Lajmet Ditore

Gjobë pastorit që deshi të digjte Kuranin

E marte 21 Shtator 2010 12:43

Pastori amerikan, Terry Jones, i cili kishte kërcënuar me djegien e Kuranit në ditën e njëmbëdhjetëvjetorit të sulmeve terroriste të 11 shtatorit në SHBA, do të duhet të paguaj një gjobë prej 180.000 dollarësh për paralajmërimin e bërë.

Gjoba parasheh mbulimin e shpenzimeve që kishte policia e Floridës, kjo pasi ajo për më shumë se një muaj ishte në gjendje gatishmërie dhe ka përgatitur plane të veprimit në rast të realizimit të kërcënimit, shkruan të hënë e përditshmja “Telegraph”.

“Ishte ky një operacion i madh policor, në të cilën kanë marrë pjesë më shumë se 286 të punësuar”, ka raportuar për CNN përfaqësuesja e policisë në Florida, Charny Sen./koha/







Sekretari amerikan i Mbrojtjes, Robert Gejts është i shqetësuar për planet ruse që t’i shesë sisteme armatimi anti-raketore Sirisë.
Pentagoni njoftoi se Gejts e ka diskutuar këtë çështje me homologun e tij izraelit, Ehud Barak. Izraeli, që është në kufi me Sirinë, e kundërshton vendimin e Rusisë.
Të njëjtin shqetësim Gejts e ngriti dhe në takimin me ministrin e mbrojtjes së Rusisë gjatë vizitës që ai i bëri Uashingtonit javën e kaluar./REL/

Kryeministri i Kosovës, Hashim Thaçi është takuar në Nju Jork me shefen e diplomacisë evropiane Kethrin Eshton. Në takim u diskutua lidhur me hapat e mëtejshëm që do të merren për bashkëpunimin mes Kosovës e Serbisë. Kryeministri Thaçi bashkëpunimin ndërshtetëror me Serbinë e ka cilësuar si fillimin e një kapitulli të ri për thellimin e bashkëpunimit mes vendeve të rajonit.
Baronesha Eshton, sipas zyrës së kryeministrit kosovar ka inkurajuar gatishmërinë e qeverisë së Kosovës për të biseduar me qeverinë e Serbisë. Kjo qasje e komunikimit është në interes të të gjithëve dhe i hap perspektivë zhvillimore rajonit, u shpreh baronesha Ashton në takim. /REL/

Maqedonia ka arritur përparim të madh në realizimin e qëllimeve shekullore në zvogëlimin e rreziqeve shëndetësore dhe zgjerimin e arsimit, avancimin e ambientit jetësor, por përparim më të vogël shënon në fushën e varfërisë dhe të partneritetit për zhvillim, që i përket faktit që fqiu i saj i parë, anëtar i BE-së e pengon në zhvillimin ekonomik, theksoi presidenti Gjorge Ivanov në fjalimin e Samitit të Qëllimeve zhvillimore shekullore, që po mbahet në kuadër të Asamblesë së 65-të të përgjithshme të KB-së në Nju-Jork.
"Ka edhe sqarim pse është përparimi i pamjaftueshëm në këto segmente. Për shumë të pranishëm edhe këtu në këtë sallë është e çuditshme të dëgjojnë se pjesërisht shkaqet për zhvillimin jo-përkatës duhet të kërkohen në procedurat e një vendi anëtar të BE-së dhe NATO-s. Për fat të keq duhet t'ju tregoj se Republika e Maqedonisë është e penguar në zhvillimin ekonomik, nga fqinji i tij i parë. Kemi problem të imponuar rreth emrit të vendit tim, i cili përveç në planin politik, na krijon implikime serioze në zhvillimin ekonomik, në tërheqjen e investimeve të huaja, diçka që mundet drejtpërdrejtë ta zvogëlojë varfërinë dhe papunësinë", theksoi presidenti Ivanov.
Shefi i shtetit potencoi se Maqedonia 15 vjet pas embargos së parë tregtare nga Republika e Greqisë përballet me bllokadë të re, e cila nuk i ka karakteristikat e embargos nga vitet e 90-ta, por megjithatë i ka pasojat e njëjta.
"Është fakt se Republika e Greqisë është një nga investitorët më të mëdhenj në Republikën e Maqedonisë, por gjithashtu është fakt se me bllokadat në proceset integruese, indirekt na bllokohet tërheqja e investitorëve dhe e investimeve të huaja. Por, ne nuk jemi të dekurajuar. Besojmë se së shpejti me fqinjin tonë do të gjejmë zgjidhje, e cila do të na sigurojë të ardhmen evropiane dhe euroatlantike, ndërsa me këtë edhe mirëqenien për qytetarët tanë. Ne jemi të gatshëm për këtë", theksoi presidenti i Maqedonisë në fjalimin në Samitin për qëllimet zhvillimore shekullore. /MIA/

