empty](https://2img.net/i/fa/empty.gif)
Thu 23 Mar 2023 - 2:31 nga 
