Persona të panjohur mbrëmë pas mesnate kanë sulmuar me koktej molotovi Ambasadën e Maqedonisë në Prishtinë. Sipas informatave të para nga ky sulm nuk ka pasur asnjë person të lënduar. Sulmin në fjalë e kanë konfirmuar edhe në Policinë e Kosovës. “Në bazë të informacioneve të para policore dhe kontaktit me zyrtarë të Ambasadës së Republikës së Maqedonisë, dyshohet që në këtë rast të kenë qenë të përfshirë tre persona të dyshuar me një automjet ngjyrë të bardhë, e cila supozohet të ketë qenë e tipit Toyota”, thuhet në njoftimin e policisë së Kosovës. Nga atje njoftojnë se organet e rendit në Kosovë janë duke punuar intensivisht për zbardhjen e rastit dhe se policia është vënë në kërkim të personave të dyshuar. E ndërkohë i menjëhershëm ka qenë reagimi i Maqedonisë. Ministria e Punëve të Jashtme e Maqedonisë nëpërmjet një komunikate ka dënuar ashpër sulmin e mbrëmshëm ndaj Ambasadës së Republikës së Maqedonisë në Prishtinë. “Duke pasur parasysh se ky paraqet edhe një incident më serioz, MPJ pret që incidenti të dënohet nga autoritetet kosovare si dhe të gjenden dhe sanksionohen autorët e sulmit. Njëkohësisht, Republika e Maqedonisë pret që autoritetet kosovare të punojnë në parandalimin e incidenteve të këtilla, me çka edhe do të manifestoheshin përcaktimet e deklaruara të Kosovës për marrëdhënie të mirë ndër-fqinjësore me Republikën e Maqedonisë, për ruajtjen e stabilitetit dhe të sigurisë në gjithë rajonin”, thuhet në komunikatën e Ministrisë së Jashtme të Maqedonisë. Ndaj sulmit të ambasadës së Maqedonisë në Prishtinë, ka reaguar edhe Ministria e Punëve të Jashtme e Kosovës duke e dënuar këtë akt: “Ministria e Punëve të Jashtme e konsideron tërësisht të papranueshëm dhe në dëm të raporteve miqësore mes dy shteteve tona këtë akt vandal. Ministria e Jashtme kërkon nga organet e hetuesisë që sa më parë të zbardhin rastin dhe të vënë para organeve të drejtësisë kryerësit e këtij akti të ulët. Ministria e Punëve të Jashtme e Republikës së Kosovës shpreh përkushtimin e fuqishëm të institucioneve të shtetit për forcimin e marrëdhënieve të fqinjësisë së mirë me Republikën e Maqedonisë”, thuhet në reagimin e MPJ-së së Kosovës. Mediat kosovare njoftojnë se një togere policore po kalonte aty afër kur kishte vërejtur sulmuesit dhe ajo menjëherë ishte hedhur në ndjekje të tyre duke e ndërprerë sulmin që ka mundur të jetë më serioz. Ky është incidenti i dytë në Ambasadën e Maqedonisë në Prishtinë për vetëm një javë. Ditë më parë ishte thyer një xham i vitrinës së informatave që është i vendosur në rrethojën e Ambasadës së Maqedonisë në Prishtinë. Shkëlzen Aqifi