BFI: 'Të mos ofendohet Islami'
Pas shtatë ditë BFI-ja më në fund doli me reagim lidhur me aksionin ‘Monstrum’ dhe deklaratave të ministres Jankullovska se bëhet fjalë për grupe radikale islamike. Ata kërkojnë nga Jankullovska që t’u kërkojë falje myslimanëve në Maqedoni, për shkak të arrestimit të grave myslimane dhe për deklaratat e saj se një pjesë nga grupi i të arrestuarve se janë radikal islamik, para se të argumentohet statusi i tyre në bazë të vendimit gjyqësor. Kjo, sipas BFI-së, paraqet veprim kundërligjor. BFI kundërshton edhe faktin se si argumente kundër të arrestuarve janë marrë edhe Kurani si dhe literaturë fetare. “Prej kur posedimi i Kuranit dhe literaturës fetare na qenka vepër penale dhe me cilin ligj myslimanëve u ndalohet që në shtëpitë e tyre të mbajnë Kuran dhe literaturë fetare? Tërheqja dhe maltretimi i grave myslimane nga ana e policëve të armatosur paraqet goditje serioze mbi nderin dhe namuzin e femrës myslimane. Prandaj myslimanët e Republikës së Maqedonisë kërkojnë nga Ministrja e Punëve të Brendshme të kërkoj falje publike. Edhe një herë u bëjmë me dije se kriminelët e vërtetë, dhe vetëm ata duhet të dënohen dhe çdo një ngjarje të mos shfrytëzohet në të ardhmen, për të ofenduar Islamin nga kushdo qoftë, e më së paku nga ata të cilët duhet të zbatojnë Kushtetutën dhe ligjet ”, tha Driton Dikena, zëdhënës i BFI-së. BFI vlerëson se nëpërmjet nxitjes së urrejtjes ndërfetare dhe ndëretnike, pushteti po tenton të afrohet drejt integrimeve euroatlantike. Sipas tyre, kjo tentativë është shumë e rrezikshme, për shkak se kushtet për anëtarësim në NATO dhe BE janë decime dhe të qarta e sidomos në fushën e lirive dhe të drejtave qytetare dhe fetare të njeriut. Shkëlzen Aqifi