Zhgënjyese, radikale dhe shqetësuese. Kështu kryeministri Gruevski i interpreton deklaratat e ministrit të Jashtëm grek Dimitris Drucas. Ai këto ditë njoftoi se Greqia mbetet në pozitën e saj - emër me përcaktues gjeografik për përdorim të përgjithshëm, ‘madje nëse është e nevojshme, edhe ndryshimi i Kushtetutës‘.
“Ne do të mbetemi optimist, por nevojitet konstruktivitet edhe nga pala tjetër”, tha sot Gruevski, një ditë pasi ndërmjetësi Nimic vuri në dukje se kishte ndjenjë të shtuar të besimit midis Athinës dhe Shkupit.
"Deklaratat e dy-tri ditëve të fundit të përfaqësuesve grek të Qeverisë së ministrit Drucas si dhe të tjerëve janë shumë zhgënjyese dhe tregojnë se gjatë periudhës së kaluar shumë shpresa që i krijuan ishin të rrejshme, sepse përsëri dolën me pozicione deri në fund radikale", tha Nikola Gruevski, kryeministër i Maqedonisë.
Dhe deri sa Gruevski qëndrimet e qeverisë së Papandreut i konsideron se janë më radikale se ato të paraardhësit të tij Karamanlis, grekët në Nju Jork bindin se problemi qëndron në palën maqedonase. Drucas pas takimit të mbrëmshëm me ndërmjetësin Nimic e akuzoi pikërisht kryeministrin e Maqedonisë.
“Gruevski zgjodhi që të mos marrë pjesë këtu në asamblenë e përgjithshme të KB-së ku kishte mundësi takim të drejt për drejt me kryeministrin grek”, tha ai pas takimit me diplomatin amerikan, duke e interpretuar këtë si mungesë të vullnetit të sinqertë për zgjidhjen e kontestit. Gruevski sot u përgjigj:
“Së pari në Nju Jork aspak nuk është caktuar takim i tillë me zotëri Papandreun. Së dyti ai mori ftesë të hapur kur dëshiron ta vizitojë vendin tonë dhe kur dëshiron në cilin do vend që i përgjigjet të takohemi, nëse vlerëson se me këtë takim do të mund të ketë njëfarë përparimi”, deklaroi Gruevski.
Akuzat e këtilla më të ashpra mes Shkupit dhe Athinës pasojnë paralelisht me vlerësimet e Nimicit i cili porositi se ka zhvillim pozitiv dhe se kontesti mund të zgjidhet me dialog midis udhëheqjeve të dy vendeve. Mirëpo ndërmjetësi theksoi se tani nuk është koha për propozimin përfundimtar rreth emrit. Frosina Cvetkovska

Kabul: Nga rrëzimi i helikopterit vdesin 9 ushtarë

E marte 21 Shtator 2010 8:57

Nëntë ushtarë të NATO-s, që janë pjesë e misionit në Afganistan, kanë humbur jetën dhe katër u plagosën nga rrëzimi i një helikopteri.

Aksidenti ndodhi në jug të Afganistanit dhe burimet e forcës shumëkombëshe thanë se nuk ka pasur luftime me afganët në zonën e incidentit. Hetimet po vazhdojnë për gjetjen e shkaqeve të rrëzimit të helikopterit.

Me viktimat e fundit numri i ushtarëve ndërkombëtarë të vrarë në Afganistan gjatë këtij viti ka shkuar në 529.

