Paralajmërohen haxhinjtë për aktivitete politike

Autoritetet shtetërore të Arabisë Saudite kanë vendosur gjashtë rregulla për haxhinjtë të cilët duhet t’i përmbahen këtë vit, duke përfshirë mosmbajtjen e platformave të ideve politike në versionet e shtypura

Ndërkohë, Ministria egjiptiane e solidaritetit dhe drejtësisë shoqërore, theksoi se haxhinjtë egjiptian do të udhëtojnë në Arabinë Saudite për të kryer ritualet e Haxhit, por ata nuk duhet të merren me aktivitete politike.

Në krye të kësaj liste thuhet se haxhinjtë duhet t’i respektojnë të gjitha ligjet dhe traditat islame të Arabisë Saudite, duke përfshirë ndalimin e bartjes së alkoolit, drogës, materialeve pornografike, si dhe materialet e shtypura me bindje fetare të cilat nuk përputhen me mësimet islame të Arabisë Saudite. Në deklaratën saudite rreth rregullave thuhet se haxhinjtë egjiptian duhet ta japin betimin me shkrim që do t’i respektojnë rregullat saudite para se të hyjnë në këtë vend, dhe nëse i thyejnë rregullat ata do të dënohen.

Kufizimet do të shkruhen në secilën vizë hyrëse të haxhinjëve, thuhet në deklaratë. Më tej thuhet se haxhinjtë, pas kryerjes së haxhit, duhet të largohen nga Arabia Saudite apo cili do shtetet tjetër anëtarë i Këshillit për Bashkëpunimit të Gjirit (GCC). Në deklaratë gjithashtu janë dhënë detaje të veçanta për kryerjen e haxhit. Haxhinjtë gjatë aplikimit për vizë duhet të japin informacione të vërteta dhe të sakta. Në qoftë se pas hyrjes në Arabinë Saudite të dhënat tregohen të pa sakta, autoritetet saudite mbajnë të drejtën për të parandaluar haxhinë të hyjë në vend, dhe ai menjëherë duhet të kthehet në shtëpi me shpenzimet e tij personale pa kurrfarë kompensimi nga ana e Arabisë Saudite. “Haxhinjtë egjiptian që udhëtojnë në Arabinë Saudite për të kryer haxhin nuk ushtrojnë politikën”, tha Mohamed Tawfiq, drejtori i institutit kombëtarë për lehtësimin e kryerjes së haxhit dhe umres pranë Ministrisë së solidaritetit dhe drejtësisë shoqërore.

Tawfiq për ‘Al-Masry Al-Youm’ deklaroi se Ministria e solidaritetit social dhe Ministria e drejtësisë dhe çështjeve fetare, kanë rënë dakord që të dërgojnë imamët me haxhinjtë për t’i ndihmuar ata që t’i ndjekin rregullat gjatë udhëtimit. Gjithashtu, themeluesi dhe president i unionit ndërkombëtar të dijetarëve muslimanë (IAMS) Sheikh Jusuf el-Karadawi ka deklaruar se është i ndaluar përdorimi i sloganeve politike, demonstrimi apo kryerja e ndonjë veprimi që mund të rrezikojë sigurinë e haxhinjëve gjatë Haxhit. “Allahu këtë vend, ku kryhen ritualet e haxhit, e bëri të qetë dhe të sigurt, në mënyrë që muslimanët t’i kryejnë ritet e tyre me spiritualitetin dhe rehatinë më të madhe, dhe pa ndonjë problem”, tha Karadawi për gazetën saudite ‘Okaz’.

“Grindjet e ofendojnë haxhin, i cili është detyrim i madh fetarë dhe shtylla e pestë e Islamit”, tha ai. “Keqpërdorimi i haxhit për arritjen e qëllimeve politike dhe objektivave që nuk janë të lidhura me haxhin, mbajtja e demonstratave ose përdorimi i sloganeve politike gjatë pelegrinazhit në Mekë janë të papranueshme, sepse veprime të tilla nxisin grindje mes haxhinjëve në vendin e shenjtë”, thotë Karadawi.

Karadawi ka këshilluar haxhinjtë: “Ky ritual i madh shkrinë të gjitha dallimet mes muslimanëve që u përkasin kombeve, racave, gjuhëve, rajoneve dhe klasave të ndryshme në mënyrë që të gjithë të ndjehen si një popull, ashtu si Allahu dëshiron të jenë, e jo si njerëz të ndryshëm, ashtu siç duan t’i shohin armiqtë e tyre. Populli i bashkuar musliman ka një unitet të besimit, të ritualeve, ligjit, moralit, sjelljes dhe konceptit. “/IGJ/