Së paku 15 fëmijë vdiqën sot pasi autobusi me të cilin ata udhëtonin doli nga rruga dhe ra në lumin Xhelum në pjesën pakistaneze të Kashmirit. Sipas mediumeve vendore, janë nxjerrë trupat e të paktën dhjetë fëmijëve nga gjithsej 25 të cilët ishin në autobus, kurse pesë janë nxjerrë të gjallë. Prindërit të cilët së shpejti erdhën pranë lumit nuk kanë mundur të bëjnë asgjë për shkak se autobusi ishte plotësisht nën ujë, kështu që shumë kohë u detyruan që ta tërheqin me litarë. Në Pakistan, muajin e kaluar, kishte një aksident të ngjashëm me ç’rast humbën jetën 52 persona. Atëherë autobusi ra në lumin Gijari po ashtu në Kashmir. Alsat-M

BFI kërkon "Ndihmë kundër islamit radikal"
Në Maqedoni Bashkësia Fetare Islame ka kërkuar ndihmë nga përfaqësuesit e huaj dhe subjektet politike kundër siç tha “vehabistëve radikalë”. Autoritet thonë se po ndjekin situatën në terren.

E marte 21 Shtator 2010 13:14

Kreu i Bashkësisë Fetare Islame (BFI) në Maqedoni, Efendi Suleman Rexhepi në Shkup, kërkoi ndihmë për siç tha përballjen me vehabistët radikalë.

Efendi Rexhepi në një konferencë për shtyp, pas një takimi me imamët që veprojnë në diasporë i kërkoi ndihmë subjekteve politike dhe përfaqësuesve të huaj, sidomos SHBA-ve dhe BE-së.

“I bëjmë thirrje partive politike shqiptare, Qeverisë, institucioneve shtetërorë si dhe të gjitha subjekteve të akredituara në Maqedoni në veçanti Ambasadës së Shteteve të Bashkuara të Amerikës dhe asaj të Bashkimit Evropian me seli në Shkup, që të përkrahin Institucionin e BFI-së dhe të marrin masa të duhura kundër këtyre individëve radikal, qëllimi i të cilëve është dëmtimi i Islamit si fe”, tha Efendi Suleman Rexhepi, kreu i Bashkësisë Islame në Maqedoni, institucioni që rregullon jetën e komunitetit Mysliman.

Deklaratat e tij vinë, pasi më herët në media ishte njoftuar se disa xhami në Shkup kontrollohen nga grupe që predikojnë islamin në mënyrë të ndryshme nga ai tradicional në Shkup.

Kjo është hera e parë që zyrtarët e Bashkësisë Fetare Islame bëjnë apel për ndihmë ndaj atyre që cilësohen si predikues të islamit radikal. Më herët Bashkësia Islame e Maqedonisë mohonte që në Maqedoni veprojnë struktura të tilla./bbc/

Euro-ambasadori Ervan Fuere është optimist se regjistrimi i popullsisë që do realizohet vitin e ardhshëm, do të jetë bëhet transparent dhe i besueshëm nga gjithë etnitetet. Fuere po ashtu ka komentuar edhe marrëdhëniet ndëretnike të cilat sipas tij janë të përmirësuara por ka theksuar rëndësinë që ka për Maqedoninë implementimi i Marrëveshjes së Ohrit. Këto komente Fuere i bëri gjatë vizitës që ka zhvilluar sot në Komunën e Tetovës.
“Ne jemi të inkurajuar nga hapat që i bën qeveria dhe Enti i Statistikave rreth përgatitjeve paraprake për mbajtjen e regjistrimit dhe ne jemi të bindur se ky proces do të zhvillohet në mënyrë shumë transparente dhe do të ketë besueshmërinë e të gjithë qytetarëve, do të ketë besimin e të gjithë përkatësive etnike dhe ne si BE së bashku me Entin statistikor do të jemi të përfshirë sikur edhe në regjistrimet që mbahen dhe do të mbahen në shumë vende tjera të rajonit. Besoj se do të jemi të kyçur në dhënien e përkrahjes edhe në regjistrimin këtu në Maqedoni”, deklaroi Ervan Fuere, ambassador i BE-së. Alsat-M

Demokracia e Re thotë se regjistrimi i popullsisë në vitin 2011 nuk do të pasqyrojë numrin real të popullsisë. Këto vërejtje, partia e Selmanit i bazon në përfaqësimin joadekuat të etnive në entin për statistikë, dhe në marrëveshjen paraprake mes partnere të koalicionit lidhur me përqindjen e etniteteve që do të dalin nga ky regjistrim.
“Ajo që është fatkeqësi që e dëgjojmë herë si spekulim e herë si lajm në media është se parterët e koalicionit paskan bërë marrëveshje se sa do të dalin përqindjet. Kjo është shumë e dëmshme për shkak se jemi dëshmitar se çdo marrëveshje që është bërë deri tash sidomos kur ka të bëj me çështjet ndëretnike gjithmonë kanë rezultuar në dëm të shqiptarëve. ...vet fakti që ka hapësirë për të manipuluar është shqetësues”, deklaroi Sulejman Rushiti, deputet i DR-së.
Por shumica parlamentare mohon të ketë një marrëveshje paraprake mes partnerëve të koalicionit dhe thekson se ligji i plotëson të gjitha standardet evropiane. Dyshimet e opozitës sipas VMRO DPMNE-së janë si rezultat i mos leximit të propozim ligjit.
“Nuk mund të kemi marrëveshje politike sepse ne nuk mund të improvizojmë një qytetar nëse nuk ekziston. Do të flasim shumë realisht. Ligji sillet për të pasur një regjistrim real në Maqedoni dhe për të pasur popullsi reale”, theksoi Tahir Hani deputet i BDI-së.
“Unë me të vërtetë nuk e di, më tepër jam e bindur se nuk është i lexuar ligji e as që është bërë ndonjë krahasim e as që janë parë standardet që kërkohen nga ne si vend që dëshirojmë të bëhemi pjesë e BE-së. Kur do të krahasohen kërkesat që nga ne kërkohen nga ana e BE-së dhe cilat janë standardet ndërkombëtare dhe standardet e OKB-së, kur do ta shohin vlerësimin e Eurostatit të dhënë për ligjin, do t’a kenë të qartë se kemi ligj të vërtetë evropian”, kështu u shpreh Sillvana Boneva, deputete e VMRO DPMNE-së.
Opozita ka vërejtje edhe për periudhën e procesit të regjistrimit, pasi mendon se muaji korrik është koha e duhur. Megjithë këto deklarata, në seancën e sotme të komisionit për çështje evropiane nuk pati debat nga ana e përfaqësuesve të opozitës, përveç elaborimit të projekt ligjit nga e ministrit Mihajllo Manevski dhe dy deputetëve të shumicës. Gjyltene Rexhallari

Pas alarmit që dhanë shërbimet sekrete, për sulme të mundshme të Al Kaidës mbi rrjetin francez të transportit, sot autoritetet policore gjetën në jug të Parisit një pako me një substancë të lëngshme, detonatori i së cilës lidhej me një fill. Mjeti shpërthyes u gjet në binarët ku kalonte një tren i shpejtësisë së lartë. Në vendin e ngjarjes, pas sinjalizimit nga personeli i hekurudhave, shkuan zjarrfikës dhe forca rendi. Policia nuk dha detaje të hollësishme, por tha se alarmi ishte fals. Mediat aludojnë se një deklaratë e tillë, mund të jetë bërë për të mos rritur panikun. Shërbimi sekret vazhdon të jetë vigjilent për sulme të mundshme terroriste, të cilat betë ministri i brendshëm, i quajti publikisht ‘kërcënime reale’. Alsat-M

Tre trafikantë droge u varën sot në burgun e Yazd në qendër të Iranit. Lajmi bëhet i ditur nga agjencia shtetërore e lajmeve 'Isna', e cila nuk bënte publike identitetet e viktimave. Vetëm dje u ekzekutuan 2 trafikantë të tjerë droge, si dhe një vrasës. Ekzekutimet me varje u kryen në burgun e Kazeronit. Irani është një nga vendet që aplikon dënimet kapitale, kryesisht me varje, ndërkohë që për krime nderi, kryesisht të kryera nga gratë aplikohet vrasja me gurë.